Litanga 35

1Kandi Nyasaye ya volera Yakobo, Vuka, u tsie Betheli u menye yo: na u lon be yo ubwali ku Nyasaye, wa loleka ku ive lwa wiruka kutwula imbiri wa Esau amwavo wowo. 2Kunangwa Yakobo ya volera avenyumba yeye, na vosi ava li halala naye, Mu vike haluvega avanyasaye avageni ava li halala nemwinye, na mwetakase avene, na mwivike tsingubo tsindi: 3ku vuke nokutsia Betheli; na inze nda lomba yo ubwali ku Nyasaye, wa ntivulira mu lidiku lyobusaliri bwange, na ya li ninze halala ku inzira ya nda tsia ku. 4Na va ha Yakobo avanyasaye vageni vosi ava li mu makono gavo, halala netsimingiri tsya li mu matu gavo; na Yakobo ya vi visa isi womusala munene gwa li himbi Shekem. 5Na va samula: na ubutii bwa Nyasaye bwa li ku madala aga va kumbiridza, navo va wla kulonderera avana va Yakobo. 6Kunangwa Yakobo ya duka Luz, li veye mu kivala kya Kanani (yili li veye Betheli), uyu na avandu vosi ava li halala naye. 7Na yombaka yo ubwali, na ya gulika ha zana El-beth-eli, kigira Nyasaye ya loleka kuye, lwa yiruka kutwula imbiri wa amwavo wewe. 8Kandi Debora, mutugwa wa Rebeka ya kudza, na ya tebwa isi wa Betheli, isi womusala: na lieta lya musala zana lya gulikwa Alon-bakuthu.

9Na Nyasaye ya loleka ku Yakobo kandi, lwa ya duka kutwula Padanaram, na a mu gasidza. 10Na Nyasaye ya mu volera, Lieta lilyo li yeye Yakobo: lieta lilyo li ta langwa Yakobo kandi, navutswa li la langwa Israeli: na ya langa lieta lilye Israeli. 11Na Nyasaye ya mu volera, Inze mbeye Nyasaye Wanyala Vyosi: u ve nolwivulu lunyingi, nokumedeka; ihiri nobunyingi bwetsihiri tsi la twula ku ive, kandi avami va la twula ku inda yoyo; 12kandi kivala kya nda ha Abrahamu na Isaka, nda ha ive, na kisukululwi kikyo inyima wowo nda va ha kivala. 13Na Nyasaye yanegira kutwula kuye ha zana ha ya volerana naye. 14Na Yakobo ya singeridza munara ha zana ha ya volerana naye, munara gwa magina: na ya tsuka ku kihaanwa kyokunwa, kandi ya tsuka ku maguta. 15Na Yakobo ya gulika ha Nyasaye ya volerana naye, Betheli.

16Navo va samula kutwula Betheli: ni va kikiri kuduka Efirathu: na Raheli ya lumwa, na ya li nelilumwa linene. 17Kunangwa, lwa ya li nelilumwa linene, mwivulidzi ya mu volera, U ta tia; kigira u livula mwana wundi muyai. 18Kunangwa mwoyo gwigwe, lwa gwa li ni gu twula kuye (kigira ya kudza), ya mu gulika lieta lilye Ben-oni: navutswa dada wewe ya mu gulika lieta lilye Benjamini. 19Na Raheli ya kudza, na ya tebwa ku inzira i tsitsanga Efirathu (li veye Beth-lehemu). 20Na Yakobo ya singeridza munara ku kilindwa kikye: ha zana ha veye Nomunara gwa kilindwa kya Raheli kuduka lero. 21Na Israeli ya samula kutsia imbiri, na yombaka lihema lilye ha ya mala kuvita munara gwa Ederi. 22Ga duka, lwa Israeli ya menya mu kivala yikyo, Ruben; ya tsia kuva halala na Bilha, suria wa dada wewe: na Israeli ya hulira. Henza, avana va Yakobo va li likumi na vaviri: 23avana va Leah: va li Rubeni, munene wa Yakobo, na Simeoni, na Levi, na Yuda, na Isakari, na Zebuloni; 24na avana va Raheli, va li Yosefa na Benjamini; 25na avana va Bilha, mukana mutugwa wa Raheli: Dan na Nafitali; 26na avana va Zilipa, mukana mutugwa wa Leah: Gadi na Asheri: yava nivo avana va Yakobo avivulwa kuye mu Padan-aram. 27Na Yakobo yadza ku Isaka dad wewe ku Mamre ku Kiriathu-arba (li veye Hebironi) ha Abrahamu na Isaka va menya.

28Na madiku ga Isaka ga li mia na makumi gatano na gavaka. 29Isaka, mwoyo gwa twula kuye, na a kudza, na a vungidzwa ku avandu veve, musakulu wa madiku manyingi: na avana veve Esau na Yakobo va mu ta.

Currently Selected:

Litanga 35: MBE

Highlight

Copy