LUKA 20

Amateeva kigira vunyali vwa Yeso

(Mat. 21:23-27; Mar. 11:27-33)

1Lidiku lilala, lwa Yeso yaali ni yigizaa avandu mu Litembeli kandi niyilwaza Ivangeri, avasaalisi vanene, na avigizi vi Lilaga harara na vakulundu vaza kuye. 2Ni vamuteeva, “Kovolere; okolaa vindu yivi na vunyali ki? Anoho, nivwaha wakuha vunyali yivu?”

3Yeso yativura navavoolera, “Inzi ndamuteva liteeva kandi, na munyi mumbolere: 4Libatiza lia Yohana, liatura ku Nyasaye anoho liatura ku avandu?”

5Vateevana aveene ku liteeva yilio nivavoora kovoolaki? “Ni kovora, ‘Liatura mwigulu ku Nyasaye’ alakoteeva, ‘Kigira ki munyi si mwasuuvira Yohana?’ 6Navuzwa nikovoola, ‘Liatura ku avandu,’ avandu vosi valakulasa magina; kigira vosi vasuuvira ndi Yohana yaali muporofeti.” 7Kunangwa vaativura nivavoora, “Sikukumanyi wa liatura mba.”

8Yeso yavavolera, “Inzi kandi sindamuvolera ni ku vunyali ki vwa ngolera mu vindu yivi, mba.”

Lugano lwu mulimi gwi kizabibu na avalimi vadamanu

(Mat. 21:33-46; Mar. 12:1-12)

9Maku Yeso yavolera avandu lugano yilu, “Yaali ho mundu wasimika kizabibu, naha avalimi vamulindili, maku yatura hango nazia ihale mu kivala kindi ku ing'inga indambi. 10Lwi ing'inga yi livuna yaduuka, yatuma mutumikiri weve ku avalimi yavo vamuhe ku makuyu gi kizabibu. Navuzwa avalimi yavo vamukuya, nivamukunga umwere vugira kedonye chiche cha makuyu gi kizabibu. 11Yatuma kandi mutumikiri wundi. Navuzwa mwene oyo kandi vamukuya nivamukolera agi zisoni, ma nivamukunga makono mele.

12“Yatuma kandi mutumikiri wakavaga, kandi avalimi yavo, vamwata zing'oma ni vamukungi ichova. 13Mwami mwene kizabibu yaganagana mwene navoora, ‘Ngola ki? Ndatuma mwana wange mwene uwandayaanza, mbula valamutia.’ 14Navuzwa lwa avalimi yavo vamulola, vavolerana aveene naveene, nivavoora ‘Uyu niyie mwana wu mwene kizabibu ulilia miandu jije. Gendi kumwiti na imiandu jilava jietu.’ 15Kunangwa vamukunga ichova wikizabibu nivamwita.

“Kunangwa Mwami mwene kizabibu, alakola ki ku avalimi vadamanu yavo.”

16“Alaza kandi aliita avalimi yava, nukuhaana kizabibu ku avalimi vandi.”

Lwa avandu vahulira yaga, vavoola, “Yaga gatava ndio mba.”

17Yeso yavuumika ma navateeva, “Amang'oda yaga gang'odwa ku kivuni ki?

‘Ligina liavumbaki vasuura kalunu likoleywe

kuva ligina linene ligali liu musingi.’

18Mundu woosi ugwa ku ligina yilio alavunanywa mu vidonye, navuzwa uyu wi ligina yili ligwira limuduvulanya agwi luguchi.”

Liteeva kigira litunga vusuuru ku Kaisari

(Mat. 22:15-22; Mar. 12:13-17)

19Avigizi vi lilaga na vasaalisi vanene venya kumugumira ulwene yilwo, kigira vamanya Yeso yavavolera lugano yilu, navuzwa vaatia avandu. 20Kunangwa venyeleriza vwiyangu vatuma avatunyirizi nivekola kuva vasuuvirifu vaduuki kumugumira kigira gavoora kunangwa vamuhira ku avuvunyali kandi kumuviika mu zinguru ziu Mwami wu vwamihi vwavo Rumi. 21Vamuteveleriza nivavoora, “Mwigizi, kumanyi vulahi ivi ovola kandi wigiza amakuva gaveeye guvulungi; kandi ivi si welizaa avandu kolondekana novonene vwavo mba. Navuzwa wigiza agiligali kolondekana nu vulaliri vwa Nyasaye ku Mundu. 22Kovolere, ‘Ni vulahi kolondekana na malago ga Musa, kunyi kutungi uvusuru ku Kaisari#20:22 Kaisari: Mwamihi munene wa Avarumi.?’ ”

23Navuzwa Yeso yalora mutego gwaavo gwu vugadi ma navavoolera, 24“Mu manyie isiringi. Eveeye ku nu mutwi na mang'oda ga vwaha?” Vavoola, “Gwu Mwami munene wa Rumi.”

