YOHANA 20

Lisimuguka lia Yeso

(Mat. 28:1-8; Mar. 16:1-8; Luk. 24:1-12)

1Mugambazuri mu mavwevwe, lidiku lia Jumapili, isi nikikiri imwamu, Maria Magadalena yazia ha kilindwa, nalora ligina liali ku kilindwa lituliziywi ku. 2Kunangwa yanyagula zimbiru nazia ku Simoni Petero nu ku mwigizi wundi wa Yeso yaali niyayaanza, navavoolera, “Vatulizi Mwami mu kilindwa, na sikumanyi aha vamuviki mba.”

3Maku Petero harara nu mwigizi wundi oyo vazia kuduuka ha kilindwa. 4Vombi vaviri vanyagura, navuzwa mwigizi wundi oyo yanyagula zimbiru kuvita Petero naduuka kutanga ha kilindwa. 5Lwa yinama nahenza mu yalora zinguvu zie katani ziu kuyavira mu mukuzu, navuzwa si yingira mu mba. 6Maku lwa Simoni Petero naye yaza naamulonda inyima, yingira mu kilindwa nalora zinguvu zie katani niziveeye mu. 7Kitambaya chavofwa ku mutwi gwa Yeso si chaviikwa harara ni zinguvu ziu kuyavira mu mukuzu yizio mba. Chaali nikilingiywi kandi nikiviikiywi havundu hacho. 8Kunangwa mwigizwi wundi uwaduuka kutanga ha kilindwa, yingira mu kandi, nalora, kandi nasuuvira ndi 9Yeso umali kusimuguka. Navuzwa sivamanyiriza aga Mang'oda Matakatifu gavoora ndi kuduuka Yeso asimuguki kutura mu vakuzu mba. 10Maku aviigi vaviri yavo viirana uwa vamenya.

Yeso Yaloleka ku Maria Magadalena

(Mat. 28:9-10; Mar. 16:9-11)

11Maria yaali nasingiyi ichova wi kilindwa, nalira. Lwa yaali nakiliraa, yinama nahenza mu kilindwa. 12Yalora zingelosi vaviri aviviika zinguvu zindavu zerere, nivikaye ahu muviri gwa Yeso gwaali, mulala hamutwi nu wundi havirenge. 13Zingelosi yavo vamuteeva, “Mukali, kigira ki uliraa?”

Naye yavavolera, “Vaakuvugula Mwami wange, na simanyi wa vamuviki mba!”

14Maku yikivuka, nalora Yeso nasingiyi hene yaho, navuzwa siyamanya ni Yeso mba. 15Yeso yamuteeva, “Mukali kigira ki uliraa? Wenyaa vwaha?”

Maria yaganagana ndi aveeye mulindi wumulimi. Kunangwa yamuvolera, “Mwami, niiva ni ivi uvuguyi muviri gwa Yeso mbolera ahumuviki, nainzi nzie muvuguli.”

16Yeso yamuvolera, “Maria!” Maria yagirung'ana namuhenza. Yamuvolera mu Luheburaina, “Raboni!” Yili ni likuva mu luheburaina livoora “Mwigizi.”

17Yeso yamuvolera, “Utang'umira mba; Ngikiri kwanigira igulu wa Baba. Navuzwa zia ku avamwavo vange uvavoolere, ‘Nzirana ku uyu oveeye Baba wange kandi Baba winyu; Nyasaye wange kandi Nyasaye winyu.’ ” 18Kunangwa Maria Magadalena yazia navolera aviigi, “Ndoli Mwami, kandi yavavolera aga Yeso yaali namuvooleye.”

Yeso yaloleka ku aviigi veve

(Mat. 28:16-20; Mar. 16:14-18; Luk. 24:36-49)

19Lwali hamugorova gwi lidiku lia Jumapili, kandi aviigi vaali nivavugani harara munyumba, viliango nivihaniywi kigira vaatia avanene va Avayuda. Yeso yaza, nasingira hagati haavo, navavoolera, “Mirembe jive ku munyi!” 20Lwa yamala kovora yaga, yavamanyia zimbara mu makono geege kandi mu zimbalu mwimwe. Aviigi veve vayaanza ligali kolola Mwami. 21Yeso yavavolera kandi, “Mirembe jive ku munyi! Kuli Baba yanduma, kandi nainzi nduma munyi.” 22Lwa yamala kovora yaga, yavaherera mwika navavoolera, “Vuguli Roho Mutakatifu. 23Nimusamiiha avandu vwoni vwavo, valasamifwa. Nimuvula kusamiiha avandu vwoni vwavo, valavula kusamiifwa.”

Yeso na Tomasi

24Tomasi walangwa Malongo, mulala ku avaari likomi na vaviri, si yaali navo lwa Yeso yaza mba. 25Kunangwa, aviigi vandi vamuvolera, “Koololi Mwami.”

Tomasi yavavolera, “Nindalola zimbara zie misumari mu makono geege, nu kudiira kedete change muzio, kandi kudiira mukono gwange mu zimbalu zizie, sinyala kusuuvira mba.”

26Inyima wa madiku munane aviigi yavo vaali kandi harara munyumba, na Tomasi yaali harara navo. Miliango jaali ni jihaniywi. Navuzwa Yeso yaza, nasingira hagati haavo, navoora, “Mirembe ku munyi!” 27Maku yavolera Tomasi, “Leeta kedete chicho udiiri mu zimbara zia makono gange; leeta mukono gugwo uhambe mu zimbalu ziange. Utava nilihayahayiza, navuzwa usuuviri!”

28Tomasi yamutivulira, “Mwami wange kandi Nyasaye wange!”

29Yeso yamuvolera, “Usuuviyi kigira ondoli? Vaveeye nuvugasu yavo avasuuviyi nivakikiri kondola.”

Kivuni chi kitabu yiki

30Yeso yakola vilolekizu vinyingi imbiri wa aviigi veve ivia vula kung'odwa mu kitabu yiki. 31Navuzwa yivi viang'odwa kunangwa munyi muduuki kusuuvira ndi Yeso ni Mesia. Mwana wa Nyasaye; na mu lisuuvira lienyu muye, mulava ni livamwoyo mu zie lieta lilie.

Yeso yaloleka ku aviigi saba

Currently Selected:

YOHANA 20: LOGOOLI

Highlight

Copy