Kyavalevi 14

1Kandi Yahova ya volera Musa, na a vola, 2Yili li la va lilaga lyomugere mu lidiku lyelitakaswa lilye: a la letwa ku musalisi: 3na musalisi a la tsia kyova wa hokusosa; na musalisi a la henza; na henza, lilwala lyobugere ni li va ni li honi ku mugere, 4heneyaho musalisi a la laga ga vugulirwe uyu a la takaswa, manyonyi gaviri malahi ga veye mwoyo, na musala gwa mutaragwa, na inzakanyu, na husupo: 5na musalisi a la laga kwiita lilala ku manyonyi mu inyingu igulu ku madzi gomugera. 6Kandi linyonyi li veye mwoyo a la li gumira, na mutaragwa, na inzakanyu, na husupo, navyo vyosi a la viina mu masahi gelinyonyi liitwa igulu ku madzi gomugera: 7na a la guuha hali gatano na gaviri ku uyu wa li kutakaswa ku bugere, na a la vola a veye mulahi, na a la lakula linyonyi li veye mwoyo, li tsie. 8Na uvu wa li kutakaswa a logidza tsingubo tsitsye, nokuvega lisu lyosi lilye nokwisinga mu amadzi; na a la va mulahi: na inyima wa yaga a lingira mu hokusosa, navutswa a la menya kyova welihema lilye madiku gatano na gaviri. 9Na ku lidiku lya gatano na gaviri, a la vega lisu lilye lyosi lyoku mutwe gwigwe na tsinderu tsitsye na tsingohe tsitsye, kali lisu lilye lyosi a la vega: na a logidza tsingubo tsitsye, nokwisinga mubiri gwigwe mu amadzi, na a la va mulahi.

10Kandi ku lidiku lya gatano na gaviri a la leta vimeme viviri vikole vidukanu, na kimeme kisuvini kyomuhiga mulala kidukanu, na vidieli vibaka ku vyelikumi vyobusie, bunyuki kuva kihaanwa kyobusie bu tsukanywa namaguta, na kigero kyamaguta. 11Na musalisi u mu takasanga a la singeridza mundu wa li kutakaswa, halala na vindu yivyo, imbiri wa Yahova, ha kiliango kyelihema lyokuvuganira mu. 12Na musalisi a la vugula kilala ku vimeme vikole, nokukihaana kuva kihaanwa kyelihyolo, halala nekigero kya maguta, na a la vi hungudza kuva kihaanwa kyokuhungudzwa imbiri wa Yahova: 13na a liitira kimeme zana ha vitiiranga kihaanwa kyobwoni, na kihaanwa kyokusambwa, hango hatakatifu: kigira kuli kihaanwa kyobwoni ki veye kyomusalisi, kandi kihaanwa kyelihyolo ki veye ndiyo: ki veye kitakatifu ligali. 14Na musalisi a la vugula ku masahi gekihaanwa kyelihyolo, na musalisi a la ga vika ku gutu gwomukono mulungi gwa uyu wa li kutakaswa, noku kidete kyomukono mulungi gwigwe, noku keno kinene kyekirenge kilungi kikye. 15Na musalisi a la vugula ku kigero kyamaguta, nokugatsuka mu kigalo kikye mwene kyomukono mmosi; 16na musalisi a liina kidete kyomukono mulungi mu maguta ga veye mu mukono gwigwe mmosi na a luuha maguta nekidete, hali gatano na gaviri imbiri wa Yahova: 17Noku maguta ga tigala mu mukono gwigwe a la ga vika ku isonga yo gutu gwomukono mulungi gwa uyu wa li kutakaswa, noku kidete kinene kyomukono mulungi gwigwe, noku keno kinene kyekirenge kilungi kikye, ku masahi gekihaanwa kyelihyolo: 18na maguta ga tigala mu mukono gwomusalisi a la vika ku mutwe gwa uyu wa li kutakaswa: na musalisi a la lombera uyu kyokukunika ubwoni imbiri wa Yahova. 19Na musalisi a la haana kihaanwa kyobwoni, nokulombera uyu wa li kutakaswa kyokukunika ubwoni kigira ubudamano bwibwe: na inyima a liita kihaanwa kyokusambwa; 20na musalisi a la haana kihaanwa kyokusambwa, na kihaanwa kyobusie ku bwali: na musalisi a la lombera uyu kyokukunika ubwoni, naye a la va mulahi.

