LITANGA 40

Josefu Yiivara Maloto ga Vahambe

1Inyima wi vindu yivi, muhaani wi waini yu mwami wa Egebeti, kandi nu mudeeki munene weve, vahiola imbiri wu mwami wavo. 2Mwami wa Egebeti yaali nu vutima na vanene veve vaviri, muhaani wi waini kandi mudeeki. 3Yalaga vaviikwi mu vuhambe, munyumba ya vanene va valindi, havundu ha Josefu yaali naveeye. 4Munene wa valindi yatovola Josefu kuva mulindi wa vahambe vandi vamenya mu vuhambe ku ing'inga indambi.

5Uvudiku vulala muhaani wi iwaini kandi mudeeki, sa mulala yaali na maloto. Vuli maloto gaali ni kivuni chago. 6Lwa Josefu yaazaa kuvo mu zisa zia mugamba, yanyoora nivaveeye ni no vovereri. 7Yavateva, “Kigira ki muveeye novovereri kalunu?”

8Vamuvolera, “Vuli mulala ku kunyi yaali na maloto, na si aveeyeho mundu unyala kwivaala kivuni cha maloto yaga mba.” Josefu yavoola, “Nyasaye niyie ololekizaa kivuni cha maloto, mboleri maloto ginyu.”

9Kunangwa mulindi wi iwaini yavolera Josefu, “Mu maloto gange, ndaalora muzabibu imbiri wange, 10na gwaali ni zisia zivaga. Nonoho lwa matu gagwo gasivuka, vimuli viagwo vialoleka, kandi makuyu gagwo genga. 11Ndaali ningumiyi kekombe chu mwami mu makono gange. Maku ndaavugura makuyu gu muzabibu ningamulira mu kekombe ma nimbana ku mwami.”

12Maku Josefu yamuvolera, “Kivuni cha maloto yaga keveeye ndi: Zisia zivaga ziveeye madiku gavaga. 13Muing'inga ya madiku gavaga, mwami alakovoholora, kandi alakusamiiha nukukwiranyia ku miyinzi jijo. Ivi ulahaana iwaini ku mwami kuli wahaanaa maziambiri lwa waalange mulindi wi waini yeeye. 14Navuzwa yaanza unzizulizi lwa navove vulahi ku ivi; kandi ngogonya uyaanze ongonye mwami ayaanze yamboholore kutura munyumba ya vahambe. 15Ligali inzi ndaagumilwa kutura mukivala cha Vaheburaina; kali hano mukivala cha Egebeti, si ndaakola kindu kali kilala kigira vambiki munyumba ya vahambe mba.”

16Lwu mudeeki yalora ndi livaala lie kivuni cha maloto gu muhaani wi waini liali lilahi, yavolera Josefu, “Inzi kandi ndaali na maloto. Ndaali ni ng'ingi vihinda vivaga vie migadi ku mutwi gwange. 17Mu kihinda chaali kwigulu, vialimu viukulia viu mwami zing'ano ziosi, navuzwa manyonyi gaali nigaliza viukulia yivi ku mutwi gwange.”

18Josefu yativura, “Kivuni cha maloto yaga keveeye ndi: Vihinda vivaga viveeye madiku gavaga; 19mu madiku gavaga, mwami alakovoholora, na alakala mutwi gwugwo! Maku alasunga muviri gwugwo ku musaala; na manyonyi galakalia zinyama ziu muviri gwugwo.”

20Lidiku lia kavaga, liali liu kwizuliza liivulwa liu mwami. Yalomba lilia linene ku vatumikiri veve vosi. Maku yalanga mulindi weve wi iwaini kandi mudeeki weve. Yavaleeta imbiri wa vatumikiri veve. 21Yiranyia mulindi wi iwaini muvutumiki vwivwe, ma yavugula iwaini nahaana ku mwami. 22Navuzwa yasuunga mudeeki ku musaala kuli Josefu yaali navooye. 23Mulindi wi iwaini siyizuliza kokonya Josefu mba, yamwivirira ligali.

Currently Selected:

LITANGA 40: LOGOOLI

Highlight

Copy