KISAH RASUL-RASUL 15

Sidang neak Yerusalem

1 # Im. 12:3 Kekedau tun teko kunei Yudea moi antiokhia ngen majea ngen tun-tun pecayo neak di, “Amen udi coa senunat temurut adat istiadat hukum Musa, udi coa dapet senlamat.” 2Tapi Paulus ngen Barnabas temtang melawen pendapet tobo'o. Akherne tentep, supayo Paulus ngen Barnabas serto kekedau tun luyen kunei jemaat o lalau ngen rasul-rasul ngen pemipin-pemipin neak Yerusalem utuk madeak hal o.

3Tobo'o nembes ngen jemaat sapei moi luea kota, lajau tobo'o paneu liwet Fenisia ngen Samaria, cemrito tetang pertobatan tun-tun iso Yahudi. Hal o kembiak semnang atei tun-tun de pecayo neak di. 4Sapeine neak Yerusalem tobo'o senambut ngen jemaat, rasul-rasul ngen pemipin-pemipin, lajau tobo'o cemrito kute seseuaktau de Allah menea liwet tobo'o. 5Tapi kekedau tun kunei aliran Farisi, de sudo jijai pecayo, je ngen madeak, “Tun-tun iso Yahudi harus senunat ngen wajib utuk temurut hukum Musa.”

6Lajau sidangba rasul-rasul ngen pemipin-pemipin utuk berunding hal o. 7#Kis. 10:1-43 Sesudo bedebat kekedau anne, jeba Petrus, madeak ngen tobo'o, “Hoi pasuak-pasuak, udi namen bahwo sejok pertamo Allah miliak uku kunei antaro udi, supayo liwet uku bangso-bangso luyen temi'uk Bito Baik ngen jijai pecayo. 8#Kis. 2:4, 10:44 Allah, de kemnal atei manusio, melei saksai utuk tobo'o ngen melei karunio Roh Sucai ngen tobo'o serai awei ngen ite. 9Allah samo sekilai coa mbeda antaro ite ngen tobo'o, sesudo Si semucai atei tobo'o ngen imen. 10Amen awei o, getai udi lok cemubo Allah ngen mpek moi das bau penotoa-penotoa o kewajiban de benek, baik ngen ninik puyang te atau ite su'ang? 11Sebelekne, ite pecayo bahwo liwet anugrah Tuhan Yesus Kristus ite bakea senlamat serai awei tobo'o kulo.”

12Lajau diemba kute umat o, lajau tobo'o temi'uk Paulus ngen Barnabas cemrito kute tando ngen mujizat de nea Allah ngen perantaro tobo'o neak antaro bangso-bangso luyen. 13Sesudo Paulus ngen Barnabas selesei miling, Yakobus madeak, “Hoi pasuak-pasuak, teni'ukba uku: 14Simon bi cemrito bahwo pado mulone Allah temunjuk rahmat-Ne ngen bangso-bangso luyen, miliak suaktau umat kunei antaro tobo'o bagiak gen-Ne. 15Hal o sesuoi ngen kecek-kecek paro nebai awei de tetulis:

16 # Am. 9:11-12 ‘Sesudo'o Uku bakea belek igai

ngen temgok igai umeak Daud de sudo ubuak,

ngen menea igai umeak de ubuak'o

ngen bakea Uku temgokne igai.

17Supayo kute tun luyen mesoa Tuhan

ngen kute bangso de dasne, gen-Ku senbut.

Awei'oba firman Tuhan de menea kutene yo,

18de sudo namen sejok semulo.’

19Sebab'o Uku bependapet bahwo ite coa buliak menea kesaro bagiak tobo'o kunei bangso-bangso luyen de belek ngen Allah. 20#Kel. 34:15-17; Im. 17:10-16, 18:6-23 Tapi ite harus temulis su'et ngen tobo'o, supayo tobo'o meu'ak dirai kunei kembuk de sudo nelei ngen berhala-berhala, kunei percabulan, kunei daging benatang de matei ncit ngen kunei daleak. 21Sebab sejok zaman mena'o hukum Musa nelei namen neak tiep-tiep kota, ngen sapei uyo hukum'o mbaco tiep-tiep bilai Sabat neak umeak-umeak semyang.”