25Kunangwa Yeso yavavolera, “Ni vulahi, munyi mutungi ku Kaisari vindu viveeye via Kaisari, kandi mutungi ku Nyasaye vindu viveeye via Nyasaye.”

26Navo sivanyala kugumira Yeso mu limoloma lilie imbiri wa avandu mba. Vagenya ligali ku litivula lilie ma nivakiring'ana.

Liteeva kigira Lisimuguka

(Mat. 22:23-33; Mar. 12:18-27)

27Maku avalala ku Avasadukayo, avavoora ndi avandu sivalisimuguka kutura mu vakuzu, vaza ku Yeso nivavoora, 28“Mwigizi, Musa yakong'odera lilago yili ndi, ‘Amwavo wu mundu nakuza naleka mukali, navuzwa vugira avana, kuduuka amwavo musaza oyo yiranyie namulekwa oyo umwandu, kunangwa aduuki kwivulira amwavo weve avana. 29Vaali ho avamwavo saba, wukutanga yaleeta mukali ma nakuza nakikiri kwivura umwana. 30Amwavo wakaviri yavugula mukali oyo, 31kandi ndio wakavaga yaahira mukali, na vosi vaakuza vugira koleka avana. Malala mere gekoleka ku avamwavo vosi saba, vaakuza vugira koleka avana. 32Mu lii malirika mukali naye yakuza kandi. 33Kunangwa, mu lisimuguka, aliva mukali wa uliha ku avamwavo saba avaari naye kuli mukali wavo?’ ”

34Yeso yavativulira, “Avasaza na vakali vi likula yili valetana. 35Navuzwa avasaza na vakali vaduukana kusimuguka kutura mu vakuzu kandi vamenye mu likula lizaa, sivaliletanaa mba. 36Kigira sivanyala kukuza kandi mba. Valava kuli zingelosi kandi vaveeye avana va Nyasaye, kigira vamali kusimuguka kutura mu vakuzu. 37Musa amanyia havulavu ndi avakuzu vasimugukizangwa. Mu zimbaso zivoolaa amakuva kigirakisaka chaadukaa muliru, Musa amolomaa ku Mwami kuli aveeye, ‘Nyasaye wa Aburahamu Nyasaye wa Isaka, kandi Nyasaye wa Yakobo.’ 38Aveeye Nyasaye wa avaveeye mwoyo, siaveeye Nyasaye wa vakuzu, kigira kuye, vosi vaveeye mwoyo.”

39Avalala ku avigizi vi Lilaga vativura, “Mwigizi, utivuuyi vulahi.” 40Sihaliho kandi nomulala uwaluvilira kumuteeva amateeva gandi mba.

Liteeva kigira Kristo

(Mat. 22:41-46; Mar. 12:35-37)

41Yeso yavateva kandi, “Ganyala kovoolwa ndi Kristo, aveeye mwana wa Daudi?

42Kigira Daudi mwene avoora mu Kitabu cha Zaburi:

‘Mwami yavolera Mwami wange,

Yikala hano ku mukono gwange mulungi.

43Kuduuka lwa ngola avasigu vovo vave kuli endeve yukuviika ku virenge vivio.’

44Daudi yamulanga, ‘Mwami.’ Kunangwa Kristo anyala kuva ndi kisukururwi cha Daudi?”

Yeso yiganihizaa avigizi vi Lilaga

(Mat. 23:1-36; Mar. 12:38-40)

45Lwa avandu vosi vaali nivahulirizaa, Yeso yavolera aviigi veve, 46“Mugerihi ku avigizi vi Lilaga; avayaanzaa kogendagenda ni viviiki ziganza ziavo zindambi; kandi avayaanzaa kuchelizwa nu luyali mu viitu. Viikara ku zindeve zinene mu masinagogi kandi ku zindeve ziu luyali mu masavo; 47vavugura vindu viosi via vakunzakali kandi vavihira mu zinyumba ziavo, kigira venya kufumilira agavakolaa, vasaala amasaala matambi. Yava valanyora mageri manene ligali kuvita!”

Currently Selected:

LUKA 20: LOGOOLI

Highlight

Copy