KISAH RASUL-RASUL 1

1 # Luk. 1:1-4 Hoi Teofilus,

Lem bukauku dedute uku temulis tetang kutene de nea ngen majea Yesus, 2sapei waktau bilai Si naket moi Surgo. Ayok o Si bi melei periteak-Ne liwet Roh Sucai ngen rasul-rasul de miliak-Ne. 3Sesudo Si matei, selamo pat puluak bilai Si cet kemten dirai ngen ca'o tete'ang ngen rasul-rasul o bahwo Si benea-benea idup. Tobo'o kemliak Si, Si miling ngen tobo'o awei ipe Allah meriteak awei Rajo.

4 # Luk. 24:49 Pado waktau o Si bekopoa sesamo tobo'o, Si melei periteak yo ngen tobo'o, “Jibeak lalau kunei Yerusalem, ngen meluak tobo'o tinggea neak di mbot janjai Bapa, de awei de nadeak-Ne, sudo udi temi'uk kunei Uku. 5#Mat. 3:11; Mrk. 1:8; Luk. 3:16; Yoh. 1:33 Sebab Yohanes membaptis ngen bioa, tapi coa an igai udi bakea neak baptis ngen Roh Sucai.”

Yesus taket moi surgo

6Waktau bekopoa, rasul-rasul betanye ngen Si, “Tuhan, jano uyo Tuhan lok temgok igai pemeriteak bangso Israel?” 7Jawab Yesus ngen tobo'o, “Ko coa perlu namen maso ngen waktau de tentep Bapa suang temurut kuaso-Ne. 8#Mat. 28:19; Mrk. 16:15; Luk. 24:47-48 Tapi udi bakea temimo kuaso amen Roh Sucai tu'un ngen udi, udi bakea jijai saksai-saksai-Ku neak Yerusalem ngen neak kute Yudea ngen Samaria sapei moi ujung bumai.”

9 # Mrk. 16:19; Luk. 24:50-51 Sesudo Si madeak awei yo, Si taket moi surgo neak adep matai tobo'o, mbun temutup Si kunei pandangan tobo'o.

10Waktau tobo'o gidong nanggeak moi lenget, waktau Yesus taket, seketiko o je ba duai tun de makei keracokputiak neak pa'ok tobo'o. 11Duai tun'o madeak ngen tobo'o, “Hoi tun-tun Galilea, getai udi je nanggeak moi lenget? Yesus yo, de taket moi surgo teminggea udi, bakea teko igai ngen ca'o de serai awei udi kemliak Si kenek moi surgo.”

Matias niliak gitei Yudas

12Lajau belekba rasul-rasul o moi Yerusalem kunei tebo de senbut Tebo Zaitun, kekiro dekilo uakne kunei Yerusalem. 13#Mat. 10:2-4; Mrk. 3:16-19; Luk. 6:14-16 Sesudo tobo'o masuk moi kota, kenekba tobo'o moi ruang das penan tobo'o nupang. Tobo'o adeba Petrus ngen Yohanes, Yakobus ngen Andreas, Filipus ngen tomas, Bartolomeus ngen Matius, Yakobus anok Alfeus, ngen Simon tun Zelot ngen Yudas anok Yakobus. 14Tobo'o kutene tekun ngen do atei lem du'o sesamo. Kekedau selawei serto Maria, indok Yesus ngen pasuak Yesus bedu'o sesamo tobo'o.

15Sewaktau bilai o je ba Petrus neak tengeak-tengeak tun-tun do imen gidong bekopoa o, kekiro sotos duai puluak tun dau ne, lajau madeak, 16“Hoi tun-tun, arusba tejijai ayat Kiteb Sucai, de senapei dute Roh Sucai liwet Daud tetang Yudas, pimipin tun-tun de temakep Yesus. 17Bel o si temasuk saleak suang kunei keme ngen mok pagiak neak lem pelayanan yo.”

( 18#Mat. 27:3-8 Yudas yo bi dapet debidang taneak kunei upeak kidekne, lajau si us telukup, ngen teneine pegit sehinggo kute si'ing teneine keluea. 19Hal o kute tun neak Yerusalem bi namen, sehinggo taneak o tobo'o senbut lem bahaso tobo'o suang ‘Hakal Dama,’ taine ‘Taneak Daleak’.)

20 # Mzm. 69:26, 109:8 “Sebab ade tetulis lem kiteb Mazmur:

‘Kunyauba penan tinggeane jijai sunyai,

ngen kunyauba coa ade suang tun neak lem ne.’

Ngen:

‘Kunyauba jabatanne nemok tun luyen.’

21Jijai, arus ade tun luyen igai de milau ngen keme de gemitei Yudas. Tun'o adeba tun de bogoa teko bekopoa ngen keme selamo Tuhan Yesus sesamo ngen keme, 22#Mat. 3:16; Mrk. 1:9, 16:19; Luk. 3:21, 24:51 adeba muloi kunei baptisan Yohanes sapei bilai Yesus taket moi surgo teminggea keme, utuk jijai saksai ngen keme tetang Si idup igai.”

23Lajau tobo'o musul duai tun: Yusuf de senbut Barsabas kulo de senbut Yustus, ngen Matias. 24Tobo'o kute bedu'o ngen madeak, “Au Tuhan, Ko ba de namen atei kute tun, tunjukba kirone api de ko bi niliak kunei keduai tun yo, 25utuk temimo jabatan pelayan de teninggea Yudas de bi us moi penan de wajar bagiakne.” 26Lajau tobo'o muang undian utuk keduai tun o ngen de dapet undian adeba Matias. Ngen awei yo si jijai rasul besamo awei kesebelas rasul o.

Currently Selected:

KISAH RASUL-RASUL 1: REJ

Highlight

Copy