YOHANA 9

1Lwa Yeso yaali navitaa, yalora mundu mulala, uwaali niyiivulwa mboku. 2Aviigi veve vamuteeva “Mwigizi! Nivwaha wakola vwoni, mundu uyu, anoho aviivuli veve, ma ni yiivulwa mboku?”

3Yeso yativura, “Livakula lilie yili siliveeye kigira yakola uvwoni anoho aviivuli veve mba, navuzwa yiivulwa mboku, kunangwa zinguru zia Nyasaye ziduuki kokora miyinzi muye havulavu. 4Vukiri mbasu, gaduukanaa ngole miyinzi ja uyu uwanduma, kigira uvudiku vuzaa lwu mundu atanyala kokora miyinzi. 5Ing'inga ya ngikiri mu kivala, mbeeye vulavu vwikivala.”

6Lwa yamala kovora yaga, Yeso yatuuza amate mu marova, nazuganyia amate na marova nekedete chiche nalomba ovodohi, ma navaka ovodohi mu zimoni ziu mboku, 7na muvooleraa, “Zia wisaave mu lidavalia lia Siloamu.” Kivuni chi lieta yili keveeye “Kutuma.” Kunangwa, mboku oyo yazia niyisaava, ma niyirana nalora.

8Kunangwa, avatende veve na yavo avaari ni vamumanya maziambiri kuli mudaka musavasavi vavoola, “Uyu siaveeye mudaka ula ugiraa kwikala naasava?”

9Valala kuvo vavoola, “Niyie.” Avandi vavoola “Awa! Navuzwa aveeye kuli niye.”

Navuzwa uwaali mboku yavoola, “Ninzi!”

10Vamuteeva, “Gaveeye ndi, zimoni zizio zinyoleki ndi kolola?”

11Naye yavativulira, “Mundu ulangwa Yeso, alombi ovodohi, naambaka muzimoni nambolera, ‘Zia wisaave mu lidavalia lia Siloamu.’ Kunangwa inzi ndaazia, ninzisaava, ma nindora.”

12Vamuteeva, “Aveeye hayi?”

Naye yativura, “Inzi manyi mba!”

Avafarisayo vahenzeriza lihonywa liu mboku

13Kunangwa vaahira mundu uwaali niyavakula oyo ku Avafarisayo. 14Lidiku yilio liali lie Lisabato, lwa Yeso yalomba ovodohi nakunura zimoni ziu mundu oyo. 15Kunangwa, Avafarisayo vateva mundu oyo kandi, “Onyooye ndi lilola?” Naye yavavolera, “Yambaki ovodohi mu zimoni, ninzia ninzisaava, ma kalunu ndolaa.” 16Valala ku Avafarisayo vavoola, “Mundu uyu saiaveeye uwatula ku Nyasaye mba, kigira sialindaa Lilaga lie Lisabato mba.” Navuzwa avandi vavoola, “Mundu wu vwoni anyala kokora ndi vilolekizu ku yivi?” Vaali ni liavukana hagati haavo. 17Avafarisayo vateva mboku oyo kandi, “Yee, ovola akohonyi livakula liilio; vulahi, ovola ki kuye?” Naye yavavolera, “Aveeye muporofeti!”

18Avanene va Avayuda sivali vanyara kusuuvira ndi mundu uyu yiivulwa mboku na kalunu alolaa mba, kuduuka lwa valanga aviivuli veve. 19Vateva aviivuli yava, “Uyu niyie mwana winyu wamuvoolaa yiivulwa mboku? Kalunu, anyooye ndi lilola?” 20Aviivuli veve vativura, “Kumanyi vulahi ndi uyu nu mwana wiitu, kandi yiivulwa mboku. 21Navuzwa kuli aduuki kolola kunyi sikumanyi mba, anoho si kumanyi mundu umukunuyi zimoni zizie mba. Muteeve mwene; aveeye mundu muhindira, anyala kovora mwene.” 22Aviivuli veve vavoola ndio kigira vaatia avanene va Avayuda kigira avanene yavo vaali nivavugilirizani ndi mundu woosi uwiyama havulavu ndi asuviraa Yeso kuva Mesia, alakungwa kutura mu Lisinagogi. 23Yiki nicho chagira aviivuli veve nivavoora, “Aveeye mundu muhindira, muteevi.”

24Kunangwa, valanga mundu waali mboku oyo haali kaviri nivavoora, “Ohe Nyasaye uvukumi. Kunyi kumanyi mundu okohonyi uyu aveeye mwoni.”

25Mundu zana oyo yativura, “Inzi simanyi niiva aveeye mwoni mba. Navuzwa manyi vuzwa kindu kilala! Ndaali mboku, na kalunu ndolaa.”

26Vamuteeva, “Yakola ki ku ivi? Yakohonyia ndi livakula liilio?”

27Mundu oyo yavativulira, “Inzi mali kumuvolera, navuzwa simwenya kuhuliriza mba. Kigira ki mwenya kuhulira kandi? Munyi kandi mwenya kuva aviigi veve?” 28Vaamunyega nivavoora, “Ivi oveeye mwigi weve; navuzwa kunyi koveeye aviigi va Musa. 29Kunyi kumanyi vulahi ndi Nyasaye yamoloma na Musa; navuzwa kulwu mundu uyu kali kunyi sikumanyi uwa atulaa mba.”

30Naye yavativulira, “Yiki ni kindu chokogenyia ligali! Munyi simanyi waatura mba, navuzwa yakunura zimoni ziange! 31Kwamanya ndi Nyasaye siahuliraa avandu avoni mba, navuzwa ahuliraa mundu woosi umusigamiraa kandi okokora uvulariri vwivwe. 32Kutura mulitanga lie livoora, gakiri kuhulirika ku mundu ku vosi uwahonyia mundu uwivulwa mboku mba. 33Galava ndi umundu uyu siyaatula ku Nyasaye, siyaali anyala kokora kindu choosi mba.”

34Vaamutivulira, “Ivi wivulwa kandi nuvilukizwa mu wvoni vonene, unyala ndi kwigiza kunyi?” Maku vamukunga kutura mu lisinagogi.

Livakula liu mu Roho

35Lwa Yeso yahulira ndi vamukungi, yavugana naye, namuteeva, “Ivi usuviraa mu Mwana wa Adamu?”

36Mundu oyo yamutivula, “Mwami, mbolera aveeye vwaha, kunangwa nduuki kumusuuvira!”

37Yeso yamuvolera, “Ivi umali kumulora, oyo niyie omoloma harara naivi kalunu.”

38Mundu oyo yavoola, “Mwami, suuviyi!” Ma nasigamira Yeso.

39Yeso yavoola, “Inzi ndaaza mu kivala kigira likalaga, kunangwa avavoku vaduuki kolola, na yavo avalolaa vaduuki kuvakula.”

40Valala ku Avafarisayo avaari ahimbi naye vahulira amakuva yaga, nivamuteeva, “Kali kunyi koveeye ndio kandi?” 41Yeso yavativulira, “Mulava ni mwakaveeye avavoku, ngano si mwakaveeye nuvwoni; navuzwa kigira munyi muvooraa, Kunyi kololaa, yaga gavoora mukikiri voni.”

Lugano lwu mwayi wa magondi

Currently Selected:

YOHANA 9: LOGOOLI

Highlight

Copy