MARKUS 13

Bait Allah bakea nubuak

(Mat. 24:1-2; Luk. 21:5-6)

1Ketiko Yesus keluea kunei Bait Allah, suang murid-Ne madeak ngen Si, “Gu'au, keliakba padeak kelaine butau-butau'o ngen padeak keba'esne gedung-gedung'o!” 2Lajau Yesus madeak ngen si, “Udi kemliak gedung-gedung de ba'es yo? Coa gen do butau kulo bakea nunyau teletok neak das butau de luyen, kutene bakea temben.”

Mulone derito

(Mat. 24:3-14; Luk. 21:7-19)

3Ketiko Yesus temot neak Tebo Zaitun, sekadep ngen Bait Allah, Petrus, Yakobus, Yohanes ngen Adreas betanye seca'o pribadi ngen-Si: 4“Nadeak ba ngen keme, tengen do'o bakea tejijai, ngen jano tandone, amen kutene'o bakea sapei ngen kesudone.”

5Mako muloiba Yesus madeak ngen tobo'o, “Atei-ateiba supayo jibeak de sapei udi keno pike! 6Bakea teko dau tun ngen makei gen-Ku ngen madeak: ‘Uku ba Si,’ ngen tobo'o bakea mike dau tun. 7Amen udi temi'uk sa'ei perang atau bito-bito tetang perang, jibeakba udi liseak. Kutene'o harus tejijai, tetapi do'o ati kesudone. 8Sebab bangso bakea perang melawen bangso kerajaan melawen kerajaan. Bakea tejijai gepo bumai neak macem penan, ngen bakea ade kenyemen. Kutene'o tembei ba mulone derito jemlang zaman belau.

9 # Mat. 10:17-20; Luk. 12:11-12 Tapi udi yo, atei-ateiba! Udi bakea senereak ngen majelis agamo ngen udi bakea nokoa neak umeak semyang. Ngen bakea nadep ngen tobo gubernur ngen tobo rajo kerno Uku, sebagoi saksai bagiak tobo'o. 10Tapi Bito Baik harus melei namen kileak ngen kute bangso. 11Amen udi ni'ing ngen senerak, jibeakba udi renyeng jano de harus udi nadeak. Tapi nadeak ba jano de udi nelei ngen ko pado saat o kulo, sebab iso udi de kemecek, meluyen Roh Sucai.

12Suang pasuak bakea senereak pasuakne utuk nunuak. Awei'o kulo suang tieak teadep anok ne. Anok-anok bakea berutak teadep tun tuaine ngen bakea munuak tobo'o. 13#Mat. 10:22 Udi bakea jenngik kute tun kerno gen-Ku. Tapi tun de betaen sapei ade sudone bakea selamat.”

Sikso de benek ngen Rajo-rajo Penyelamat palsu

(Mat. 24:15-28; Luk. 21:20-24)

14 # Dan. 9:27, 11:31, 12:11 “Amen udi kemliak kejahatan de membinaso je neak penan de coa patutne – paro pembaco kelokne paham – mako tun-tun de neak Yudea harusba melilai dirai moi tebo-tebo. 15#Luk. 17:31 Tun de dong berade neak das umeak jibeakba tu'un ngen masuk utuk mok sesuaktau kunei umeakne. 16Ngen tun de neak kebun jibeakba belek utuk mok keracokne. 17Celakoba embei-embei de tenei lai atau de banok titik pado maso'o. 18Bedu'oba, supayo kutene'o coa tejijai pado musim sengok. 19#Dan. 12:1; Why. 7:14 Sebab pado maso'o bakea tejijai sikso awei de ati perneak tejijai sejok mulone dunio, de cenipto Allah, sapei uyo ngen de coa bakea tejijai igai. 20Sekirone Tuhan coa gemacang waktaune, mako coa suang tun bakea senlamat; tapi kerno tun-tun piliak de sudo niliak-Ne, Tuhan gemacang waktaune.

21Pado waktau'o amen tun madeak ngen udi: ‘Keliak, Rajo Penyelamat ade neak yo,’ atau: ‘Keliak, Rajo Penyelamat ade neak di,’ jibeak udi masai. 22Sebab Rajo-rajo Penyelamat palsu ngen nebai-nebai palsu bakea timboa ngen tobo'o bakea menea tando-tando, mujizat-mujizat ngen maksud, sekirone mukin, mike tun-tun pilihan. 23Atei-ateiba udi! Uku bi lebiak dute madeak kutene yo ngen udi.”

Tekone Anok Manusio

(Mat. 24:29-36; Luk. 21:25-33)

24 # Yes. 13:10; Yeh. 32:7; Yl. 2:10, 31, 3:15; Why. 6:12 “Tapi pado maso o, sesudo sikso o, matai bilai bakea jijai kelem ngen bulen coa becahayo. 25#Yes. 34:4; Yl. 2:10; Why. 6:13 Ngen bitang-bitang bakea us kunei lenget, ngen kuaso-kuaso lenget bakea gucang. 26#Dan. 7:13; Why. 1:7 Pado waktau'o tun bakea kemliak anok manusio teko lem mbun-mbun ngen kute kuaso ngen kemulioan-Ne. 27Pado waktau'o kulo si bakea meluak keluea malaikat-malaikat ngen bakea melungguk tun-tun de sudo niliakne kunei kepat penjuru bumai, kunei ujung bumai sapei ujung lenget.

Pelajaran kunei pun ara

(Mat. 24:32-35; Luk. 21:29-33)

28Mokba pelajaran kunei perumpamo tetang pun ara amen dan-danne luyek ngen muloi tunes, udi namen bahwo musim panes bi pa'ok. 29Awei yo kulo, amen udi kemliak hal-hal'o tejijai, namenba bahwo waktaune bi pa'ok, sudo neak adep bang. 30Sesungguakne uku madeak ngen udi: tun-tun zaman yo coa bakea lalau, ayok kutene'o tejijai. 31Lenget ngen bumai bakea berakher, tapi kecek-Ku yo coa bakea berakher.

Nasehat supayo bejago-jago

32 # Mat. 24:36 “Tapi tetang bilai atau saat'o coa suang tun de namen, malaikat-malaikat neak surgo coa ngen anok kulo coa, hanyo Bapa bae. 33Atei-ateiba ngen bejago-jagoba! Sebab udi coa namen tengen waktaune sapei. 34#Mat. 25:14; Luk. 12:36-38 Keadaanne awei suang de lalau, de teminggea umeakne ngen semrak tanggung jawab ngen pelayan-pelayanne. Masing-masing ngen tugasne, ngen periteak penjago bang supayo berjago-jago. 35Kerno'o bejago-jagoba, sebab udi coa namen tengen Tuan umeak'o belek, ayok kelemen, atau uak malem, atau kekabuk. 36Supayo amen si tibo-tibo teko, jibeak sapei si kemliak udi dong tidua. 37Jano de Kunadeak ngen udi, Uku madeak ngen kute tun: bejago-jagoba!”

Currently Selected:

MARKUS 13: REJ

Highlight

Copy