MARKUS 10
10
Sa'ok
(Mat. 19:1-9)
1Kunei di Yesus berakat moi daerah Yudea ngen moi daerah dipoa Bioa Yordan ngen neak di tun dau teko gemlumbung Si; awei biaso Si majea tobo'o kulo.
2Mako tekoba tun-tun Farisi, utuk cemubo Yesus tobo'o betanye ngen Si, “Jano su'ang maten buliak sema'ok ngenyanne?”
3Tapi jawab-Ne ngen tobo'o, “Jano periteak Musa ngen udi?”
4 #
Ul. 24:1-4; Mat. 5:31 Jawab tobo'o, “Musa melei izin utuk sema'okne ngen menea su'et sa'ok.”
5Lajau nadeak Yesus ngen tobo'o, “Justru kerno ninik puyangnu telo ulau mako Musa temulis periteak yo utuk udi.” 6#Kej. 1:27, 5:2 “Kerno pado mulone dunio, Allah jemijai tobo'o semanei ngen selawei. 7#Kej. 2:24 Kerno'o semanei bakea teminggea tiakne ngen indokne ngen jijai do ngen ngenyanne. 8Sehinggo keduaine o ijai do. Awei yo ba tobo'o coa igai duai, seluyen do. 9Kerno'o, jano de sudo jijai do ngen Allah, coa buliak cen'ei manusio.”
10Waktau tobo'o bi neak dasei, murid-murid'o betanye kulo ngen Yesus tetang hal'o. 11#Mat. 5:32; Luk. 16:18; 1Kor. 7:10-11 Lajau nadeak-Ne ngen tobo'o, “Api sema'ok ngenyanne lajau nikeak ngen selawei luyen, si idup lem perzinahan teadep ngenyanne o. 12Amen ngenyanne sema'ok matenne ngen tunok igai ngen semanei luyen si berzinah.”
Yesus memberkati anok-anok
(Mat. 19:13-15; Luk. 18:15-17)
13Lajau tun mbin anok-anok titik ngen Yesus supayo si gemindoa tobo'o; tapi murid-murid-Ne mengiak tun-tun'o. 14Kemliak hal'o, Yesus mengiak ngen madeak ngen tobo'o, “Kunyauba anok-anok'o teko ngen Uku, jibeak kemadang tobo'o, sebab tun-tun awei yo ba de jijai anggota umat Allah. 15#Mat. 18:3; Luk. 18:17 Sesungguakne Uku madeak ngen udi: api bae de semambut Allah meriteak sebagai Rajo awei anok titik, si coa nam masuk moi lemne.” 16Lajau si megep anok-anok o ngen samo meletok tangen-Ne neak das tobo'o Si memberkatinya.
Tun kayo saro masuk moi lem Allah meriteak sebagai Rajo
(Mat. 19:16-26; Luk. 18:18-27)
17Pado waktau Yesus temrus pemaneu-Ne, tekoba suang tun ngacap magea Yesus ngen samo sujud neak adep-Ne si betanye, “Gu'au de baik, jano de harus Uku menea utuk dapet idup de kekal?”
18Yesus jenawab, “Getai udi madeak Uku baik? Coa su'ang tun de baik seluyen Allah bae. 19#Kel. 20:12-16; Ul. 5:16-20 Ko pasti namen periteak-periteak yo: ‘Jibeak munuak, jibeak berzinah, jibeak maling, jibeak melei saksai dusto, jibeak mike tun, hormatba bak nu ngen indok nu!’ ”
20Lajau nadeak tun'o ngen Si, “Gu'au, kutene'o de nea ku sejok maso u'aiku.”
21Tapi Yesus kemliak si ngen meding ibo ngen Si, lajau madeak ngen si, “Cuma do igai kekurangan udi. Lalauba, jenua ba jano de udi temuan ngen neleiba'o ngen tun-tun peset, mako ko bakea dapet herto neak surgo. Sesudo'o tekoba mio ngen totoaba Uku.” 22Temi'uk kecek'o si jijai keciwo, lajau lalau ngen ibo, sebab dau hartone.
23Lajau Yesus kemliak murid-murid-Ne neak sekeliling-Ne ngen madeak ngen tobo'o, “Padeak sarone tun kayo masuk moi lem dunio blau Allah.”
24Murid-murid-Ne cengan temi'uk kecek-Ne'o. Tapi Yesus madeak igai, “Anok-anok-Ku, padeak sarone jijai anggota umat Allah. 25Lebiak mudeak dikup uto masuk lubang dolom kunei pado su'ang tun kayo masuk moi lem Dunio Blau Allah.”
26Tobo'o tambeak cengang ngen madeak su'ang tun ngen deluyen, “Amen awei yo, api de dapet semlamat?”
27Yesus kemliak tobo'o ngen madeak, “Utuk manusio hal'o coa mukin, tapi iso aweiyo ngen Allah. Sebab kute sesuatau adeba mukin utuk Allah.”