Jawaban ngen Antiokhia

22Sesudo'o rasul-rasul ngen pemipin-pemipin serto kute jemaat o mok keputusan utuk miliak kunei antaro tobo'o kekedau tun de bakea nutus moi Antiokhia besamo-samo Paulus ngen Barnabas, adeba Yudas de senbut Barsabas ngen Silas. Keduaine adeba tun tepandang neak antaro tun-tun de pecayo. 23Ngen tobo'o senreak su'et de sa'eine, “Salam kunei rasul-rasul ngen pemipin-pemipin, kunei pasuak-pasuaknu ngen pasuak-pasuak neak Antiokhia, Siria ngen Kilikia de asal kunei bangso-bangso luyen. 24Keme bi temi'uk bahwo ade kekedau tun neak antaro keme, de coa dapet pesen kunei keme, bi menea keme liseak ngen menea keme bingung ngen ajaran tobo'o. 25Kerno o ngen bulet atei keme bi berunding utuk miliak ngen mutus kekedau tun ngen udi besamo-samo Barnabas ngen Paulus de keme kasiak. 26Duai tun de bi melei nyabaine kerno gen Tuhan ite Yesus Kristus. 27Jijai, keme bi mutus Yudas ngen Silas de seca'o lisan bakea semapei suang hal-hal yo ngen udi. 28Kerno adeba keputusan Roh Sucai ngen keputusan keme, supayo ngen udi jibeak tenanggung lebiak dau ban kunei pado de perlu yo: 29Udi harus me'uak dirai kunei kembuk de senembeak ngen berhala, kunei daleak, kunei daging benatang de matei ncit ngen kunei percabulan. Amen udi jemago dirai teadep hal-hal yo, udi menea baik. Sapei piyoba, selamat.”

30Sesudo pamit, Yudas ngen Silas berakat moi Antiokhia. Neak di tobo'o menok kute jemaat bekopoa, lajau semreak su'et o ngen tobo'o. 31Sesudo mbaco su'et o, jemaat riang nien kerno si'ing su'et o de melei penghiburan. 32Yudas ngen Silas, de adeba kulo nebai, dau melei penghiburan ngen pasuak-pasuak de pecayo o ngen kemu'et atei tobo'o. 33Sesudo kekedau anne Yudas ngen Silas tinggea neak di, pasuak-pasuak o mpas tobo'o lem damoi utuk belek ngen tobo'o de mutusne. [ 34Tapi Silas Melei keputusan utuk tinggea neak di.]

35Paulus ngen Barnabas tinggea kekedau an neak Antiokhia. Tobo'o besamo-samo ngen dau tun luyen majea ngen melei namen firman Tuhan.

Barnabas ngen Saulus bece'i

36Paulus madeak ngen Barnabas, “Baikba ite belek ngen pasuak-pasuak ite neak tiep kota, neak ipe ite bi melei namen firman Tuhan, utuk kemliak, awei ipe keadaan tobo'o.” 37Barnabas lok mbin kulo Yohanes de senbut Markus; 38#Kis. 13:13 tapi Paulus madeak ngen tegas bahwo coa baik mbin serto tun de sudo teminggea tobo'o neak Pamfilia ngen coa lok milau kerjo besamo-samo tobo'o. 39Hal o jijai tekea, sehinggo tobo'o pisah, Barnabas mbin Markus kulo belayea moi Siprus. 40Tapi Paulus miliak Silas, sesudo senreak ngen pasuak-pasuak de pecayo o ngen anugrah Tuhan. 41Berakatba si kemliling Siria ngen Kilikia samo kemu'et jemaat-jemaat neak di.

Currently Selected:

KISAH RASUL-RASUL 15: REJ

Highlight

Copy