LUKAS 7
7
Yesus kema'en hamba suang perwira neak Kapernaum
(Mat. 8:5-13; Yoh. 4:46-53)
1Sesudo Yesus selsei miling neak adep tun dau, masukba Si moi Kapernaum. 2Neak di ade suang perwira de temuan suang hamba, de kembiak negone. Hamba o gidong bolon bea ngen gesea matei. 3Pado waktau perwira o temi'uk tetang Yesus, si meluak kekedau pemipin tun Yahudi lalau ngen Si utuk minoi supayo Si teko lajau kema'en hambane. 4Tobo'o teko ngen Yesus ngen kembiak tobo'o bekinoi tulung-Ne, nadeak si, “Si patut Ko temulung, 5sebab si mengasiak bangso ite ngen sudo mbangun umeak semyang utuk keme.”
6Lajau Yesus lalau sesamo ngen tobo'o. Waktau Si coa uak igai kunei umeak perwira o, perwira o meluak kekuatne utuk madeak ngen Si, “Tuan, jibeakba pepayeak, sebab uku coa patut temimo Tuan neak lem umeakku. 7Do'o sebabne uku suang coa binai madep Bak. Jijai nelei bae periteak supayo pelayan ku ka'en. 8Sebab uku kulo tunduk ngen periteak das ngen neak beak uku ade kulo prajurit-prajurit de harus tunduk pado periteak uku. Amen uku meluak suang prajurit, ‘Lalau!’ si kulo lalau; ngen amen uku madeak ngen de luyen, ‘Maro miyo’ si kulo teko. Ngen amen uku meriteak hamba uku, ‘Neaba dio!’ si kulo meneane.”
9Sesudo Yesus temi'uk padeak o, Si sele ngen si, ngen samo jemling ngen tun dau de temotoa Si, Si madeak, “Uku madeak ngen ko, imen dekelai yo coa perneak Uku temau, sekilai kulo neak antaro tun Israel!”
10Ngen sesudo tun-tun de neluak o belek moi umeak, hamba o sudo ka'en.
Yesus midup igai anok suang jando
11Sesudo'o Yesus lalau moi do kota de genne Nain. Murid-murid-Ne lalau sesamo ngen Si, ngen kulo tun dau semerto-Ne beroron. 12Sesudo Si pa'ok bang gerbang kota, ade tun matei nusung moi luea, anok semanei, anok tunggea indokne de sudo jando, ngen dau tun kunei kota o semerto jando o. 13Ngen ketiko Tuhan kemliak jando o, tegerokba atei-Ne ngen belas kasiak, lajau Si madeak ngen si, “Jibeak ngindoi!” 14Samo ma'ok usungan o Si megong, ngen gidong tobo pengusung bedan, Si madeak, “Hoi anok u'ai, Uku madeak ngen ko, klongonba!” 15Mako klongonba tun o ngen temot ngen muloi miling, ngen Yesus semreakne ngen indokne.
16Kute tun o saben ngen tobo'o mujai Allah, samo madeak, “Suang nebai lai bi timboa neak tengeak-tengeak ite, ngen Allah bi teko utuk semlamat umat-Ne!”
17Mako tesebeaba bito tetang Yesus neak kute Yudea ngen neak kute daerah rogokne.
Yesus ngen Yohanes Pembaptis
(Mat. 11:2-19)
18Ketiko Yohanes dapet bito tetang kute kejijai o kunei penotoa-penotoane, 19si menok duai tun kunei antarone ngen meluak tobo'o temnai ngen Tuhan Yesus, “Ko de bakea teko temurut janjai Allah atau keme harus mbot de luyen.”
20Ketiko keduai tun o sapei ngen Yesus, tobo'o madeak, “Yohanes Pembaptis meluak keme temnai ngen Ko: Ko de bakea teko o jano harus keme mbot suang de luyen?”
21Pado saat o Yesus kema'en dau tun kunei kute olon ngen derito ngen kunei roh-roh kidek, ngen Si melei karunio pengeliak ngen dau tun sutai. 22#Yes. 35:5-6, 61:1 Jijai Yesus jemawab, “Lalauba, ngen nadeakba ngen Yohanes jano de pasuak kemliak ngen ko temi'uk: Tun sutai kemliak, tun pakuak paneu, tun olon kidek jijai ka'en, tun seti'uk temi'uk, tun matei idup igai ngen tun peset nelei Bito Baik. 23Ngen bahagiaba tun de coa jijai keciwo ngen temuluk Uku.”
