LITANGA 46

Yakobo harara na vinyumba yeeye Vazia Egebeti

1Yakobo yavungiza viosi iviayaali navio kandi nazia Beerisheba, uwa yahaana viusiuviliru ku Nyasaye wa baba weve Isaka. 2Nyasaye yamoloma kuye mu malola vudiku kandi naalanga, “Yakobo, Yakobo!”

“Yavoola yee inzi mbeeye hano.”

3Yavoola, “Inzi mbeeye Nyasaye, Nyasaye wa baba woovo. Utatia kuzia Egebeti mba. Inzi ndakalombe kisukururwi chicho kuva ihiiri enene wene yeyo. 4Inzi ndakazie na ivi mu Egebeti, kandi ndakiranyie visukululwi vivio mukivala yiki. Josefu alakave harara na ivi lwa ulakakuzi.”

5Yakobo yatura Beerisheba. Avana veve vamugingira mu magare agu mwami wa Egebeti yaali nahaani oyo harara navana vaavo vakekeeke kandi navakari vaavo. 6Vaavugura mitugu jaavo kandi ni miandu ja vaali nivanyoora mu Kanaani kandi ni vazia Egebeti. Yakobo yavugula visukululwi vivie viosi: 7avayaayi veve na vakana veve kandi aviisukulu veve vayaayi na vakana.

8Avandu vinyumba ya Yakobo avaazia naye Egebeti vaali muyaayi weve wukutanga Rubeni 9kandi na vayaayi va Rubeni: Hanoki, Palu, Hezoroni na Karimi. 10Simioni na vayaayi veve: Jemweli, Jamini, Ohadi, Jakini, Zohari, na Shauli mwana wu mukali Mukanani. 11Levi kandi na vayaayi veve: Gerishomu, Kohazi na Merari. 12Yuda na vayaayi veve: Shela, Perezi na Zera. Eri na Onani vaali avana vandi va Yuda vaali nivakuzira mu Kanaani. Avana va Perezi vaali Hezoroni na Hamulu. 13Isakari na vayaayi veve: Tola, Puya, Jashubu, na Shimuroni. 14Zabuloni na vayaayi veve: Seredi, Eloni, na Jahileli. 15Yava na vayaayi va Lea yivulira Yakobo mukivala cha Mesopotamia harara nu mukaana weve Dina. Vayaayi veve na vakana veve vaali vosi harara 33.

16Gadi na vayaayi veve: Zefoni, Hagi, Shuni, Eziboni, Eri, Arodi na Areeri. 17Asheri na vayaayi veve: Imuna, Ishiva, Ishiri, Beria, kandi na mbozo wavo Sera. Avayaayi va Beria vaali Heberi na Malikieli. 18Visukululwi 16 yivi ni via Yakobo na Ziliba mukaana mutugwa uwa Labani yaaha Lea mukaana weve.

19Raheli mukali wa Yakobo yamwivula vayaayi vaviri: Josefu na Benjamini. 20Josefu na Asenazi mukaana wa Potifera waali musaalisi mu Heliopolisi vanyoola vayaayi vaviri mu Egebeti, Manase na Efuraimu. 21Avayaayi va Benjamini vaali Bela, Bekeri, Ashibeli, Gera, Naamani, Ehi, Roshi, Mupimu, Hupimu, na Avidi. 22Avandu 14 yava ni visukululwi via Yakobo na Raheli.

23Muyaayi wa Dani yaali Hushimu. 24Nafutali navayayi veve: Jahizeli, Guni, Jezeri, na Shilemu. 25Visukululwi 7 yivi ni via Yakobo na Biliha mukaana mutugwa uwa Labani yaaha Raheli mukaana weve.

26Avandu vi inyumba ya Yakobo avaazia mu Egebeti harara naye vaali 66 vugira kuvalizira mu avanavizara veve. 27Josefu yanyoora avayaayi vaviri mu Egebeti; vosi harara vaali avandu 70 avinyumba ya Yakobo avaazia mu Egebeti.

Yakobo harara na vinyumba yeeye mu Egebeti

28Yakobo yatuma muyaayi weve Yuda azie koteeva Josefu yaze kuvaaganira mu Gosheni. 29Kunangwa Josefu yingira mu ligare lilie kandi nazia kwaganira baba weve. Lwa vaagana Josefu yakumbelera baba weve mwigoti kandi nalira ku ing'inga indambi. 30Yakobo yavolera Josefu, “Inzi nzetegeki kukuza, kalunu ndi inzi mali kokolola kandi manyirizi ndi oveeye mwoyo.”

31Maku Josefu yavolera avamwavo veve kandi navandi vosi avinyumba ya baba weve, “Inzi kuduuka nzie kovoolera mwami ndi avamwavo vange kandi avinyumba ya baba wange vosi, avaamenyaa mu Kanaani, vamali kuza ku inzi. 32Inzi ndamuvolera ndi munyi muveeye avayi. Munyi mulinda mitugu kandi mumali koleta viayo ni mitugu jiinyu kandi vuli kindu chiinyu. 33Lwu mwami amulanga nukumuteva miyinzi ja mukora, 34mu muvoolere ndi munyi mwaali vuzwa avayi kutura muvosoleri vwinyu, kuli avaguuga vinyu vaakora. Mu liiva kuli yili alaleka mumenye mukivala cha Gosheni.” Josefu yavoola yaga kigira avayi vaveeye livihilirizwa ku avandu va Egebeti.

Currently Selected:

LITANGA 46: LOGOOLI

Highlight

Copy