MATIUS 16
16
Tun-tun Farisi ngen Saduki minoi Yesus menea mujizat
(Mrk. 8:11-13; Luk. 12:54-56)
1 #
Mat. 12:38; Luk. 11:16 Ade kekedau tun Farisi ngen tun Saduki teko ngen Yesus lok cemubo Si. Tobo'o minoi Yesus menea mujizat utuk temang amen benea Si teko kunei Allah. 2Yesus jemawab, [“Amen matai bilai gidong tebenem, udi madeak, ‘Cuaca baik kerno lengetne mile'ak.’ 3Ngen waktau bilai pueng, ‘Udi madeak bilai kidek, yo bakea ujen kerno lenget mileak ngen kelem.’ Rupo lenget ko namen udi nam meramea cuaco ngen kemliak lenget, udi coa nam meramea tando-tando zaman!”] 4#Mat. 12:39; Luk. 11:29 “Padeak jahatne ngen durhakone tun-tun zaman yo. Udi minoi Uku menea mujizat. Udi coa bakea nelei do mujizat kulo seluyen mujizat Nebai Yunus.”
Agai tun-tun Farisi ngen Saduki
(Mrk. 8:14-21)
5Waktau penotoa-penotoa Yesus sapei neak seb'ang daneu, tobo'o coa tinget mbin ruti. 6#Luk. 12:1 Yesus madeak ngen tobo'o, “Atei-ateiba teradep agai tun-tun Farisi ngen Saduki.”
7Temi'uk nadeak Yesus'o, penotoa-penotoa-Ne madeak suang ngen de luyen, “Si madeak aweio kerno ite coa mbin ruti.”
8Yesus namen jano de nadeak tobo'o. Jijai Yesus madeak, “Getai udi semoal tetang coa temuan ruti? Udi ku'ang pecayo! 9#Mat. 14:17-21 Udi ati ngertai? Ko coa tinget igai bakea lemo ruti de Uku megit utuk limo rebau tun? Ngen kedau bokoa ko kemopoa ruti de lebiak? 10#Mat. 15:34-38 Awei ipe kulo tujuak ruti de uku megit utuk pat ribau tun'o? Kedau bokoa ko kemopoa ruti de lebiak? 11Getai udi sapei coa ngertai amen Uku coa miling ngen udi tetang ruti? Atei-ateiba teradep agai tun Farisi ngen Saduki!”
12Akhirne penotoa-penotoa Yesus ngertai, kerno Yesus coa meluak tobo'o atei-atei teadep agai ruti, atei-atei teradep ajaran tun Farisi ngen Saduki.
Petrus ngakau Yesus adeba Rajo Penyelamat
(Mrk. 8:27-30; Luk. 9:18-21)
13Yesus lalau moi daerah pa'ok kota Kaisarea Pilipi, Si betanye ngen penotoa-penotoa-Ne, “Temurut nadeak tun, api Anok Manusio'o?”
14 #
Mat. 14:1-2; Mrk. 6:14-15; Luk. 9:7-8 Penotoa-penotoa-Ne jemawab, “Adeba de madeak Yohanes Pembaptis. Ade kulo de madeak Elia. De luyen madeak Yeremia atau saleak su'ang nebai.”
15“Tapi temurut udi, api Uku yo?” tanye Yesus ngen penotoa-penotoa-Ne.
16 #
Yoh. 6:68-69
Simon Petrus jemawab, “Bak adeba Rajo Penyelamat, Anok Allah De Idup.”
17Nadeak Yesus: “Butung sekilai ko Simon anok Yonah! Sebab Iso manusio de melei namen hal'o ngen ko tapi Bak-Ku de neak surgo. 18Sebab'o Uku madeak ngen ko, ko adeba Petrus, butau de kuet neak das lepek butau yo ba Uku bakea mbangun grija-Ku, de coa dapet maleiak dunio tun matei. 19#Mat. 18:18; Yoh. 20:23 Uku bakea melei ngen ko kucai kunei dunio belau temuan Allah. Jano de ko temgeak neak das bumai, kulo mbenea neak surgo. Ngen jano de ko mbenea neak das bumai, kulo temgeak neak das surgo.” 20Sesudo'o Yesus minget penotoa-penotoa-Ne utuk coa melei namen ngen api bae amen Siba Rajo Penyelamat.
Yesus miling tetang saro ngen kemateian-Ne
(Mrk. 8:31–9:1; Luk. 9:22-27)
21Muloi kunei saat'o Yesus madeak teteang ngen penotoa-penotoa-Ne, Si mestai lalau moi kota Yerusalem ngen temanggung dau saro kunei pemipin-pemipin, pemipin imem-imem ngen gu'au-gu'au agamo. Si bakea nunuak tapi pado bilai ketelau Si bakea idup igai.
22Lajau Petrus temarik Yesus moi saping ngen temgur Si, nadeakne, “Kirone Allah me'uak hal'o, Tuhan! Jibeak sapei hal'o tejijai ngen Tuhan!”
23Yesus kemliak Petrus ngen madeak, “Lalau kunei yo Iblis, koba temgeak Uku. Pekeran nu'o pekeran manusio, iso pekeran Allah!”
24 #
Mat. 10:38; Luk. 14:27 Sesudo'o Yesus madeak ngen penotoa-penotoa-Ne, “Api kulo de lok lalau temotoa Uku, mestai melupo kelokne dewek, musung ke au salib-Ne ngen temotoa Uku tiep waktau. 25#Mat. 10:39; Luk. 17:33; Yoh. 12:25 Sebab tun delok semlamat tema'en idupne, bakea kelnyep idupne. Tapi tun de rela kurban idupne utuk Uku bakea dapet idup. 26Jano utungne bagiak tun suang amen kute dunio yo ijai si de temuanne. Tapi si kelnyep idupne? Dapet coa idup'o tenukar ngen jano bae?
27 #
Mzm. 62:13; Mat. 25:31; Rm. 2:6 Coa an igai Anok manusio bakea serpok ngen malaikat-malaikat-Ne teko ngen kuaso Bak-Ne. Waktau'o Si bakea males tiep-tiep tun temurut plepne. 28Uku madeak ngen ko sebeneane kunei antaro udi neak yo ade de coa bakea matei, ayok kemliak Anok Manusio teko awei Rajo.”
Currently Selected:
MATIUS 16: REJ
Highlight
Share
Copy
Want to have your highlights saved across all your devices? Sign up or sign in
@ LAI 2011 Indonesian Bible Society (Lembaga Alkitab Indonesia)
