LITANGA 42
42
Avamwavo va Josefu Vazia Egebeti Kugura Vuswage
1Lwa Yakobo yamanya ndi uvuswage voveeye mu Egebeti, yavolera avayaayi veve, “Kigira ki muhenzana aveene ku vene? 2Inzi mbulira ndi vuswage voveeye mu Egebeti; muzie kugura yo kunangwa kunyi kuvuli kukuza kigira inzara.” 3Avamwavo va Josefu likomi vazia mu Egebeti kugura vuswage. 4Navuzwa Yakobo siyatuma Benjamini amwavo Josefu mukekeeke kuzia navo mba. Yaali nuvuti ndi kindu kidamanu kinyala kwekoleka kuye.
5Avayaayi va Yakobo vaza harara navandu vandi kugura uvuswage, kigira inzara yaali mukivala cha Kanaani. 6Josefu, kuli munene wi kivala cha Egebeti, yaguliza vuswage ku avandu kutura mu lirova liosi. Kunangwa avamwavo Josefu vaza ma nivasigama imbiri weve nivahenza hasi. 7Lwa Josefu yalora avamwavo veve, yaavamanyiliza, navuzwa yekola ndi si avamanyi mba. Yavateva nuvululu, “Munyi muturaa hayia?”
Vaativura, “Kunyi kutura Kanaani kuzi kugura viukulia.”
8Kali niiva Josefu yaamanyiriza avamwavo veve, yavo si vamumanyiriza mba. 9Yizuliza amalooto ga yaali niyalota kigira yavo ma navoora, “Munyi muveeye avatunyirizi; munyi muuzi kolola hi kivala chiitu keveeye novodedekere.”
10Vaativura, “Awa mwami wiitu. Kunyi avatumikiri vovo kuzi kugura viukulia. 11Kunyi vosi koveeye avayaayi vu mundu mulala. Si koveeye avatunyirizi mba, mwami wu luyali, koveeye avandu vasuuvirifu.”
12Josefu yavavolera, “Awa! Munyi muuzi kolola hi kivala chiitu keveeye novodedekere.”
13Vavoola, “Kunyi avatumikiri vovo kwaali avamwavo 12, mwami wu luyali, avana vu mundu mulala mukivala cha Kanaani. Amwavo wiitu mulala yakuza, kalunu mukekeeke wiitu atigaye na baba wiitu.”
14Josefu yavavolera, “Gaveeye vuzwa kuli inzi mboye. Munyi muveeye avatunyirizi. 15Munyi mulagelizwa kuli ndi: Inzi nzisuha ku lieta lio mwami ndi munyi si mulazia kutura havundu yaaha mba kuduuka lwu muyaayi winyu mukekeeke yaza hano. 16Mulala ku munyi azie kumuleeta. Avandi vosi mulava mu vulindi kuduuka lwa agiligali gamuvoola gamanyikanaa nzisuha ku lieta liu mwami oveeye mwoyo, munyi navatunyirizi.” 17Maku yavavika mu vuhambe ku madiku gavaga.
18Ku lidiku lia kavaga Josefu yavavolera, “Inzi mbeeye umundu watia Nyasaye, kandi ndamuhonyia ku kivuni kilala. 19Niiva muveeye avandu vasuuvirifu, mulala kumunyi atigale hano mu vuhambe, navandi vosi vahiri vuswage ku avinyumba yinyu avaveeye ninzara. 20Maku kuduuka mundeetere muyaayi winyu mukekeeke. Yaga galamanyia ndi muvooraa agiligali, kandi si mulitwa mba.”
Vavugilira yaga 21kandi ni vavolerana aveene ku aveene, “Yee, kalunu kusalira kigira mahiolo ga kwakolera amwavo wiitu; kunyi kwalola ikivi kenene chayalimu lwa yenya vokonyi, navuzwa si kwahulira mba. Yiki nicho kivuni kigira nikuva mu vudinyu yivu kalunu.”
22Rubeni yavoola, “Inzi ndamuvolera mutasaliriza mwana wiitu mba, navuzwa munyi si mwambulira mba. Na kalunu kutungwa kisaalia kigira likuza lilie.” 23Josefu yaamanyiriza gavavoola, navuzwa si vamanya mba, kigira vaali nivamolomangi naye kuvitira mu mugirung'anya. 24Josefu yagirung'ana kutura kuvo natanga kulira. Lwa yalekera, yagirung'ana kandi namoloma navo. Maku yavugula Simioni kutura kuvo naamuvoha imbiri wavo.
Avamwavo Josefu Viirana Kanaani
25Josefu yalaga vuswage vwizulizwi mu misigo ja vamwavo veve, mabese ga vuli mundu gilanywe mu musigo, kandi vahevwe chukulia chokologendo. Yaga gaakolwa. 26Vaviika vuswage vwavo ku zibunda ma ni vazia. 27Havundu havagona mu vudiku, mulala yigula mu musigo gwigwe atulizimu chukulia ahe ibunda, na yalora mabese geege ha munwa gwu musigo. 28Yalanga vamwavo veve na vavoolera “Vaanzilanyiyi mabese gange. Gaveeye mu musigo gwange!” Vamwavo veve vakuza mioyo kandi vateevana aveene ku aveene mu vuti, “Nyasaye akokoleeye kindiki yiki?”
29Lwa virana mukivala cha Kanaani, vavoolera baba wavo Yakobo vuli kindu chekoleka kuvo: 30“Umundu waali munene wi kivala yicho yamoloma kukunyi nuvululu, kandi naganagana kwaali avatunyirizi. 31Navuzwa kunyi kwamuvolera, ‘Sikoveeye avatunyirizi mba, koveeye avandu vasuuvirifu. 32Kunyi vosi kwaali avamwavo 12, baba wiitu mulala. Muyaayi mulala yakuza, nu mukekeeke yaatigara Kanaani na baba wiitu.’ 33Umundu oyo yativura, ‘Ndatumikira liiva kuli yili kumanyiriza niiva muveeye vasuuvirifu: Mulala ku munyi alatigala hano na inzi; navandi valahilira avandu vinyu vaveeye ni inzara vuswage. 34Munyi mundeetere muyaayi winyu mukekeeke. Maku inzi ndamanya ndi munyi si muveeye avatanyirizi mba, navuzwa vasuuvirifu. Inzi na mwilanyiri muyaayi winyu, kandi munyala komenya hano ma mukore likiranya.’ ”
35Maku lwa vatuliza viukulia mu misigo jaavo, vuli mulala yanyoora imuuya ya mabese geege musigo. Lwa valora mabese, vosi harara na baba wavo vaatia. 36Baba wavo yavavolera, “Munyi mwenya mugole ngotizi avana vange vosi? Josefu yagota. Simioni kandi yagoti, kalunu mwenya muhiri Benjamini kandi. Ni inzi usaliraa!”
37Rubeni yavolera baba weve, “Niiva inzi si ndakwiranyira Benjamini, unyala kwita avayaayi vange vaviri. Umuleke muvulindi vwange, kandi inzi ndamwiranya ku ivi.”
38Navuzwa Yakobo yavoola, “Muyaayi wange sianyala kuzia ni munyi mba. Amwavo weve yakuza, kandi niye weng'ine watigala. Kindu kinyala kumusalirizira kologendo. Inzi mbeeye musakulu, na vovereri vwa muleete ku inzi vulanzita.”
Currently Selected:
LITANGA 42: LOGOOLI
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
