MARIKO 1

Lilwaza lia Yohana Mubatizi

(Mat. 3:1-12; Luk. 3:1-18; Yoh. 1:19-28)

1Yaga na makuva malahi ga Yeso Kristo, Mwana wa Nyasaye.

2Yaatanga kuli gang'odwa mu kitabu chu muporofeti Isaya:

“Nyasaye yavoola, ‘Henza, ndatuma mutumwa wange Imbiri woovo;

naye aletegekiza inzira yooyo.’

3Umwoyo gwu mundu mulala guhanzukaa mwigendanyama.

‘Mwetegekize inzira yu Mwami,

Lungikizi zinzira zizie.’ ”

4Yohana Mubatizi yaloleka mwigendanyama, nabatizaa kandi niyilwaza. Yavavolera, “Mwiganiri kandi mubatizwi, Nyasaye aduuki kumusamiiha uvwoni vwinyu.” 5Avandu vanyingi vaatura mu kivala choosi chi Vuyuda nu mu lidaala linene lia Jerusalemi nivazia kuhulira aga Yohana yavoola. Viyama uvwoni vwavo kuye, naye yaavabatiza mu Mugera gwa Jorodani.

6Yohana yiviika zinguvu zianavwa ku vwoya vwi ing'amia, niyevoha musibi gwe kesero mu kekenge chiche. Ichukulia chiche chaali izisigi nu vwuki vwu mumulitu. 7Naye yilwaazira avandu navoora, “Mundu uzaa inyima wange, aveeye ni zinguru kuvita inzi. Inzi sindukana kwinama nokovoholola ivilato vivie mba. 8Inzi mbatizaa munyi na mazi, navuzwa oyo alamubatiza na Roho Mutakatifu.”

Libatizwa ni ligerizwa lia Yeso

(Mat. 3:13—4:11; Luk. 3:21-22; 4:1-13)

9Mu madiku yago, Yeso yaza kutura Nazareti, mu kivala cha Galilaya, na Yohana yaamubatiza mu Mugera gwa Jorodani. 10Lwa Yeso yatura mu mazi, nonoho yalora iligulu ni ligulwa, ma Roho yika kuye kuli ilikuulu. 11Umwoyo gwatura mwigulu nigovoora, “Ivi oveeye Mwana wange umuyanze, nyanzizwaa niiviligali.”

12Nonoho, Roho yamuhira mwigendanyama; 13naye yaali mwigendanyama ku lwa madiku arubaini, Setani namugerizaa. Yaali harara nizinyama ziu mu vulimu, navuzwa zingelosi vaza nivamutumikira.

Yeso yalanga avaluvi vane

(Mat. 4:12-22; Luk. 4:14-15; 5:1-11)

14Kunangwa, lwa Yohana yaali namali kovofwa mu vuhambe, Yeso yazia Galilaya ni yilwaza Ivangeri ya Nyasaye. 15Yavoola, “Ing'inga indahi iduuki, nu Uvwami vwa Nyasaye voveeye ahimbi! Mwiganiri kandi musuuviri Ivangeri.”

16Lwa yaali navitaa ku lujinga lwi inyanza ya Galilaya, yalora avaluvi vaviri, Simoni na Andereya amwavo weve, ni valuvaa izisuzi munyanza. 17Yeso yavavolera, “Nondi, nainzi ndamukora mugwi avaluvi va vandu.” 18Nonoho valeka imiluvu jaavo ni va mulonda.

19Lwa yisunda hambiri hakekeke, yalora Yakobo na Yohana amwavo weve, avayaayi va Zebedayo. Navo kandi vaali mu liato liavo ni vanavaamu imiluvu jaavo jaali nijatanduka. 20Lwa Yeso yavalola, yavalanga; valeka baba wavo Zebedayo harara na vayinziri vatungwa mu liato, ni vamulonda.

Umundu waali ni Lidemoni

(Luk. 4:31-37)

21Yeso harara na aviigi veve vazia Kaperinaumi na lwi Lisabato liaduuka, Yeso yingira mulisinagogi ni yigiza. 22Avandu vosi avamuhuliriza vagenya ku amigizu geege kigira si yigiza kuli avigizi vaavo vi Lilaga mba; oyo yigiza nu vunyali.