21Naye na a va na a veye mudaka, na si a nyala kunyola vi duka kuli ndiyo, hene yaho a la leta kimeme kikole kilala kuva kihaanwa kyelihyolo kuhungudzwa, kumulombera kyokukunika ubwoni, na kidieli kilala kyelikumi kyobusie bunyuki bwa tsukanywa na maguta kuva kihaanwa kyobusie, na kigero kyamaguta; 22na makuulu gaviri, kinga makuulu matuge gaviri, kuli aga a nyala kunyola; na lilala li la va kihaanwa kyobwoni, na lindi li la va kihaanwa kyokusambwa. 23Noku lidiku lya gatano na gavaka a la ga leta ku musalisi, ha kiliango kyelihema lyokuvuganira mu, imbiri wa Yahova, ga ve gelitakaswa lilye: 24na musalisi a la vugula kimeme kyeligondi lyekihaanwa kyelihyolo, na kigero kyamaguta, na musalisi a la vi hungudza kuva kihaanwa kyokuhungudzwa imbiri wa Yahova. 25Na a liita kimeme kyekihaanwa kyelihyolo; na musalisi a la vugula ku masahi gekihaanwa kyelihyolo, nokugavika ku gutu gwomukono mulungi gwa uyu wa li kutakaswa, noku kidete kinene kyomukono gwigwe mulungi, noku keno kyekirenge kikye kilungi. 26Na musalisi a la tsuka maguta mu kigalo kyomukono gwigwe mmosi; 27na musalisi a luuha maguta nekidete kikye kilungi ku maguta ga veye mu mukono gwigwe mmosi hali gatano na gaviri imbiri wa Yahova: 28na musalisi a la vika maguta ga veye mu mukono gwigwe ku gutu gwomukono mulungi gwa uyu wa li kutakaswa, noku kidete kinene kyomukono gwigwe mulungi, noku keno kinene kyekirenge kikye kilungi, ku masahi gekihaanwa kyelihyolo: 29na maguta ga tigala mu mukono gwomusalisi a la ga vika ku mutwe gwa uyu wa li kutakaswa, kumulombera kyokukunika ubwoni imbiri wa Yahova. 30Na a la haana lilala ku makuulu, kinga ku makuulu matuge, kuli aga a nyala kunyola; 31kali ku yaga aga a nyala kunyola lilala li la va kihaanwa kyobwoni na lindi li la va kihaanwa kyokusambwa, halala na kihaanwa kyobusie: na musalisi a la lombera uyu wa li kutakaswa, kyokukunika ubwoni imbiri wa Yahova. 32Yili ni lilaga lya uyu u veye nelilwala lyobugere, u ta nyala kunyola ki dukana nelitakaswa lilye.

33Na Yahova ya volera Musa na Haruni, na a vola, 34Lwa mwingira mu kivala kya Kanani, kya mmu ha kuva miyandu gyenyu, na lwa mbika lilwala lyobugere ku inyu mba yekivala kyemiyandu gyenyu; 35hene yaho uyu mwene inyumba a la tsia kuvolera musalisi, nokuvola, Ndolanga ha veye kuli lilwala mu inyumba yange. 36Na musalisi a la laga va twulidze viju vyosi mu inyumba, musalisi na a kikiri kwingira kuhenza lilwala, kuduka vindu vyosi vi veye mu inyumba vi vule kukolwa vidamano: na lwenyima musalisi a lingira kulola inyumba: 37naye a la henza lilwala, na henza, lilwala ni li va ni li veye mu madigi genyumba ni i veye noluguku, lwelifwana lyobulimu kinga lwakanyu, na liloleka lyalyo ni liingiranga kuduka mu lidigi; 38hene yaho musalisi a la twula mu inyumba kuduka ha kiliango kyenyumba, na a la hana inyumba madiku gatano na gaviri. 39Na ku lidiku lya gatano na gaviri musalisi a la tsia kandi, nokuhenza; na lilwala ni li va ni li landa mu madigi genyumha; 40hene yaho musalisi a la va volera va twulidze magina agelilwala li veye mugo, nokugavika hadamano kyova welidala: 41na a la laga inyumba i halagatwe muse tsimbega tsyosi, na makindi ga ya halagata, va la tsuka kyova welidala ha veye hadamano: 42na va la leta magina gandi, nokugavika ha magina ga twulidzwa; na a la leta ubudohi bundi, nokuhoma inyumba.

43Na lilwala ni li va ni lirana kandi, kuloleka mu inyumba, inyima wa ya twulidza magina, na inyima wa ya halagata madigi, na inyima welihomwa lyayo; 44hene yaho musalisi a lingira nokuhenza; na henza, lilwala ni li landa mu inyumba, bu veye ubugere bululu mu inyumba: i veye indamano. 45A la sambula inyumba zana ligali, magina gayo, na misala gyayo, na ubudohi bwosi l bwenyumba; na a la vi hila kyova welidala kuvivika hadamano. 46Kandi uyu wingira mu inyumba tsinyinga tsyosi tsya i hanwa a la va mudamano kuduka mgolova. 47Na uyu u gonanga mu inyumba yeyo a logidza tsingubo tsitsye; na uyu u litsanga mu inyumba yeyo a logidza tsingubo tsitsye.

48Na musalisi lwa yingira, nokuhenza, na lilwala ni li vula kulanda mu inyumba inyima welihomwa lyenyumba; hene yaho musalisi a la vola inyumba i veye indahi, kigira lilwala li honyeywi. 49Na a la leta manyonyi gaviri, na musala gwa mutaragwa, na inzakanyu, na ihusupo, kutakasidza inyumba: 50na a liita lilala ku manyonyi mu inyingu igulu ku amadzi gomugera: 51na a la vugula mutaragwa, na ihusupo, na inzakanyu, na linyonyi li veye mwoyo, na a la viina mu masahi gelinyonyi liitwa, nomu amadzi gomugera, nokuguuha ku inyumba hali gatano na gaviri: 52na a la takasa inyumba namasahi gelinyonyi, na amadzi gomugera, na linyonyi liveye mwoyo, na musala gwamutaragwa, na ihusupo, na inzakanyu: 53navutswa linyonyi li veye mwoyo a la li lakula kyova welidala li tsie mwigendanyama: na ndiyo a la lombera inyumba kyokukunika ubwoni; nayo i la va indahi.

54Yili ni lilaga lyelilwala lyobugere tsingano tsyosi, kandi lyobufuma, 55na lyobugere bwengubo, na lyenyumba, 56na lya ha vimba, na lya ha veye nobufwiriru, na lyembala ing'ereng'anu; 57kwegidza ki veye kidamano na ki veye kilahi: yili ni lilaga lyobugere.

Currently Selected:

Kyavalevi 14: MBE

Highlight

Copy