LITANGA 23
23
Likuza Kandi Liyavirwa lia Sara
1Madiku gi limenya lia Sara gaali mihiga 127. 2Yakuzira mu Heburoni mukivala cha Kanaani. Aburahamu yaasioma kigira likuza lia Sara mukali weve.
3Aburahamu yatura hu muviri gwu mukali weve gwaali nigoveeye, nazia ku vandu va Hiti, navavoolera, 4“Inzi mbeeye vuzwa mugeni omenyi hano hagati hinyu. Muyanze munguliziri kedonye chu mulimi kunangwa nduuki kuyaviramu muviri gwu mukali wange.”
5Avandu va Hiti vaamutivulira, 6“Ukuhulirizi, ivi mwami wiitu, kunyi kohenza ku ivi kuli mwimiliri wiitu wuvunyali. Ivi ulayavira muviri gwu mukali woovo mu kirindwa kilahi ligali cha koveeye nacho. Kulayaanza kuhaana ku ivi kirindwa, kunangwa uduuki kuyaviramu muviri gwu mukali woovo.”
7Maku Aburahamu yasingira ma niyinama imbiri wa vandu Vahiti vene kivala, 8navoora, “Niiva muvugiliraa inzi kuyavira muvili gwu mukali wange hano, yaanzi mundeevere Efuroni muyaayi wa Zohari 9yaanguliziri luhangaywa lwa Makipela, oloveeye ahimbi nu lwako lwu mulimi gwigwe. Mumuteeve yaanguliziri ku vuguli vuduukana imbiri winyu, kunangwa have hange hukuyavira vakuzu.”
10Efuroni yaali niyikaye harara na vandu va Hiti, havundu hu kwaganira, mu kirivwa chi lidaala, yativura imbiri wa vandu vosi, 11“Huliriza mwami wange, Inzi ndahaana ku ivi mulimi gwosi harara nu luhangaywa. Ndahaana mulimi yigu ku ivi imbiri wa vandu vange, kunangwa uduuki kuyaviramu muviri gwu mukali woovo.”
12Maku Aburahamu yinama imbiri wa vandu va Hiti 13navolera Efuroni imbiri wa vandu va Hiti ndi, “Ndakayanzi kokoteeva unguliziri mulimi gwosi. Uvugiliri mitungu jange, na inzi ndayavira muviri gwu mukali wange hene yaho.”
14Efuroni yativulira Aburahamu, 15“Mwami wange, mulimi goveeye gwu vuguli vwi vidonye vie ifeza 400, gene yago gaveeye kindiki hagati hiitu? Yavira mu muviri gu mukali woovo.” 16Aburahamu yaavugirizana na Efuroni, ma nagera vidonye vie ifeza 400 imbiri wa vandu va Hiti kolondekana ni ligera lia vakiranyi ma nahaana ku Efuroni.
17Kunangwa mulimi gwa Efuroni ugwali ha Makipela, Ivugwi wa Mamure, gwamanya nigugwa gwa Aburahamu. Mulimi yigu gwo gwalimu nu luhangaywa, kandi ni misaala josi. 18Mulimi yigu gwa manyikana kuva mwandu gwa Aburahamu imbiri wa vandu va Hiti vosi avavuganira ha kirivwa chi Lidaala.
19Inyima wa yaga, Aburahamu yaayavira muviri gwu mukali weve Sara mu luhangaywa lwu mulimi gwa Makipela, ugwali Ivugwi wa Mamure mukivala cha Kanaani. 20Kunangwa mulimi gwaali gwa vandu va Hiti gwamanya nigugwa mwandu gwa Aburahamu, guduuki kuva havundu hukuyavira vakuzu.
Currently Selected:
LITANGA 23: LOGOOLI
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
