LUKAS 1
1
Pendahuluan
1Teofilus de mulio,
Dau tun bi berusaho semusun bito tetang kejijai-kejijai de bi tejijai neak antaro ite. 2Tobo'o semapeine ngen ite. Tobo'o kunei semulo adeba saksai matai ngen pelayan Firman. 3Kerno o, sesudo uku semlidik kute kejijai o ngen benea kunei asal mulone, uku mok putusan utuk temulis debuak laporan de teratur utuknu. 4Supayo ko dapet melei namen bahwo kute sesuaktau de najea ngen ko sungguak benea.
Melei namen tetang laherne Yohanes Pembaptis
5 #
1Taw. 24:10
Pado zaman Herodes, rajo Yudea, ade suang imem de genne Zakharia kunei kelopok Abia. Ngenyanne kulo berasal kunei royot Harun, genne Elisabet. 6Keduaine idup benea ngen sepenuakne neak adep Allah ngen temurut kute periteak de tentep Tuhan. 7Tobo'o beduai coa temuan anok sebab Elisabet mandoa ngen keduaine bi tuai.
8Pado do bilai, waktau sapei giliak kelopokne, Zakharia menea tugasne sebagai imem neak adep Tuhan. 9Ketiko lotre, de sesuai ngen biasone utuk temtau imem de betugas, Zakharia ba de tenunjuk utuk masuk moi lem Umeak Tuhan. Si embem kemnyen. 10Pado waktau upacara embem kemnyen, kute umat bekopoa neak luea ngen semyang. 11Lajau ketenba ngen Zakharia suang malaikat Tuhan je neak depeak kanen mija penan embem kemnyen. 12Kemliak hal o si tekanjet ngen jijai saben. 13Tapi malaikat o madeak ngen si, “Jibeak saben, hoi Zakharia, sebab du'onu bi kenabul. Elisabet, ngenyannu, bakea melaher suang anok semanei ngen arusba ko tem gen si Yohanes. 14Ko bakea kembiak senang ngen dau tun bakea beriang amen anok o laher konyo. 15#Bil. 6:3 Sebab si bakea lai neak adep Tuhan ngen si coa bakea menem anggur-anggur ngen menem de luyen ngen si bakea penuak ngen Roh Sucai ayok kunei kandungan makne ngen. 16Si bakea menea dau tun Israel bebelek ngen Tuhan, Allah tobo'o. 17#Mal. 4:5-6 Si bakea paneu demute Tuhan lem roh ngen kuaso awei Elia. Si bakea menea atei bapa-bapa bebelek ngen anok-anokne ngen atei tun-tun durhako ngen pekeran tun-tun benea. Ngen awei si semiap bagiak Tuhan do umat de patut bagiak-Ne.” 18Lajau nadeak Zakharia ngen malaikat o, “Awei ipe uku namen, bahwo hal o bakea tejijai? Sebab uku sudo tuai ngen ngenyanku kulo sudo tuai.” 19#Dan. 8:16, 9:21 Jawab malaikat o ngen si, “Ukuba Gabriel de melayan Allah ngen uku bi nutus utuk miling ngen ko ngen utuk semapei Bito Baik yo ngen ko. 20Sesungguakne ko bakea jijai bisau ngen coa dapet miling sapei bilai ketiko kutene yo tejijai, kerno ko coa masai ngen kecekku de bakea nuak pado waktaune.”
21Sementaro o tun dau mbot Zakharia. Tobo'o jijai sele, bahwo si kembiak an ade lem Umeak Tuhan. 22Ketiko si keluea, si coa dapet miling ngen tobo'o ngen ngertaiba tobo'o, bahwo si bi kemliak do pengeliak neak lem Umeak Tuhan.
23Lajau Zakharia melei tando ngen tobo'o, sebab si tep bisau. Ketiko selsei maso pelayananne, si belek moi umeak. 24Kekedau an sesudo'o Elisabet, ngenyanne, tenei lai ngen selamo lemo bulen si coa kemten dirai. 25Nadeakne: “Dioba do plep Tuhan bagiakku. Uyo Si lok mapus aibku neak muko tun.”
