LITANGA 49

Makuva Ga Yakobo gu Kumaliriza

1Yakobo yalanga vayaayi veve navavoolera, “Hambi harara na ndamuvolera chaza chekoleke ku munyi mu madiku ga hambiri:

2Mwivungikizi harara na muhuliri

munyi avayaayi va Yakobo.

Muhulirizi baba winyu Isiraeli.

3“Rubeni, mwana wange wukutanga,

ivi oveeye zinguru ziange.

Kandi oveeye makuyu gu kutanga gi zinguru ziange.

Ivi oveeye wu luyali kandi wi zinguru ligali kuvita vayaayi vange vosi.

4Ivi oveeye kuli migelera ja mazi gafuriana;

Navuzwa si ulava munene mba,

kigira waali harara nu mukali wange umbika.

Kandi wononyia kidali cha baba woovo.

5“Simioni na Levi vaveeye avamwavo.

Vivavi viavo viveeye vingi vio kokora kirage.

6Inzi si ndahambana mu makuva gaavo gavuzwa mba,

Anoho si sanga mu livugana liavo mba.

Kigira vita vandu mu vutima vwavo uvululu.

Kandi vakora zigiriki nizilema mu lienya liavo.

7Inzi ndalama uvutima vwavo,

kigira voveeye uvululu ligali.

Kandi ndalama livihirirwa liavo kigira liveeye lie kirage.

Inzi ndavasalanyia mukivala cha Isiraeli.

Kandi ndavagavulanyira hagati ha vandu va Isiraeli.

8“Yuda, avamwavo vovo valakwizominya ivi.

Kandi ulalwana avasigu vovo.

Avamwavo vovo valinama imbiri woovo.

9Yuda aveeye kuli isimba,

yitaa vasigu vayo ma yirana mu lungaywa lwayo yinjila ma egonaa hasi.

Avulaho mundu unyala kuvugilira kugikubiza ikivi.

10Yuda alava ni imbimbu yu vwami,

visukululwi vivie vilamiiha kazozo.

Zihiiri zilaleta uvusuru kuye,

kandi zihiiri zilinama imbiri weve.

11Alavoha ibunda yeeye ku muzabibu.

Kandi alavoha mwana wi ibunda yeeye ku muzabibu mutovole.

Alafuuya zinguvu zizie mu iwaini,

kandi alafuuya ziganza zizie mu masahi go muzabibu.

12Zimoni zizie zilakanya ku lwu kunywa iwaini,

kandi amiinu geege galava amalavu kulinwa amaveere.

13“Zabuloni alamenya ahimbi nulujinga lwi inyanza.

Alava inyambuku yi zimeri.

Lwako lwilwe lulazia kuduuka Sidoni.

14“Isakari siaveeye mulahi kuvita ibunda egonaa niyinyira

hagati hi misigo jayo mba.

15Yalora ndi havundu yaho haali halahi hokososera,

kandi kivala yicho chaali kilahi.

Kunangwa yinaminya lilikuu lilie

kandi navugilira kuva mutugwa ku miyinzi ju kunigwa.

16“Dani alava mwamihi ku vandu veve.

Avandu veve valava kuli zihiiri zindi zia Isiraeli.

17Alava enzoka kunzira,

kihirigoma keveeye nu vusungu;

ikilumaa ibarasi ku virenge,

kunangwa mundu nanini kuyo aduuki

kusuuvwa no kugwa hasi inyima wayo.

18“Inzi nindiliraa ovohonyi vuvwo O, Yahova.

19“Muganda gwa vandu gu lingilira Gadi,

navuzwa alagirung'ana kuvalondelera.

20“Mulimi gwa Asheri gulava ni ligesa linyingi.

Alahaana viukulia viduukana nu mwami.

21“Nafutali aveeye kisusu kinyagulaa novovoholore.

Amolomaa makuva malahi.

22“Josefu aveeye kuli muzabibu gwa makuyu,

aveeye ahimbi ni kisenukiru cha mazi.

Zisia ziagwo ziavambuka kuduuka kundulu kwi kiguru.

23Avasigu veve vamwingilira nu vululu,

kandi vamulondelera nukumulasa ni mivano ju vuta vwavo.

24Navuzwa vuta vwivwe vwayetegeka,

kandi zinguru zia Nyasaye Wuvunyali wa Isiraeli,

kuvitira mumwayi kandi mukingi wa vandu va Isiraeli,

zilomba makono geege kuva ni zinguru.

25Nyasaye wa vaguuga vovo yakoonya ivi,

Nyasaye Wuvunyali ugasizaa

ivi nu vugasu vwi imbura kutura mu ligulu.

Kandi agasizaa ivi na mazi gu mululiva lwi inyanza.

Agasizaa ivi zinzivulu zinyingi zia vana nimitugu.

26Uvugasu vwa baba woovo voveeye ovonene

ligali kuvita uvugasu vwi vigulu vie mihiga ni mihiga,

kandi voveeye ovonene ligali kuvita vindu tugulu twi mihiga ni mihiga.

Uvugasu yivu vove ku Josefu,

vove ku itaji yu mutwi gwa uyu wahulwa ku avamwavo veve.

27“Benjamini aveeye kivwi kilulu.

Mugambazuri alizaa zinyama ziahimaa,

hamugorova agavula vilaanye.”

28Yizi ziosi ni zihiiri 12 zia vandu va Isiraeli. Yaga nigo amakuva ga baba wavo yavoola kuvo lwa yavagasiza. Yavagasiza mulala sa mulala nu vugasu vuduukana naye.

Likuza Kandi Liyavirwa lia Yakobo

29Maku Yakobo yalaga vayaayi veve ndi, “Kalunu mbeeye ahimbi kukuza. Na muvuguli muviri gwange na munzaviri harara na vaguuga vange mu kirindwa keveeye mu mulimi gwa Efuroni umuhiti, 30ha Makipela ivugwi wa Mamure mukivala cha Kanaani. Aburahamu yaagula luhangaywa mulimi yigu kutura ku Efuroni gove havundu hi virindwa via vakuzu. 31Havundu yaaha niho ha vayavira Aburahamu na Sara mukali weve, kandi havayavira Isaka na Rabeka mukali weve kandi ha ndayavira Lea. 32Mulimi gwi vilindwa yigu gwagulwa kutura ku vandu vi kivala cha Hiti.”

33Lwa Yakobo yaali ni yakamala kulaga vayaayi veve, yagona ku kidali chiche ma nakuza.

Currently Selected:

LITANGA 49: LOGOOLI

Highlight

Copy