23Nonoho, umundu waali ni lidemoni yaza mu lisinagogi liavo nakuba lukwiri navoora,

24“Ukwenya ki, Yeso wa Nazareti? Wenyaa kukudiviza? Inzi ngumanyi vulahi vwene. Ivi oveeye mutumwa mutakatifu wa Nyasaye!”

25Navuzwa Yeso yamugondokera namuvolera, “Kiring'ana, kandi utuli mu mundu uyu!”

26Ilidemoni zana liamusang'usula vudinyu, nilikuba ulukwiri olonene, ma nilitura muye. 27Avandu vosi vagenya ligali. Vateevana aveene naveene nivavoora, “Kindiki yiki? Ni amigizu amahia! Umundu uyu aveeye ni zinguru ku mademoni, kali kuduuka gamuhulira!”

28Na ndio ulusuma lwi ilizominywa lia Yeso lwalanda vwangu havundu hoosi ahaali ahimbi ni kivala cha Galilaya.

Yeso yahonyia avandu avanyingi

(Mat. 8:14-17; Luk. 4:38-41)

29Lwa vaatura mu lisinagogi, Yeso, Yakobo na Yohana vingira munyumba ya Simoni na Andereya. 30Navizara Simoni yaali naagoni na alwalaa olodegera. Nonoho lwa Yeso yaduuka vamuvolera amakuva gene yaga nonoho. 31Yeso yazia namugumira umukono, naamuvukiza. Yahona kutura mu lodegera, kandi yavadenda.

32Lwi iliuva liayera, valetera Yeso avalwaye vosi, harara na vaali na mademoni. 33Avandu vosi avi lidaala yilio vavunga imbiri winyumba yeyo. 34Yeso yahonyia avalwaye avanyingi avi zinguzu lugano lugano kandi nakunga amademoni amanyingi. Yagaya amademoni gatamoloma mba, kigira gaali nigamumanya.

Yeso yilwaza mu Galilaya

(Luk. 4:42-44)

35Yeso yavuka mugambazuri chova nikikiri imwamu, natura munyumba. Yatura ichova wi lidaala nazia havundu ha avandu vaali nivataveeye nasalira ho. 36Navuzwa Simoni na valina veve vazia kumwenya, 37lwa vamunyoola, vamuvolera, “Avandu vosi vakwenyaa.”

38Navuzwa Yeso yavavolera, “Gendi kuzie mu madaala gaveeye ahimbi hano. Kuduuka nzilwaze mugo kandi, kigira yiki nicho kivuni chagira ninziza.”

39Kunangwa Yeso yagenda mu Galilaya mwosi, ni yilwaza mu masinagogi gaavo, kandi nakunga amademoni.

Yeso yahonyia umugere

(Mat. 8:1-4; Luk. 5:12-16)

40Umundu mulala uwalwalaa ovogere yaza ku Yeso, nasigama namugoonya amukonye. Yavoola “Niiva ganyalika unyala kundakasa!”

41Yeso yiizurwa novovereri, nanyiira umukono namudiira, namuvolera, “Nyenya utakaswe!” 42Nonoho ovogere vwatula kuye, naahona. 43Maku Yeso yaamwiganihiza vululu navoora, “Hulira, utavoolera umundu kali mulala amakuva yaga mba. 44Navuzwa tula vwangu uzie vulungi ku musaalisi na oleke akohenzerize; ahene yaho alamanyia avandu ndi ivi umali kohonywa ligali, gakuduukiraa uhaane lisiuviliru lia Musa yalaga.” 45Navuzwa umundu oyo yazia na atangaa kulandiza havundu hoosi. Yamoloma kigira ilihonywa lilie, kali Yeso yaali anyala kwingira mu lidaala liosi havulavu mba. Nitali yamenya ichova wi lidaala aha vandu vatali, na avandu vaza kuye kutura mu zimbega ziosi.

Currently Selected:

MARIKO 1: LOGOOLI

Highlight

Copy