LUKA 17

Kwikigitariza avandi

(Mat. 18:6-7,21-22; Mar. 9:42)

1Yeso yavolera aviigi veve, “Ivindu viu kwikigitariza kandi kolomba avandu kugwa mu vwoni si vinyala kuvula kuuza, navuzwa uvudamanu voveeye ku mundu uviletaa. 2Vwakaveeye vulahi lugina lonene lusungwi mu ligoti lilie ma asiuvwi mu inyanza kuvita kolomba mulala ku avakeekeke yava agwi mu vwoni. 3Kunangwa, mwilindi aveene ku choosi icha mukora!

“Niiva amwavo woovo, akolaa uvwoni umugaye, kandi niiva aliganira, umusamiihi. 4Niiva alakwonera haali saba ku lidiku lilala, ma yirani vuli ing'inga ku ivi navoora, ‘Nziganiyi,’ kuduuka umusamiihi.”

Zinguru zie lisuuvira

5Avatumwa vavoolera Mwami, “Lomba lisuuvira lietu live linene ligali kuvita!”

6Mwami yavativulira, “Niiva lisuuvira lienyu liakaveeye likekeeke kali kuli luguza lwi lisaazi, ngano mwakavoleye mukuyu yigu, ‘Yihika ni miri josi na wisimiki munyanza,’ nu musaala yigwo gwakamuhuliyi.

Miyinzi ju mutumikiri

7“Niiva, mulala ku munyi aveeye nu mutumikiri weve ulimaa mulimi, anoho yaya amagondi, nivwaha ku munyi, lwu mutumikiri oyo ava ni yakinuka, alamuvolera, ‘Hamba vwangu wikale ulie chukulia?’ 8Awa, mu vogono yivwo ulamuvoolera, ‘Nombela chukulia change ndie, kandi wiviki vulahi undumikiri lwa inzi mba nindizaa chukulia ni ninwezaa lwinyima umanya ulie kandi unwi!’ 9Na hene alasandiza mutumikiri oyo kigira akoli aga alagiywi? 10Kandi munyi ndio, lwa muva ni mwakakola ivindu viosi via mwalagwa kokora muvoore, ‘Kunyi koveeye avatugwa avataveeye nuvukara, kokoli vuzwa agakuduukiraa kokole.’ ”

Yeso yahonyia avandu likomi vovogere

11Lwa Yeso yaali naveeye mulogendo kuzia Jerusalemi yavitira hagati ha ulwaako lwa Samaria na Galilaya. 12Lwa yaali niyingira mu lidaala lilala, avandu likomi vovogere vavugana naye, na vasingira ihale kuye, 13ni vahanzuka numwoyo munene nivavoora “Yeso! Mwami! Okovererere.”

14Lwa Yeso yavalola, yavavolera, “Zi mwimanye kuvasaalisi vamuhenze.” Kunangwa, lwa vaali nivazizaa, vatakaswa.

15Kunangwa lwa mulala yalora ndi yahonyiywi, yirana yizominyaa Nyasaye numwoyo munene. 16Yaza, naagwa mam'mama ha virenge via Yeso namusaandiza. Mundu uyu yaali Umusamaria.

17Hene yaho, Yeso yavoola, “Vaali avandu likomi avahonywa, avandi tisa vaveeye hayi? 18Kigira ki mugeni uyu yeng'ine niye wirani kuhaana lisandiza ku Nyasaye?” 19Yamanya navolera mundu oyo, “Singira uzie; Lisuuvira liilio likohonyi.”

Liza liu vwami vwa Nyasaye

(Mat. 24:23-28,37-41)

20Avafarisayo vateva Yeso, “Uvwami vwa Nyasaye vuliiza ng'inga ki?”

Yeso yavativulira, “Uvwami vwa Nyasaye sivuzaa nivilolekizu vinyala kololwa mba. 21Siaveeyeho nu mundu ulivoola, ‘Henza, voveeye hano!’ Anoho ‘Avulaa.’ Kigira, uvwami vwa Nyasaye voveeye hagati hinyu.”

22Maku yavolera aviigi veve, “Amadiku gaaza lwa muliegomba kolola lidiku lilala ku madiku gu Mwana wa Adamu, navuzwa simulililola mba. 23Avandu valamuvoolera, ‘Heenzi! Aveeye hala!’ Anoho, ‘Heenzi, Aveeye hano!’ Munyi mutazia yo anoho mutavalonda mba. 24Kigira kuli loheni lohemahemaa lovega lulala muvwerefu malwaaka lovega Lundi, nindio Mwana wa Adamu aliva lidiku lilie liu kuuza. 25Navuzwa imbiri wa yaga, gaduukanaa anyoore vusaliri vunyingi na ukwambanwa ni likula yili.

26“Kuli gaali mu madiku ga Nuhu, nindio galiva mu madiku gu Mwana wa Adamu. 27Avandu valia nivanwa nivaleeta avakali na avakali nivasererwa kuduuka lidiku lia Nuhu yingira mu liato. Amazi manene gaaza nigadiviza avandu vosi. 28Galakave kuli gaali mu ing'inga ya Loti. Avandu vosi vazizagilira kulia, nukunwa, kugura nukuguliza, kutaga kandi kwumbaka. 29Navuzwa lidiku lia Loti yatura Sodoma imbura yu muliru kandi yikibiriti yakuuba kutura mwigulu na yadiviza avandu vosi. 30Nindio galiva kandi lidiku liu Mwana wa Adamu aliloleka mu vukumi.

31“Lidiku yilio, mundu woosi uliva ku kesegese chi inyumba atiika hasi kuzia munyumba kuvugura vindu vivie mba. Kandi ndio, uyu uliva mu mulimi mwimwe atiirana inyima munyumba yeeye mba. 32Mwizurizi aganyoola mukali wa Loti! 33Ku vosi ogeriza kohonyia livamwoyo lilie, alaligotiza; ku vosi ogotiza livamwoyo lilie alalihonyia. 34Inzi muvooleraa, ku vudiku yivwo, avandu vaviri valakave kukidali nivagoni harara, mulala alakavugulwi na wundi alakalekwe inyima. 35Avakali vaviri valakave nivasiezaa uvusie harara, mulala alakavugulwi nu wundi alakalekwe inyima. [ 36Avandu vaviri valakave mu mulimi, mulala alakavugulwi nu wundi alakalekwe inyima.]”

37Hene yaho, aviigi vamuteeva, “Ni hayi, Mwami?”

Yeso yavativulira, “Ahu muviri guukuzi goveeye, ahene yaho zisoti zivuganiraa ho.”

Lugano lwu mukunzakali nu mukalagi

Currently Selected:

LUKA 17: LOGOOLI

Highlight

Copy