Kyavalevi 4

1Kandi Yahova ya volera Musa, nokuvola, 2U volere avana va Israeli, nokuvola, Mundu na a va na a kola ubwoni bugira lisaavira, ku likuva lyosi lya Yahova ya gaya li ta kolwa, na a kola lilala kugo: 3musalisi wa vakwa na a va na kola ubwoni kuduka kuleta kyokukalagirwa ku avandu, hene yaho a haane kigira ubwoni bwibwe, bwa ya kola, a la haana ku Yahova kimoli kigiriki ki dukanu kuva kihaanwa kyobwoni. 4Na a la leta kimoli kigiriki ha kiliago kyelihema lyokuvuganira mu imbiri wa Yahova; na a la vika mukono gwigwe ku mutwe gwegiriki, nokugiitira igiriki imbiri wa Yahova. 5Na musalisi wa vakwa s maguta a la vugula ku masahi gekimoli, nokugaleta ku lihema lyokuvuganira mu: 6na musalisi a la vika kidete kikye mu masahi, nokuguuha imbiri wa Yahova hali gatano na kaviri, imbiri wengubo yokukinga hatakatifu. 7Na musalisi a la vika masahi ku tsinziga tsyobwali tsyokusamba kimuli kyomwayu imbiri wa Yahova, bu veye mu lihema lyokuvuganira mu; na masahi gosi gekimoli a la tsuka hasi hobwali bwokusamba ku, vihaanwa, bu veye ha kiliango kyelihema lyokuvuganira mu. 8Na itinya yosi yekimoli kyekihaanwa kyobwoni a la gi twulidza; itinya yomunda, na itinya yosi yoku amala 9na tsimbigu tsyakyo tsyombi, na itinya yatsyo, i veye himbi nekisindi, na inderwa yoku likudumani, halala netsimbigu, yivi vyosi a la vi twulidza, 10kuli vi twulidzangwa ku igiriki yekihaanwa kyemirembe: na musalisi a la vi samba ku bwali bwekihaanwa kyokusamba. 11Na lisero lyekimoli, na inyama yakyo yosi, halala no mutwe, ne virenge, na vyomunda, na ubose, 12kali kimoli kyosi a la hila kyova wa hokusosa nokukidukidza halahi, ha va tsukanga ligoke, na a la ki samba nomuliru ku tsinku; a la ki sambira heligoke li tsukangwa.

13Na livugana lyosi ni li va ni li kola ubwoni, na inkuva yiyi ni i visika mu tsimoni tsyelivugana, navo va koli kindu ku vindu vyosi vya Yahova ya gaya vi ta kolwa mba, na va nyoye likalagirwa; 14lwa ubwoni bwa va kola bu manyekana, hene yaho livugana li la haana kimoli kigiriki ki ve kihaanwa kyobv oni, nokukileta imbiri welihema lyokuvuganira mu. 15Na avakulundu velivugana va la vika makono gavo ku mutwe gwekimoli kigiriki imbiri wa Yahova; na kimoli kiliitirwa imbiri wa Yahova. 16Na musalisi wa vakwa maguta a la leta masahi gekimoli kigiriki mu lihema lyokuvuganira mu: 17na musalisi a la vika kidete mu masahi, nokuguuha imbiri wa Yahova, hali katano na kaviri, imbiri wengubo yokukinga. 18Naye a la vika masahi malala ku tsinziga tsyobwali bu veye imbiri wa Yahova, bu veye mu lihema lyokuvuganira mu; na masahi gosi a la ga tsuka hasi hobwali bwekihaanwa kyokusambwa, bu veye ha kiliango kyelihemalyokuvuganira mu. 19Na a la twulidza itinya yakyo yosi nokugisamba ku bwali. 20Na ndiyo a la kola ku kimoli kigiriki; kuli ya kola ku kimoli kigiriki kyekihaanwa kyobwoni, a la kola ndiyo ku yiki; na musalisi a la va lombera kyokukunika ubwoni, na va la samefwa. 21Na a la hila kimoli kigiriki kyene kyova wa hokusosa, nokukisamba nomuliru kuli ya samba kya matsyambiri, ki ve kihaanwa kyobwoni kyelivugana.

22Na mwamehi lwa a kola ubwoni bugira lisaavira, kilala ku vyosi vya Yahova Nyasaye wewe u gayi vi ta kolwa mba, naye a nyoye likalagirwa; 23na a va na u vuulirwa ubwoni bwibwe bwa ya kola, a la haana kihaanwa kikye, ki la va imbuli ikole indukanu. 24Na a la vika mukono gwigwe ku mutwe gwekole zana, nokugiitira ha viitiranga kihaanwa kyokusambwa imbiri wa Yahova: i veye kihaanwa kyobwoni. 25Na musalisi a la vugula ku masahi gekihaanwa kyobwoni nekidete kikye, nokugavika ku tsinziga tsyobwali bwekihaanwa kyokusambwa, na masahi gayo a la ga tsuka hasi hobwali bwokusamba kihaanwa. 26Na itinya yayo yosi a la gi samba ku ubwali, kuli itinya yekihaanwa kyemirembe; na musalisi a la lombera uyu ku bwoni bwibwe, kyokukunika, naye a la samefwa.

27Kandi ku vosi mundu ku vandu vekivala na a va na a kola ubwoni bugira lisaavira, na a kola kilala ku vindu vya Yahova ya gaya vi ta kolwa mba, na a nyola likalagirwa; 28na a va na a vuulirwa ubwoni bwibwe bwa ya kola, hene yaho a la haana imbuli, isuveni indukanu, kigira ubwoni bwibwe bwa ya kola. 29Naye a la vika mukono gwigwe ku mutwe gwekihaanwa kyobwoni nokwiita kihaanwa kyobwoni ha kihaanwa kyokusambwa kiitirwa. 30Na musalisi a la vugula ku masahi gakyo nekidete kikye, nokugavika ku tsinziga tsyobwali bwekihaanwa kyokusambwa; na masahi gakyo gosi a la tsuka hasi hobwali. 31Na a la twulidza itinya yakyo yosi, kuli itinva: twulidzangwa ku kihaanwa kyemirembe; na musalisi a la gi sambira ku bwali i ve mwayu ku Yahova; na musalisi a la lombera uyu kyokukunika ubwoni, na a la samefwa.

32Na a va na a leta kimeme kyeligondi kuva kihaanwa kikye kyobwoni, a la ki leta isuveni indukanu. 33Na a la vika mukono gwigwe ku mutwe gwekihaanwa kyobwoni, nokukiita ki ve kihaanwa kyobwoni ha viitiranga kihaanwa kyokusambwa. 34Na musalisi a la vugula ku masahi gekihaanwa kyobwoni ne kidete kikye, nokugavika ku tsinziga tsyobwali bwekihaanwa kyokusambwa, na masahi gakyo gosi a la tsuka hasi hobwali: 35na a la twulidza itinya yakyo, kuli itinya i twulidzangwa ku kimeme kyeligondi kyevihaanwa vyemirembe, na musalisi a la gi samba ku bwali, kuli vihaanwa vya Yahova vyokuhaanwa nomuliru; na musalisi a la lombera uyu kyokukunika ubwoni, ku bwoni bwibwe twa ya kola, naye a la samefwa.

Currently Selected:

Kyavalevi 4: MBE

Highlight

Copy