24Sesudo utusan-utusan Yohanes o lalau, Yesus muloi miling ngen tun dau o tetang Yohanes, nadeak-Ne, “Utuk jano ko lalau moi benei libea? Kemliak bulau de genuyang ibut bogoa moi miyo? 25Utuk jano ko lalau? Kemliak tun de makei bajau ba'es? Tun de makei bajau ba'es ngen idup kayo, penanne neak istana rajo. 26Jijai utuk jano ko lalau? Kemliak nebai? Benea, ngen Uku madeak ngen ko, lebiak kunei pado nebai. 27#Mal. 3:1 Kerno tetang si ade tetulis:
‘Keliakba,’
‘Uku meluak utusan-Ku demute Ko,
si bakea semiap dalen-Nu neak adep-Nu.’ ”
28Uku madeak ngen ko: “Neak antaro tobo'o de nelaher selawei coa ade suang kulo de lebiak lai kunei pado Yohanes Pembaptis, tapi de lebiak titik neak antaro umat Allah lebiak lai kunei padone.”
29 #
Mat. 21:32; Luk. 3:12 Kute tun dau de temi'uk padeak-Ne, temasuk tobo penagiak pajak, makau bahwo Allah benea, kerno tobo bi melei dirai dibaptis ngen Yohanes. 30Tapi tun-tun Farisi ngen gu'au-gu'au agamo temulok maksud Allah te'adep dirai tobo'o, kerno tobo'o coa lok dibaptis ngen Yohanes.
31Lajau Yesus miling igai, nadeak-Ne, “Ngen jano harus Uku banding tun-tun zaman yo? Awei jano tobo'o? 32Tobo'o awei anok-anok de temot neak peken; seklopok madeak ngen de luyen, ‘Keme temiup suling bagiaknu, tapi ko coa na'ai. Keme nyanyi legau ibo, tapi ko coa ngindoi.’ 33Kerno Yohanes Pembaptis teko, si coa mbuk ruti ngen coa menem anggur, ngen ko madeak: ‘Si pasuk semat!’ 34Sesudo'o Anok Manusio teko, Si mbuk ngen menem, ko madeak keliakba, ‘Si suang jelen ngen pemenem, kuat penagiak pajak ngen tun beduso.’ 35Tapi hikmat Allah de benea ngen kute tun de temimone.”
Yesus neak umeak Simon
36Suang Farisi mundang Yesus utuk teko mukmei neak umeakne. Yesus teko moi umeakne. Yesus teko moi umeak tun Farisi o, lajau temot mukmei. 37#Mat. 26:7; Mrk. 14:3; Yoh. 12:3 Neak kota o ade suang selawei de tekenal awei suang beduso. Ketiko selawei o temi'uk, bahwo Yesus gidong mukmei neak umeak tun Farisi o, tekoba si mbin debueak kaco pualam de isaine minyok um. 38Si je neak belakang Yesus pa'ok kekea-Ne ngen ngindoi samo meleceak kekea Yesus ngen bioa mataine. Sesudo'o kekea Yesus ken'ing ngen bukne lajau si semiumne ngen mpek minyok um moi kekea Yesus. 39Waktau tun Farisi de mundang Yesus kemliak hal o, si madeak lem atei, “Kekiro tun yo nebai, paset Si namen api selawei o de megong Si, ngen bahwo selawei o idup lem duso!”
40Lajau Yesus madeak ngen, “Simon, Uku lok madeak sesuaktau ngen ko.”
Jawab Simon, “Nadeakba, Gu'au.”
41“Ade duai tun de butang ngen suang tun de manok caci. De suang butang lemo otos caci pirok, ngen de suang igai lemo puluak caci pirok. 42Keduaine coa dapet masen utang o, mako utang tobo'o napusne. Api neak antaro keduai tun o bakea lebiak mengasiak tun de melei minjem caci o?”
43Jawab Simon, “Uku kiro tun de kembiak dau napus utangne!”
Jawab Yesus, “Pedapetnu benea.” 44Ngen samo jemling ngen selawei o, Si madeak ngen Simon, “Ko kemliak selawei yo? Uku masuk moi umeaknu, tapi ko coa melei Uku bioa utuk meleceak kekea-Ku, tapi si meleceak kekea-Ku ngen bioa matai ngen melapne ngen bukne. 45Ko coa semium Uku, tapi ayok Uku masuk si coa ade bedanne semium kekea-Ku. 46Ko coa mpek minyok neak ulau-Ku, tapi si mpek minyok moi kekea-Ku ngen minyok um. 47Sebab o Uku madeak ngen ko: Dusone de dau o bi napun, sebab si bi dau menea kasiak. Tapi tun de didik napun, didik kulo si menea kasiak.”
48Lajau Yesus madeak ngen selawei o, “Dusonu bi napun.”
49Tun-tun de temot mukmei sesamo Yesus bepeker lem atei tobo'o, “Api Si yo, sehinggo Si dapet mapun duso?”
50Tapi Yesus madeak ngen selawei o, “Imennu bi semlamat ko, lalauba ngen selamat!”
Currently Selected:
LUKAS 7: REJ
Highlight
Share
Copy
Want to have your highlights saved across all your devices? Sign up or sign in
@ LAI 2011 Indonesian Bible Society (Lembaga Alkitab Indonesia)
