Matayo 2

1Inyinga Yesu yivulwa mu Bethlehemu lyo Buyuda mmadiku ga Herodi mwami, henza, Avageeri va twula ivugwe, vadza Yerusalemi, ni va vola, 2A veye haliki wivuywi Mwami wa Vayuda? Kigira kwa lola ing'ereng'ani yeye ivugwe, ku udzi kumsigamira. 3Herodi mwami lwa ya hulira, ya henda mwoyo na va Yerusalemi vosi halala naye. 4Na a vungidza halala vasalisi vanene vosi navang'odi vavandu, ya va teva, Kristo a livulwa haliki? 5Yava va mbolera Mu Bethlehemu lye Buyuda, kigira ga ng'odwa ndi nomprofeti.

6Na ive Bethlehemu, mu kivala kyo Buyuda,

Si u li mke ku vanene vo Buyuda

Kigira mwami a la twula ku ive,

U li va mwayi wa vandu vange Israeli

7Ku, Herodi ya langa Avageeri makiriri, na a nyola kuvo inyinga iigali yeng'ereng'ani ya loleka. 8Na a va tuma kutsia Bethlehemu, na a va volera, Mu tsie, mwenye ligali amakuva gomwana; kandi lwa mu mu nyola, mu udze kumbolera, inze kandi ntsie kumusigamira. 9Navo lwa va mala kuhulira mwami, va tsia; kandi henza, ing'ereng'ani ya va lola ivugwe ya vimirira, yadza ni i singira igulu homwana ya li. 10Lwa va lola ing'ereng'ani, va yanza nobuyanzi ubunene ligali. 11Kandi vingira munyumba ni va lola mwana na Maria mama wewe, ni va gwa ni va mu sigamira, ni va boholola tsikiba tsyavo, ni va mu ha vihaanwa, itha habu, kimuli, nemanemane. 12Ni va gerehidzwa mmaloto, va tirana ku Herodi, va tsia mu kivala kyavo kunzira yindi.

13Lwa va mala kutsia, henza, ingelosi wo Mwami ya loleka ku Yosefa mmaloto, na a vola, Singira, u hile mwana na mama wewe, wiruke u tsie Egepeti, u menye yo ndadza nduke kukuvolera: kigira Herodi a lenya mwana kumwiita. 14Na a singira na a vugula mwana na mama wewe mbudiku, na a tsia Egepeti; 15na a menya yo likudza lya Herodi ni li luha ni li duka: ga duke kukolwa ago Mwami ya vola nomunwa gwomprofeti, na a vola, Nda langa mwana wange kumtwulidza mu Egepeti. 16Kunangwa Herodi, lwa ya lola Avageeri va mkolera kihenyahenye, ya vihirirwa ligali na a tuma avandu ni yiita avana avayai vosi ve Beth lehemu na vosi vekivala kya li himbi, ava duka mihiga gyiviri nava kikiri kuduka, kuli inyinga ya Vageeri va mlungika. 17Hene yaho ga kolwa agomprofeti Jeremia ya vola, na a vola.

18Mwoyo gwa hulirwa mu Rama,

Lilira nelisyoma linene,

Raheli a syomira avana veve,

Kandi si ya yanza kukiring'anywa, kigira si va li ho.

19Navutswa Herodi lwa ya kudza, henza, ingelosi wo Mwami ya loleka ku Yosefa mmaloto mu Egepeti, na a vola, 20Singira, u vugule mwana na mama wewe, u tsie mkivala kya Israeli: kigira va mali kukudza avenya kwiita mwana. 21Naye ya singira na a vugula mwana na mama wewe, na a duka mkivala kya Israeli. 22Navutswa lwa ya hulira Arkelao wamehi mu Buyuda mbugono bwa Herodi ise wewe ya tia kutsia yo; kandi na a gerihidzwa mmaloto ya twula ho na a tsia mkivala kya Galilaya. 23Na a duka kumenya mu lidala lya langwa Nazareti; ga duke kukolwa aga volwa nomunwa gwavaprofeti, a la langwa Munazareti.

Currently Selected:

Matayo 2: MBE

Highlight

Copy