Upeak motoa Yesus
(Mat. 19:27-30; Luk. 18:28-30)
28Madeakba Petrus ngen Yesus, “Keme bi teminggea kute sesuaktau ngen motoa Yesus!” 29Yesus jemawab, “Uku madeak ngen udi, sesungguakne tiep tun de kerno Uku ngen kerno Bito Baik teminggea umeakne, pasuakne semanei atau pasuakne selawei, indokne atau tieakne, anok-anokne atau kebunne. 30Tun'o uyo pado maso uyo kulo bakea temimo igai sotos kilai lipet: Umeak, pasuakne semanei, pasuakne selawei, indok, anok ngen kebun, debatpun senerto berbagoi penganiayaan, pado zaman de bakea teko si bakea temimo idup de kekal. 31#Mat. 20:16; Luk. 13:30 Tapi dau tun de dute bakea jijai de akhir ngen de akhir bakea jijai de dute.”
Nelei namen de ketelau tetang derito Yesus
(Mat. 20:17-19; Luk. 18:31-34)
32Yesus ngen murid-murid-Ne dong lem pemaneu moi Yarusalem ngen Yesus paneu neak muko. Murid-murid asai temes ngen kulo tun-tun de temotoa Si kunei belakang asai saben. Debat igai Yesus menok keduai belas murid-Ne ngen si muloi madeak ngen tobo'o jano de bakea tejijai das dirai-Ne. 33Nadeak-Ne, “Uyo ite lalau moi Yerusalem ngen Anok Manusio bakea semrak ngen imem-imem kepalo ngen gu'au-gu'au agamo, tobo'o bakea mukum matei ngen Si. Ngen tobo'o bakea semrak Si ngen bangso-bangso de coa kemnal Allah. 34Ngen Si bakea gemnye, tenkek, cenambuk ngen nunuak, sesudo telau bilai Si bakea idup igai.”
Kinoi Yakobus ngen Yohanes
Iso meriteak seluyen melayan
(Mat. 20:20-28)
35Lajau Yakobus ngen Yohanes, anok-anok Zebedeus, ma'ok Yesus ngen madeak ngen Si, “Gu'au, keme minoi ko menea jano de keme minoi kunei ko!”
36Jawab-Ne ngen tobo'o, “Jano de udi kenlok Uku menea utuk udi?”
37Lajau nadeak tobo'o, “Nizin ba keme temot lem kemulioan-Nu be, de su'ang neak pak kanen-Nu ngen de su'ang neak pak kideu-Nu.”
38 #
Luk. 12:50
Tapi nadeak Yesus ngen tobo'o, “Udi coa namen jano de udi minoi. Jano dapet udi menem anggur de harus Uku menem ngen bakea babtis ngen usung derito de harus Uku temimo?”
39Tobo'o jenawab, “Keme dapet.” Yesus madeak ngen tobo'o, “Memang, udi bakea menem anggur de harus Uku menem ngen bakea babtis ngen musung derito de harus Uku temimo. 40Tapi hal temot neak depeak kanen-Ku atau neak depeak kideu-Ku, Uku coa ade hok meleine. Do'o bakea nelei ngen tun-tun utuk api do'o bi seniap.”
41Temi'uk o puluak murid de luyen jijai mengiak ngen Yakobus ngen Yohanes. 42#Luk. 22:25 Tapi Yesus menok tobo'o lajau madeak, “Udi namen, bahwo tobo'o de senbut pemeriteak bangso-bangso meriteak rakyatne ngen tangen besai, ngen paro pembesar-Ne bertindok kenlokne bae das tobo'o. 43#Mat. 23:11; Mrk. 9:35; Luk. 22:26 Coa ba awei yo neak antaro udi. Api lok jijai lai neak antaro udi, lok ba si jijai pelayan nu. 44Ngen api bae de lok jijai de pertamo neak antaro udi, lok ba si jijai pelayan utuk kutene. 45Kerno anok manusio kulo teko iso utuk nelayan, seluyen utuk melayan ngen utuk melei nyabaine jijai tebusan utuk dau tun.”
Yesus kema'en Bartimeus
(Mat. 20:29-34; Luk. 18:35-43)
46Lajau sapei ba Yesus ngen murid-Ne neak Yerikho. Ngen waktau Yesus keluea kunei Yerikho, besamo-samo ngen murid-murid-Ne ngen tun dau beroron, ade su'ang pengemis de sutai, genne Bartimeus, anok Timeus, temot neak pengger dalen. 47Waktau teni'ukne, bahwo do'o adeba Yesus tun Nazaret, muloiba si menggang, “Yesus, Anok Daud, Selenba ngen Uku!”
48Dau tun temgume supayo si diem. Tapi tambeak lek si menggang, “Anok Daud, selenba ngen uku!”
49Lajau Yesus bedan ngen madeak, “Menokba si!”
Tobo'o menok tun sutai'o ngen madeak ngen si, “Kenuetba ateinu, je ba, Si menok ko.”
50Lajau Si mukok jubahne, Si segro je ngen lalau magea Yesus.
51Tanye Yesus ngen si, “Jano de ko kemlok supayo Uku menea utuk nu?”
Jawab tun sutai'o, “Rabuni, supayo uku dapet ngeliak!”
52Lajau nadeak Yesus ngen si, “Lalauba, imennu bi semlamat ko!”
Pado waktau'o kulo ngeliak ba si, lajau si motoa Yesus lem pemaneu-Ne.
Currently Selected:
MARKUS 10: REJ
Highlight
Share
Copy
Want to have your highlights saved across all your devices? Sign up or sign in
@ LAI 2011 Indonesian Bible Society (Lembaga Alkitab Indonesia)