Melei namen tetang laherne Yesus
26Lem bulen ke num Allah meluak malaikat Gabriel lalau moi de buak kota neak Galilea de genne Nazaret. 27#Mat. 1:18 Si tenmau suang semulen de genne Maria. Semulen o betunang ngen Yusuf kunei keluargo Daud. 28Ketiko malaikat o masuk moi umeak Maria, si madeak, “Salam, hoi ko de nelei karunia, Tuhan semerto ko.”
29Maria tekanjet temi'uk padeak o, lajau temnai neak lem ateine, jano tai salam o. 30Malaikat o madeak ngen si, “Jibeak saben, hoi Maria, sebab ko dapet kasiak karunia neak adep Allah. 31#Mat. 1:21 Sesungguakne ko bakea kemandung ngen bakea melaher suang anok semanei ngen ko temgen Si Yesus. 32#2Sam. 7:12, 13, 16; Yes. 9:6 Si bakea jijai lai ngen bakea senbut Anok Allah De Kembiak lekat. Tuhan Allah bakea jemijai Si rajo awei Rajo Daud, ninik puyang-Ne. 33Si bakea meriteak awei rajo das royot Yakub sekean-keanne. Kerajaan-Ne coa bakea abis.”
34Nadeak Maria ngen malaikat o, “Awei ipe hal o mukin tejijai, kerno uku ati temuan sematen?”
35Jawab malaikat o ngen si, “Roh Sucai bakea tu'un das ko ngen kuaso Allah De Kembiak lekat bakea melindung ko; sebab o anok de bakea ko melaher o bakea senbut Sucai, Anok Allah. 36Sesungguakne: Elisabet, sanoknu o, uyo yo gidong ngandung num bulen. Si kemandung suang anok semanei kunyau bi tuai ngen mandoa. 37#Kej. 18:14 Sebab bagiak Allah coa ade de mustahil.”
38Nadeak Maria, “Sesungguakne uku yo adeba hamba Tuhan; jijaiba padoku temurut padeaknu o.” Lajau malaikat o teminggea Maria.
Maria ngen Elisabet
39Kekedau waktau sesudo'o berakatba Maria ngen langsung paneu moi tebo temujau debuak kota neak Yudea. 40Si masuk moi umeak Zakharia melei salam ngen Elisabet. 41Ketiko Elisabet temi'uk salam Maria, anok neak lem kandungan Elisabet o begerok. Mako Elisabet kenuaso Roh Allah, 42lajau madeak, “Kunei kute selawei ko ba de lebiak temimo berkat. Awei o kulo ngen kandungannu. 43Api uku sapei indok Tuhan teko ngen uku? 44Ketiko uku temi'uk salam nu, anok lem kandunganku begerok riang. 45Bahagia ba ko, kerno masai jano de nadeak Tuhan ngen ko o, bakea tejijai!”
Maria mucep syukur
46 #
1Sam. 2:1-10
Lajau nadeak Maria:
“Jiwoku mujai Tuhan,
47ngen ateiku beriang,
kerno Allah Juruselamatku.
48 #
1Sam. 1:11
Sebab Si bi kemliak hamba-Ne de hino!
Sesungguakne, muloi kunei uyo kute bangso
madeak uku bahagia.
49Kerno Allah De Kembiak Kuaso
menea hal-hal lai ngen uku.
Sucaiba gen-Ne.
50Rahmat-Ne tu'un-temu'un
das tun de saben ngen Tuhan.
51Si kemten Kuaso-Ne ngen tangen-Ne
de kuet ngen cem'ei tun de ombong,
ngen kemacau rencano tobo'o.
52 #
Ayb. 5:11, 12:19 Si temu'un tun-tun de bekuaso kunei penanne
ngen melkat tun-tun de tembeak.
