VATUMWA 14

1Kuli kazozo, Paolo na Baranaba vingira mu lisinagogi lia Vayuda ha Ikoniamu vilwaza nu vuluviliri kuduuka kiduma kenene cha Avayuda na Vaguriki nivasuuvira. 2Navuzwa Avayuda vandi avavura kusuuvira vagemehiza nivakora mioyo ja avandu vi Zihiiri jivihilirwi nu kuhingira avaamitu yavo. 3Kunangwa Paolo na Baranaba vazizagilira komenya yo ku ing'inga indambi ni vilwaza nu vuluviliri makuva gu Mwami Yeso. Mwami naye yalolekiza agiligali gi likuva lia vilwaza, lie zimbavasi zizie, ku livaha zinguru zio kokora vilolekizu kandi viokogenyia. 4Navuzwa avandu vi lidaala yilio vavukana: avalala vaali kolovega lwa Avayuda, na avandi nivava kolovega lwa avatumwa.

5Kunangwa avalala ku avandu vi Zihiiri na Vayuda harara na avanene vaavo, vatovora kokora uvudamanu ku avatumwa, nukuvalasa amagina. 6Lwa Avatumwa vahulira agene yago, virukira Lusitura na Deribe amadara ga Lukaonia, nu mu kivala chahimbi. 7Vilwaza Ivangeri ya Nyasaye mu kivala chene yicho.

Paolo na Baranaba vilwaza mu Lusitura na Deribe

8Mu lidaala lia Lusitura, yaali ho nu mundu mulala niyikaye, uwaali niyalema virenge kutura niyiivulwa kandi siyakaali niyagenda ku mba. 9Mundu uyu yahulirizaa ligali lwa Paolo yilwaza. Paolo yamwumika vudinyu, kandi lwa yamulola naveeye ni lisuuvira lio kohonywa, 10yavoola nu mwoyo munene, “Singira vulungi!” Mulema oyo yasingira vwangu na atangaa kogenda. 11Lwi viduma via avandu valora aga Paolo yakola, vahanzuka nivavoora mu lulimi lwu Lukaonia, “Vanyasaye vazi ku kunyi vaveeye kuli vandu!” 12Valanga Baranaba Zeu; na Paolo Herime, kigira niyie uwaali mumolomi munene. 13Musaalisi wi Litembeli lia Zeu iliali ichova wi lidaala, yaleeta zigiriki zivoheeywi ku amalande ha kirivwa chi Litembeli, kigira oyo harara ni kiduma, venya kuhaana kisiuviriru ku avatumwa. 14Baranaba na Paolo lwa vahulira yaga, vatandula zinguvu ziavo mu vutima, nivanyagura zimbiru kuzia mu kiduma, nivavoora nu mwoyo munene, 15“Avandu munyi, kigira ki mukoraa vindu yivi? Kunyi kandi koveeye avandu kuli munyi. Koveeye hano kumwilwaazira Ivangeri ya Nyasaye, kunangwa muduuki koleka visiuvililu via vuzwa yivi, mwirane ku Nyasaye oveeye mwoyo, Nyasaye walomba ligulu ni lirova, kandi inyanza, nivindu viosi viveeye mu. 16Mu zing'inga ziavita Nyasaye yahaana vovoholore ku zihiiri ziosi zikole aga ziyaanzaa ziene. 17Navuzwa siyaleka kwelolekiza mwene ku likora amalahi. Amanyia uvulahi vwivwe na amukubizira imbura kutura mwigulu, amuhezaa ligesa mu mihiga jalio, amuhezaa viukulia nu ukwizuliza uvusangari mu mioyo jinyu.” 18Kali niiva vavoola amakuva yaga, sivwaali vodoto kwigalira avandu yavo vavuli kuvahaanira visiuviliru mba.

19Navuzwa Avayuda valala vaza kutura Andiokia ya Pisidia na Ikoniamu. Vagoonya avandu nivavaleeta kolovega lwavo, ma nivalasa Paolo magina, nivamukulula nivamuluguta ichova wi lidaala, nivaganagana ndi umali kukuza. 20Navuzwa lwa vandu avasuuviraa vamukumberiza, yasingira niyiirana mu lidaala. Nu mugamba gwalonda ku, yatura harara na Baranaba nivazia Deribe.

Paolo na Baranaba viranaa mu lidaala lia Andiokia ya Siria

21Lwa vamala kwilwaza Ivangeri mu lidaala lia Deribe, vanyoola vandu avasuuviraa avanyingi, ni vatanga logendo kwirana Andiokia ya Pisidia, kuvitira Lusitura na Ikoniamu. 22Vadinyiriza mioyo ja vandu avasuuviraa va madaala yaga, nivavameeda zinguru vamenye ligali mu lisuuvira. Vavavolera, “Gakuduukiraa kunyi kwosi kuvitiri mu vusaliri vonene kuduuki kwingira mu Vwami vwa Nyasaye.” 23Vaatovora avakulundu nivavaviika mu makanisa goosi aga vandu vasuuviri; kandi lwa vamala kusaala no kohonga lilia, vavaviika hasi mu vulindi vwu Mwami wa vaali ni vaviiki lisuuvira liavo muye.

24Lwa vamala kuvitira mu kivala cha Pisidia, vaduuka Pamufilia. 25Inyima wu kwilwaza likuva mu Periga vazia Atalia. 26Kutura yo vanina mu liato nivirana Andiokia ya, wa Siria vaviikwa mu vulindi vwi zimbavasi zia Nyasaye ku miyinzi ja vaali nivamaliyi.

27Lwa vaduuka Andiokia vavuganyia likanisa lia ahene yaho, nivavavoolera amakuva gi vindu viosi via Nyasaye yakola harara navo, kandi kuli yigulira avandu vi Zihiiri zindi kiliango chu kwingira mu lisuuvira. 28Vamenya harara na vandu avasuuviraa yavo ku ing'inga indambi.

Livugana lia avatumwa navakulundu mu Jerusalemi

Currently Selected:

VATUMWA 14: LOGOOLI

Highlight

Copy