LITANGA 22
22
Nyasaye Yaageriza Aburahamu Ahaane Isaka Kuli Kisiuviriru
1Inyima wa yaga Nyasaye yageliza Aburahamu; yamulanga, “Aburahamu!” Kandi Aburahamu yativura, “Yee, inzi mbeeye hano!”
2Nyasaye yavoola, “Uvuguli muyaayi woovo weng'ine Isaka, uwa wayanza ligali, kandi uzie mukivala cha Moria. Ivi ulamuhaana wene yira ku kiguru cha inzi manya ngumanyie kuli kisiuviriru ku inzi.”
3Mugambazuri kulidiku lilondaku Aburahamu yatema zingu zie kisiuviriru, yavika ku ibunda yeeye, kandi navugura Isaka harara na vatumikiri veve vaviri. Vataanga logendo kuzia havundu ha Nyasaye yaali namuvooleye. 4Inyima wa madiku gavaga Aburahamu yahenza ihale ma nalora havundu zana. 5Maku yavolera avatumikiri veve, “Mutigale hano harara ni ibunda. Muyaayi wange harara na inzi kulazia yira kusigamira Yahova kandi kulirana.”
6Aburahamu yavolera Isaka agingi zingu ziekisiuviliru, kandi nu mwene yaginga muvano namanda gukuhambizira muliru. Maku lwa vagenda vosi harara. 7Isaka yavoola, “Baba!”
Yativura, “Yee muyaayi wange?”
Isaka yateva, “Inzi ndolaa ndi oveeye namanda kandi niziingu, navuzwa kememe chi ligondi keveeye haliha chukwita kigira kisiuviriru?”
8Aburahamu yavoola, “Muyaayi wange, Nyasaye mwene alahaana kememe chi ligondi kuli kihanwa chu kusambwa.” Kunangwa vazia vombi harara.
9Lwa vaduuka havundu ha Nyasaye yaali namuvooleye, Aburahamu yumbaka vwali kandi nalohiza zingu. Yavoha muyaayi weve kandi namuviika ku vwali, igulu ku zingu. 10Maku yavugula muvano niyetegeka kusinza Isaka muyaayi weve. 11Navuzwa engelosi wa Yahova yamoloma nu mwoyo munene kutura mu ligulu, “Aburahamu, Aburahamu!”
Yativura, “Yee, inzi mbeeye hano.”
12Yavoola, “Utasaliriza muyaayi anoho kokora kindu kuye mba. Kalunu inzi manya ndi ivi ohezaa Nyasaye luyali kandi utizaa Nyasaye, kigira umali kumanyia ndi uvugilira kuhaana muyaayi woovo wengine kuli kisiuviriru kuye.”
13Aburahamu yahenza muzimbega ziosi kandi yalora ligondi likore niligumiliywi muvulimu nizinziga zialio. Yazia naalivugura kandi nalihaana kuli kihanwa chu kusambwa muvogono vwu muyaayi weve. 14Aburahamu yagulika havundu yaho “Yahova ahaanaa.” Kandi kali kuduuka kalunu avandu vavoola, “Yahova ahaanaa ku kiguru chiche.”
15Engelosi wa Yahova yalanga Aburahamu kutura mu ligulu lwa kaviri, 16“Inzi Yahova, nzisuha kulieta liange mwene ndi ndakugasiza ligali. Nomba liesuha yili kigira ivi watia inzi kandi wavugilira kuhaana muyaayi woovo weng'ine ku inzi. 17Inzi ndagaa ndi ndakakohe visukululwi vinyingi kuli zing'ereng'ani ziu muligulu anoho muyeke gwu kunyanza. Visukululwi vivio vilakaguuti nukuvugula miandu ja madaala ga vasigu vaavo. 18Zihiiri ziosi zilakandeve nizigasiza kuli ndagasiza visukululwi vivio - Yaga goosi galakekoleke kigira ivi watia lilago liange.” 19Aburahamu na Isaka virana ku avatumikiri veve, kandi vazia harara mu Beerisheba wa Aburahamu yamenya.
Visukululwi via Nahoro
20Lwinyima Aburahamu yavolerwa ndi Milika yanyoora avana 8 ku amwavo woovo Nahoro: 21Uzi yaali muyaayi wukutanga, Buzi muyaayi wa kaviri, na Kemueli yivula Aramu, 22Shesedi, Hazo, Pilidashi, Jidilafi na Bezueli 23baba wa Rabeka. Milika yivula avayaayi 8 ku Nahoro amwavo Aburahamu. 24Reuma mukali muviika wa Nahoro yivula Teba, Gahamu, Tahashi na Maaka.
Currently Selected:
LITANGA 22: LOGOOLI
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