53Si melei kute de baik ngen tun de nyemen ngen meluak,
tun de kayo lalau ngen tangen kosong.
54Si temulung Israel, hamba-Ne,
karno si minget rahmat-Ne.
55 #
Kej. 17:7
Awei de jenanjai-Ne,
ngen ninik puyang te, ngen Abraham
ngen royotne utuk selamo-lamone.”
56Maria tinggea kekiro telau bulen ke'anne besamo ngen Elisabet, lajau belek igai moi umeakne.
Laherne Yohanes Pembaptis
57Sapeiba waktaune bagiak Elisabet utuk melaher. Si melaher suang anok semanei. 58Tetanggo-tetanggone serto pepasuakne temi'uk bahwo Tuhan bi temunjuk rahmat-Ne de kembiak lai ngen Elisabet. Tobo'o besuko cito besamo-samo ngen si.
59 #
Im. 12:3
Ketiko cupik o be'omor dlapen bilai, tobo'o mbinne utuk senunat. Lajau tobo'o lok meleine gen Zakharia awei gen bakne. 60Tapi makne madeak, “Jibeak, si arus nelei gen Yohanes.”
61Nadeak tobo'o ngen si, “Coa ade neak antaro pepasuaknu de genne awei yo.” 62Lajau tobo'o melei tando ngen bakne utuk temnai gen jano de lok nelei ngen anokne o.
63Zakharia minoi butau tulis, lajau temulis kecek-kecek yo, “Genne adeba Yohanes.” Kute tobo'o sele. 64Pado waktau o kulo Zakharia nam miling igai ngen memujai Allah. 65Tetanggo-tetanggone kute saben. Bito o tesebea moi kute daerah neak tebo Yudea. 66Kute tun de temi'uk hal o temnai lem atei, “Anok yo konyo jijai jano?” Sebab tangen Tuhan semerto si.
Zakharia semapei bito kunei Tuhan
67Zakhria, tiakne, penuak ngen Roh Sucai sehinggo semapei pesen kunei Tuhan. Si madeak:
68“Maro ite memujai Tuhan,
Allah Israel!
Si bi teko temulung umat-Ne
ngen mbebas tobo'o.
69Si melei ite penyelamat de kuet,
royot Daud hamba-Ne o.
70– De mena'o liwet nebai-nebai piliak-Ne,
Tuhan bi melei janjai-Ne –
71utuk melpas ite kunei musuak-musuak ite
ngen kunei tangen kute tun de jemngik ite.
72Utuk temunjuk rahmat-Ne ngen ninik puyang ite,
ngen minget janjai-Ne de Sucai.
73Si besupeak ngen Abraham bak te,
Si melei rahmat ngen ite,
74supayo ite, lepas kunei tangen musuak,
supayo ite dapet semyang ngen-Si coa saben,
75lem sucai ngen benea neak adep Si
somor idup te.
76 #
Mal. 3:1
Ngen ko, hoi anokku, bakea senbut nebai Allah De Kembiak Lekat.
Kerno ko bakea paneu demno Tuhan
utuk semiap dalen utuk Si,
77utuk melei namen ngen umat-Ne tobo'o bakea senlamat,
amen Allah sudo mapun duso-duso tobo'o.
78Tuhan ite baik atei ngen penyayang;
Si teko utuk semlamat ite.
Awei Matai bilai pueng
kunei penan de lekat,
79 #
Yes. 9:1
awei yo ba Si melei te'ang-Ne ngen kute tun
de idup neak lem kelem ngen saben.
Si mipin ite moi dalen
damoi sejahtera.”
80Anok Zakharia o betambeak lai ngen betambeak kuet rohne. Si tinggea neak benei libea, sapei waktaune si kemten diraine ngen bangso Israel.
Currently Selected:
LUKAS 1: REJ
Highlight
Share
Copy
Want to have your highlights saved across all your devices? Sign up or sign in
@ LAI 2011 Indonesian Bible Society (Lembaga Alkitab Indonesia)
