LITANGA 26

Isaka Yamenya Ha Gerari

1Inzara yindi yaduuka mukivala kuli iyaaliho yu kutanga mu ing'inga ya Aburahamu. Isaka yazia ku Abimeleki, mwami wa Filisitia ha Gerari. 2Yahova yaali naloleki ku Isaka namuvooleye, “Utazia Egebeti mba; omenye mukivala yiki, uwa inzi ngovolera omenye. 3Omenye hano, na ndava harara na ivi, kandi ndakugasiza. Ndakuha kivala yiki choosi harara nivisukululwi vivio. Ndalonda lilagana lia ndalomba na baba woovo Aburahamu. 4Ndakuha visukululwi vinyingi kuli zing'ereng'ani ziu mwigulu, kandi ndakavahe kivala yiki choosi. Zihiiri ziosi zilakateeve inzi kuzigasiza kuli mali kugasiza visukululwi vivio. 5Ndakagasizi ivi, kigira Aburahamu yatia kandi yalonda malago gange.”

6Kunangwa Isaka yamenya ha Gerari. 7Lwa vasaza vamenya yo, vateva kigira mukali weve, yavoola ndi aveeye mbozo weve. Siyaali anyala kuvugilira ndi aveeye mukali weve mba, kigira yaali nuvuti ndi valamwita ma vavuguli Rabeka kigira yaali niligondo lilahi ligali. 8Lwa Isaka yaali ni yakavayo ku ing'inga indambi, mwami Abimeleki wa Filisitia yahenzelera mu lidirisia ma nalora Isaka na Rabeka vavusanaa. 9Kunangwa Abimeleki yalanga Isaka navoora, “Ng'ani uyu numukali woovo! Kigira ki novoora ni mbozo woovo?”

Isaka yativura, “Inzi ndaaganagana nditwa niiva ndavoora aveeye mukali wange.”

10Abimeleki yavoola, “Nikindiki cha okokoleeye yiki? Musaza wiitu mulala anyala kuva niyaali harara numukali woovo na ivi wakaduliywi kumahiolo yaga.” 11Kunangwa Abimeleki yiganihiza vandu vosi navoora, “Umundu woosi okolera musaza uyu anoho mukali weve vudamanu aliitwa.”

12Isaka yamiiza vuguza mukivala yicho, kandi ku muhiga mulala mwere yigwo yagesa haali mia ku vwayaali niyamiiza, kigira Yahova yaali na mugasizi. 13Yaazizagilira kugasizwa kandi naagwa umundu mutugi ligali. 14Avandu va Filisitia vamukolera embodoka kigira yaali niviayo vinyingi via magondi, nizing'ombe, kandi na vatumikiri vanyingi. 15Kunangwa vililiza vidaho via vatumikiri vababa weve Aburahamu vayava lwa yaali nakikiri mwoyo.

16Maku Abimeleki yavolera Isaka, “Tula mukivala chiitu. Ivi umali kuva umundu wi zinguru kukuvita.” 17Kunangwa Isaka yazia ma niyumbaka lihema mu Livona lia Gerari kandi namenya yo. 18Yayava kandi vidaho viali niviayavwa mu ing'inga ya Aburahamu kandi viali nivililizwa inyima wa Aburahamu yaali ni yakakuza. Isaka yalanga vidaho yivio amita malala mere aga baba weve yaali ni yavilanga.

19Lwa avatumikiri va Isaka valima mu livona, vanyoola kidaho cha mazi. 20Navuzwa avayi vu mulivona lia Gerari valembana navayi va Isaka nivavoora ndi, kidaho ni chavo. Kunangwa kidaho chagulikwa, “Lirembana”, kigira vaali nivarembani na Isaka.

21Avatumikiri va Isaka vayava kidaho kindi, kandi avayi valembanira ku. Kunangwa kidaho yicho chalangwa “Uvusigu”. 22Yatura ho kandi nayava kidaho kindi, umundu kali mulala si yarembanira ku mba. Yakigulika “Vovoholore”, navoora, “Kalunu Yahova umali kukuha vovoholore komenya mukivala yiki, kandi kulagaasizwa.”

23Isaka yatura nazia Beerisheba. 24Ku vudiku yivwo Yahova yaloleka kuye kandi navoora, “Inzi mbeeye Nyasaye wa baba woovo Aburahamu. Utatia mba. Mbeeye harara nivi. Ndakugasiza kandi ndakuha visukululwi vinyingi kigira lilagana liange kumutumikiri wange Aburahamu.” 25Isaka yumbaka hene yaho vwali kandi nasigamira Yahova. Maku yumbakaho lihema kandi navatumikiri veve vayava hene yaho kidaho.

Livugilizana Hagati ha Isaka na Abimeleki

26Abimeleki yaza kutura Gerari kolola Isaka harara na Ahuzazi muhaani weve wiziganagani kandi Fikoli munene wi liihi. 27Kunangwa Isaka yavateva, “Kigira ki muuzi kalunu okondola, na lwinyima simwali avalina vange mba, kandi mwangora kutura mukivala chiinyu?”

28Vaativura, “Kalunu kunyi kumanya ndi Yahova aveeye harara na ivi, kandi kuganagana ndi kuduuka livugilizana liveho hagati hiitu naivi. Kwenya ivi ukulage 29ndi ivi si ulakusaliriza mba, kuli kwaavula kukusaliriza. Kunyi kwaali avahocha ku ivi nikuleka nuzia mumirembe. Kalunu gaveeye havulavu ndi Yahova umali kukugasiza.” 30Kunangwa yavalombera lilia nivalia kandi nivanwa. 31Mugambazuri vuli mundu yalomba liesuha nu wundi ma ni vavugirizana maku Isaka yavasivula ma yavaleka ni vazia mumirembe.

32Ku lidiku yilio avatumikiri va Isaka vaza ni vamuvolera kigira kidaho cha vaali nivayavi. Vavoola, “Kunyi kumali konyoora mazi.” 33Kunangwa Isaka yagulika kidaho yiki Shiba#26:33 Shiba: Muluheburaina liveeye kovora, “Lilagana”.. Nindio lidaala linene lia Beerisheba lianyora lieta lialio.

Avakali va Esau vi Zihiiri Zindi

34Lwa Esau yaali ni mihiga 40, yaleeta avakaana va Hiti vaviri, Judizi mukaana wa Beeri na Basemazi mukaana wa Eloni. 35Vaakora limenya lia Isaka na Rabeka kuva lio vovereri.

Currently Selected:

LITANGA 26: LOGOOLI

Highlight

Copy