MARKUS 11

Yesus senambut ngen riang neak Yerusalem

(Mat. 21:1-9; Luk. 19:28-38; Yoh. 12:12-15)

1Ketiko Yesus ngen murid-murid-Ne bi pa'ok Yarusalem, pa'ok Betfage ngen Betania de teletok neak Tebo Zaitun, Yesus meluak duai murid-Ne. 2Ngen pesen, “Lalauba moi sadei de neak adepnu'o. Pado waktau udi masuk neak di, udi bakea segro temau dikup keledai u'ai tenambang, de ati perneak tun temunggang. Nepas ba keledai ngen mbin ba minyo. 3Ngen amen ade tun temnai ngen ko, “Getai udi menea'o, jawab ba: Tuhan merlune, ngen Si bakea segro melekne moi miyo.” 4Tobo'o kulo lalau, temau dikup keledai u'ai neket neak muko bang neak luea, neak pengger dalen lajau npasne. 5Ngen kekedau tun de ade neak di madeak ngen tobo'o, “Jano maksudne udi mpas keledai'o?” 6Lajau tobo'o jemawab awei de sudo de nadeak Yesus. Mako tun-tun'o munyau tobo'o. 7Lajau tobo'o mbin keledai'o ngen Yesus, ngen mpek lepek ngen keracok tobo'o, sesudo'o Yesus kenek moi dasne. 8Dau tun de metang keracokne neak dalen, ade kulo de semirok dan-dan ijo de tobo'o mok kunei kebun. 9#Mzm. 118:26 Tun-tun de paneu neak muko ngen tobo'o de motoa kunei belakang menggang: “Hosana! Tepujaiba si de teko lem gen Tuhan! 10Tepujaiba Kerajaan de teko, Kerajaan tiak ite Daud! Hosana neak penan de paling lekat!”

11Sapeine neak Yarusalem Si masuk moi Umeak Allah. Neak di Si kemliak kutene, tapi kerno bilai bi kelmen Si keluea moi Betania besamo ngen keduai belas murid-Ne.

Yesus semupeak pun ara

(Mat. 21:18-19)

12Menne sesudo Yesus ngen keduai belas murid-Ne teminggea Betania, Yesus nyemen. 13Ngen kunei ku'uak Si kemliak pun ara de sudo tunes. Si ma'okne utuk kemliak amen Si dapet jano bae ngen pun ara'o. Tapi waktau Si sapei neak di Si coa dapet jejano seluyen daun-daun bae, sebab waktau'o ati musim bueak ara. 14Mako nadeakne ngen pun'o, “Jibeak igai su'ang kulo mbuk bueak nu se ke'an ne!”

Murid-murid-Ne kulo temi'ukne.

Yesus semucai Umeak Allah

(Mat. 21:12-13; Luk. 19:45-48; Yoh. 2:13-16)

15Lajau sapeiba Yesus ngen murid-murid-Ne neak Yarusalem. Sesudo Yesus masuk moi Umeak Allah, muloiba si musir tun-tun de jagea neak latet Umeak Allah. Mija-mija penan temukar caci ngen bebaku tukang jagea burung daro genulekne. 16Ngen Si coa buliak tun mbin barang-barang melitas latet Umeak Allah. 17#Yes. 56:7; Yer. 7:11 Lajau Si majea tobo'o, nadeak-Ne, “Iso ade tetulis: Umeak-Ku bakea sembut umeak du'o utuk kute bangso? Tapi udi yo bi jemijaine penan perapok!”

18Imem-imem kepalo ngen gu'au-gu'au agamo temi'uk hal'o, tobo'o berusaho utuk munuak Si. Tobo'o saben ngen-Si kerno kute tun kagum te'adep Ajaran-Ne.

19Ayok kelmen tobo'o keluea igai kunei kota.

Pun ara de sudo ke'ing

(Mat. 21:20-22)

20Kekabuk waktau Yesus ngen murid-murid-Ne melitas, tobo'o kemliak pun ara nano sudo ke'ing sapei balet-baletne. 21Mako tingetba Petrus ngen jano de sudo tejijai, lajau si madeak ngen Yesus, “Gu'au, keliakba, pun ara de Ko senupeak'o sudo ke'ing.”

22Yesus jenawab tobo'o, “Cayo ba ngen Allah! 23#Mat. 17:20; 1Kor. 13:2 Uku madeak ngen udi: Sesungguakne api de madeak ngen tebo yo: ‘Taketba ngen tekuangba moi lem laut!’ Asal coa ragau ateine, tapi masai, bahwo jano de nadeakne'o bakea te jijai, mako hal'o bakea te jijai utukne. 24Kerno'o Uku madeak ngen udi: Jano bae de udi minoi ngen demu'o, masaiba bahwo udi bi temimone, mako hal'o bakea nelei ngen udi. 25#Mat. 6:14 Amen udi bedu'o, napunba kileak, sekirone ade su'ang tun lem ateinu te'adep su'ang tun, supayo kulo Bapa nu de neak surgo mapun saleak-saleaknu. [26Tapi amen udi coa melei apun, mako Bapanu de neak surgo kulo coa bakea mapun duso-dusonu.]”

Pertanyaan tetang kuaso Yesus

(Mat. 21:23-27; Luk. 20:1-8)

27Lajau Yesus ngen murid-murid-Ne sapei kulo neak Yarusalem. Waktau Yesus paneu neak latet Umeak Allah, tekoba ngen-Si imem-imem kepalo, gu'au-gu'au agamo ngen tetuai. 28Ngen betanye ngen Si, “Ngen kuaso jano Ko menea hal-hal'o? Ngen api de melei kuaso'o ngen Ko, sehinggo Ko menea hal-hal'o?”

29Jawab Yesus ngen tobo'o, “Uku bakea melei do pertanyaan ngen udi. Nelei ba Uku jawabne, mako Uku bakea madeak ngen udi ngen kuaso ipe Uku menea hal-hal'o. 30Baptisan Yohanes'o kunei surgo atau kunei manusio? Neleiba Uku jawabne!” 31Tobo'o madeak neak antaro tobo'o, “Amen ite nadeak: ‘Kunei surgo, si bakea madeak: Amen awei'o, getai udi coa masai ngen si?’ 32Tapi maso ite madeak: ‘Kunei manusio!’ ” Sebab tobo'o saben ngen tun dau, kerno kute tun manggap bahwa Yohanes benea-benea su'ang nebai. 33Lajau tobo'o jemawab Yesus, “Keme coa namen.” Mako nadeak Yesus ngen tobo'o, “Amen awei yo, Uku kulo coa madeak ngen udi ngen kuaso ipe Uku menea hal-hal'o.”

Currently Selected:

MARKUS 11: REJ

Highlight

Copy