LITANGA 15

Lilagana lia Nyasaye na Aburamu

1Inyima wi vindu yivi viosi, Yahova yaloleka ku Aburamu mu malola namuvolera, “Aburamu, utatia mba. Inzi ndakukinga kutura ku vuhimwa vwosi kandi ndakuha madanyi manene ligali.”

2Navuzwa Aburamu yativura, “O, Mwami Munene Yahova, madanyi yaga nagangonye naki? Kigira inzi si mbeeye nu mwana mba. Umundu wa inzi mbeeye naye weng'ine ni Elieza wa Damasiko. Uyu niyie ulivugula miandu jange. 3Ivi si wayimbaku mwana mba, navuzwa mulala ku vatugwa vange alakavuguri miandu jange.”

4Maku Yahova yavolera Aburamu, “Mutugwa Elieza uyu si alavugula miandu jijo mba, navuzwa mwana woovo mwene niyie ulivugula miandu jijo.” 5Yahova yavugula Aburamu naamuhira ichova namuvolera, “Henza mu ligulu ma uvalizi zing'ereng'ani niiva unyala. Ivi ulakave ni visukululwi vinyingi kuli zing'ereng'ani.”

6Aburamu yasuuvira Yahova, na kigira yaga, Yahova yayanzizwa naye kandi yamuvugilira kuva mundu mulungi.

7Maku Yahova yamuvolera, “Inzi mbeeye Yahova, uwakoleta kutura Uru mukivala cha Babiloni, ninguha kivala yiki keve miandu jijo.”

8Navuzwa Aburamu yamuteeva, “Mwami munene Yahova, inzi nyara kumanya ndi kivala yiki keveeye change?”

9Yahova yamuvolera, “Ndetele kemoli chi mihiga jivaga, imburi yi mihiga jivaga ligondi limigu lie mihiga jivaga kandi likuulu harara ni kidudi.” 10Aburamu yamuletera vindu yivi viosi, naakalagamu hagati, ma naviika vidieli vilala ku lovega lulala ni vindi ku lovega lundi. Navuzwa si yakalaga manyonyi mba. 11Lwi zisoti ziaza kulia zinyama yizi, Aburamu yaazikunga.

12Lwi liuva liayera, Aburamu yagona. Hene yaho, kisundi kenene chi litihiza chaza kuye. 13Maku Yahova yavolera Aburamu, “Visukululwi vivio vilava vigeni mu kivala kegeni; vilava vatumwa wene yeyo kandi viladambizwa ku mihiga 400. 14Navuzwa inzi ndakahaane mageri ku ihiiri ya vatumikira kuli vaatumwa. Lwinyima valanyora miandu minyingi. 15Navuzwa ivi ulamenya kuduuka uhindiri, ulakuza na ulatevwa ni mirembe. 16Ku ing'inga ya makura gane, imbiri wi visukululwi vivio vilirana hano, kigira inzi si ndakunga vandu va Amori mba, kuduuka lwa vakora uvudamanu ma vanyoore amageri.”

17Lwa liuva liayera, kisundi chaliho; inyingu yu muliru gwu mwochi kandi ulumuli lwi kiyayi nonoho viavitira hagati hi vidonye vie zinyama. 18Ku lidiku liene yilio, Yahova yalomba lilagana na Aburamu; Yavoola, “Inzi ndagaa kuhaana ku visukululwi vivio kivala yiki choosi kutura ku lwako lwu mugera gwa Egebeti kuduuka ku mugera gwa Efurate, 19harara ni vivala via vandu va Keni, Kadimoni, 20Hiti, Peri, Refaimu, 21Amori, Kanaani, Girigashi na Jebusi.”

Currently Selected:

LITANGA 15: LOGOOLI

Highlight

Copy