LITANGA 28

1Isaka yalanga Yakobo, namuteeva mirembe, ma namuvolera, “Utaleta mukali kutura mukivala cha Kanaani mba. 2Uzie Mesopotamia, hango ha guuga woovo Bezueli, ma oleete mukali mukaana mulala ku vakana va Labani koza woovo. 3Nyasaye Wuvunyali ayaanze akugasizi kandi wivuli avana vanyingi, kunangwa uduuki kuva baba wi zihiiri zinyingi! 4Nyasaye ayaanze akugasizi harara ni visukululwi vivio, kuli yagasiza Aburahamu. Uvuguli miandu ji kivala yiki, icha ivi omenyi mu, kandi icha Nyasaye yahaana ku Aburahamu!” 5Isaka yatuma Yakobo kuzia Mesopotamia wa Labani, uwaali muyaayi wa Bezueli kutura mukivala cha Arameyani. Labani yaali mbozo Rabeka, uwaali mama Yakobo na Esau.

Esau Yaleeta Mukali Wundi

6Esau yamanya ndi Isaka yaali nagaasizi Yakobo kandi naamutumi kuzia Mesopotamia koleta yo mukali. Kandi yamanya ndi lwa Isaka yagasiza Yakobo, yamulaga avuli koleta mukali kutura mukivala cha Kanaani. 7Esau yamanya ndi Yakobo yaali natiyi amalago ga baba weve na mama weve, ma naziiyi Mesopotamia. 8Maku Esau yamanya ndi baba weve Isaka si yayanzizwa na vakana va Kanaani mba. 9Kulwayago, Esau yazia ku Ishimaeli muyaayi wa Aburahamu naleta mukaana weve wa langangwa Mahalazi, uwaali mbozo Nebaiozi.

Amalooto ga Yakobo ha Bezeli

10Yakobo yatura Beerisheba ma nazia Harani. 11Lwu vudiku vwaduuka, yazia kogona havundu hatakatifu. Yavugula ligina lilala naviikaku mutwi gwigwe ma naagona. 12Yalota ndi, ololi ingasi kutura mwigulu na idiiri ku lirova. Zingelosi va Nyasaye vanina kuzia igulu kandi viika hasi. 13Havundu hene yaho, yalora Yahova nasingiyi halovega. Yavoola, “Inzi mbeeye Yahova, Nyasaye wa Aburahamu kandi Nyasaye wa Isaka. Ndakahaane ku ivi kivala chogoniku yiki, harara ni visukululwi vivio. 14Visukululwi vivio vilakave vinyingi kuli luguchi loveeye ku lirova. Valalanda kutura Ivugwi kuduuka Imadioli, kandi kutura Ivaale kuduuka Isavaalu. Kuvitira mu ivi ni visukululwi vivio, ndakagasizi zihiiri ziosi. 15Wizulizi, Inzi ndava harara na ivi kandi ndakukukingi havundu hoosi ha uzia; kandi ndakakwiranye mukivala yiki. Si ndakakoleke mba, kuduuka lwa ndakaduukizi goosi aga mali kukulaga.”

16Maku Yakobo yavuka kutura mu zindolo, navoora, “Gaveeye agiligali Yahova aveeye havundu hano navuzwa si ndamanya mba!” 17Yaali nuvuti na yavoola, “Havundu yaaha haveeye hu kutihiza ligali! Kuduuka haveeye inyumba ya Nyasaye; kandi kuduuka have kirivwa chu mu ligulu.”

18Kunangwa Yakobo yavuka mugambazuri lidiku lialondaku, navugura ligina lia yaali navikiku mutwi, ma naalisingiliza havundu hene yaho kuli itiiru. Maku yitulaku amaguta ga muzeituni; na chaali kimanyiru ndi yaaha na havundu hatakatifu ha Nyasaye. 19Yalanga havundu yaaha “Bezeli#28:19 Bezeli: Yili ni lieta liu Luheburaina, liveeye kovora “Inyumba ya Nyasaye.”” navuzwa maziambiri halangwa Luzi. 20Maku Yakobo yalomba lilagana na Yahova navoora, “Niiva ulava harara ninzi nukuninda kologendo lwange, kandi kumba chukulia nizinguvu, 21Kandi niiva ndirana mu mirembe hango ha baba wange, kunangwa ivi ulakave Nyasaye wange. 22Havundu hamali kuviika ligina liu kwizulizilaku yaaha, halava hu kukusigamira; kandi ku viosi via uhaana ku inzi, ndahaana ku ivi kidieli chi likomi.”

Currently Selected:

LITANGA 28: LOGOOLI

Highlight

Copy