Kyavalevi 8

1Na Yahova ya volera Musa nokuvola, 2Vugula Haruni na avana veve halala naye, na tsingubo, na maguta gokuvaka, na igiriki yekihaanwa kyobwoni, na magondi makole gaviri, na kihinda kyobukima bu ta li na mamera; 3na u vugannye livugana lyosi ha kiliango kyelihema lyokuvuganira mu. 4Na Musa ya kola kuli Yahova ya mu laga; na livugana lya vugannywa ha kiliango kyelihema lyokuvuganira mu. 5Na Musa ya volera livugana, Yili ni likuva lya Yahova va laga li kolwe.

6Na Musa ya leta Haruni na avana veve, na a va singa na amadzi. 7Na ya vika kuye likoti, na a mu boha nomusipi, na a mu vika ijoho, na a mu vika kisibao, na a mu boha musipi gwekisibao gwemiyinzi gyomusidza. 8Na ya vika kuye isalamba yomukiritu: na a vika Urim na Thumim mu isalamba yomukiritu. 9Na ya mu vika igudwa ku mutwe gwigwe; na ku igudwa, mbweni ya vika ku kibale kyethahabu, itaji intakatifu; kuli Yahova ya laga Musa.

10Na Musa ya vugula maguta gokuvaka, na a vaka lihema na vyosi vi veye mu, na a vi takasa. 11Na yuha maguta ku bwali hali katano na kaviri, na a vaka ubwali na viju vyabwo vyosi, na lwero, na bwikaliru bwalwo, kuvitakasa. 12Naya tsuka maguta gokuvaka ku mutwe gwa Haruni, nokumuvaka kumutakasa. 13Na Musa ya leta avana va Haruni, na a va vika makoti, nokuvaboha misipi, na a va vika tsigudwa; kuli Yahova ya laga Musa.

14Kandi ya leta igiriki yekihaanwa kyobwoni: na Haruni na avana veve va vika makono gavo ku mutwe gwegiriki yekihaanwa kyobwoni. 15Na ya giita; na Musa ya vugula masahi, na a ga vika ku tsinziga tsyobwali tsimbega tsyosi nekidete kikye na a takasa ubwali, na a tsuka masahi isi wobwali kubutakasa, a duke kubulombera kyokukunika ubwoni. 16Na vugula tsitinya tsyosi tsyo mmunda, na inderwa yelikudumani, na tsimbigu tsyombi, na maguta gatsyo; na Musa ya vi sambira ku bwali. 17Navutswa igiriki, na lisero lyayo, na inyama yayo, na ubose bwayo, ya samba nomuliru kyova wa hokusosa; kuli Yahova ya laga Musa.

18Na ya haana ligondi likole lyekihaanwa kyokusambwa: na Haruni na avana veve va vika makono gavo ku mutwe gweligondi likole. 19Na ya liita; na Musa yuha masahi ku bwali tsimbega tsyosi. 20Naye ya donnya ligondi; na Musa ya samba ni mutwe, na vidonye, na maguta. 21Na yogidza vyomunda, ne virenge na amadzi; na Musa ya samba ligondi likole lyosi ku bwali: kya li kihaanwa kyokusambwa kuva mwayu: kya li kihaanwa kya haanwa nomuliru ku Yahova; kuli Yahova ya laga Musa.

22Naye ya haana ligondi likole lindi, likole lyokutakasa: na Haruni na avana veve va vika makono gavo ku mutwe gwelikole. 23Na ya liita; na Musa ya vugula ku masahi galyo, na a ga vika ku isonga yo gutu gwa Haruni igulu gwo mukono mulungi, noku kidete kikye kinene kyomukono mulungi, noku keno kikye kinene kyekirenge kilungi. 24Na ya leta avana va Haruni; na Musa ya vika masahi ku tsisonga tsya amatu gavo igulu aga mukono mulungi, noku videte vyavo vinene vyamakono malungi, noku vino vyavo vinene vyevirenge vilungi: na Musa yuha masahi ku bwali tsimbega tsyosi. 25Na ya vugula vivana, na musenbe, na tsitinya tsyosi tsyomunda, na inderwa yelikudumani, na tsimbigu tsyombi, na tsitinya tsyatsyo, na kinama kyomukono mulungi: 26Na mu kihinda kyobukima bu ta li na mamera, kya li imbiri wa Yahova, ya vugula mu imango indala, na imango yindi ya vakwa maguta, na kyapati kilala, na a vi vika ku maguta, noku kinama kyomukono mulungi: 27na ya vika vyosi mu makono ga Haruni, nomu makono ga avana veve, na a vi hungudza vi ve kihaanwa kyokuhungudza imbiri wa Yahova. 28Na Musa ya vi vugula mu makono gavo, nokuvisamba ku bwali ku kihaanwa kyokusambwa: vya li vyokutakasa, vi ve mwayu; kya li kihaanwa kya lombwa nomuliru ku Yahova. 29Na Musa ya vugula indasi, na a gi hungudza i ve kihaanwa kyokuhungudzwa imbiri wa Yahova: kya li kidieli kya Musa ku likole lya haanwa kutakasa, kuli Yahova ya laga Musa.

30Na Musa ya vugula ku maguta gokuvaka, noku masahi agoku bwali ni yuha ku Haruni, ku tsingubo tsitsye, noku avana veve, noku tsingubo tsya avana veve halala naye, na ya takasa Haruni, na tsingubo tsitsye, na avana veve, na tsingubo tsya avana veve halala naye.

31Na Musa ya volera Haruni na avana veve, Mu dekere inyama yiyi ha kiliango kyelihema lyokuvuganira mu: na mu lire ho nobukima bu veye mu kihinda kyokutakasa, kuli nda laga, nokuvola, Haruni na avana veve va la vi lia. 32Na ki tigala ku yivyo, inyama na ubukima mu la samba nomuliru. 33Na mu ta twula mu kiliango kyelihema lyokuvuganira mu madiku gatano na gaviri, kuduka madiku gelitakaswa lyenyu ga dukidzwa: kigira a la mu takasa madiku gatano na gaviri. 34Kuli ga kolwa lero, ni ndiyo Yahova ya laga kukolwa, kulombera mwinye kyokukuniko ubwoni. 35Na mu la menya ha kiliango kyelihema lyokuvuganira mu madiku gatano na gaviri, mbasu nobudiku, nokulinda ubulindi bwa Yahova mu vule kukudza: kigira ni ndiyo ndageywi. 36Kunangwa Haruni na avana veve va kola makuva gosi ga Yahova ya laga nomunwa gwa Musa.

Currently Selected:

Kyavalevi 8: MBE

Highlight

Copy