Litanga 17

1Na lwa Abram ya duka mihiga makumi gatano na gane, na gyitano na gyine, Yahova ya loleka ku Abram, na a mu volera, Mbeye Nyasaye Wanyala Vyosi; Genda imbiri wange, na u ve mudukiru. 2Na nda lomba lilagana lyange hagati hange na ive, kandi nda ku meda ligali. 3Abram ya gwa mammama: na Nyasaye ya volerana naye, na a vola, 4Ku inze, ligali henza, lilagana lyange li veye na ive, na ive u la va dada wa tsihiri tsinyingi ligali. 5Kandi lieta lilyo si li la langwa kandi Abram, navutswa lieta lilyo li la va Abrahamu; kigira nkoli ive dada wetsihiri tsinyingi. 6Kandi nda kola ive kwaala ligali, kandi nda ku kola kuva tsihiri, na avami va la twula ku ive. 7Kandi nda singeridza lilagana lyange hagati hange na ive na visukululwi vivyo inyima wowo, mu visukululwi vyavo li ve lilagana lyemihiga nemihiga, nduke kuva Nyasaye ku ive noku visukululwi vivyo inyima wowo. 8Kandi nda ha ive na visukululwi vivyo inyima wowo, kivala kya limenya lilyo, kivala kyosi kya Kanani, ki ve miyandu gyemihiga nemihiga; na nda va Nyasaye wavo.

9Kandi Nyasaye ya volera Abrahamu, Ku ive, u la gumira lilagana lyange, ive, na visukululwi vivyo inyima wowo kuduka ku visukululwi vyavo vyosi. 10Yili ni lilagana lyange, lya mu la gumira, hagati hange na mwinye na visukululwi vivyo inyima wowo: avasatsa vosi va veye ku mwinye sa mulala va la kevwa. 11Na mwinye mu la kevwa ku magodo gemibiri gyenyu; na yaga ga la va lilolekidza lyelilagana hagati hange na mwinye. 12Uyu u duka madiku gatano na gavaka hagati henyu a la kevwa, ku avana vosi avayai mu visukululwi vyenyu, wivulwa mu inyumba, kandi uyu wa gulwa nefetha ku vamenya vosi ava ta li ku visukululwi vivyo. 13Uyu wivulwa mu inyumba yoyo, kandi uyu u gulangwa nefetha yoyo, ga mu dukira ku kevwa: na lilagana lyange li la va ku tsinyama tsyemibiri kuva lilaganalyemihiganemihiga. 14Na musatsa mugasa u vula kukevwa ku ligodo lyombiri gwigwe, a la twulidzwa ku avandu veve; wononyi lilagana lyange.

15Kandi Nyasaye ya volera Abrahamu, Ku Sarai mukali wowo, si u la mu langa lieta lilye Sarai, navutswa lieta lilye li la va Sara. 16Na nda mu gasidza, kandi nda ku ha mwana kuye; yee, nda mu gasidza, na a la va mama wa tsihiri tsinyingi; avami vavandu va la twula kuye. 17Hene yaho Abrahamu ya gwa mammama, na a seka, na a vola mmwoyo gwigwe, mwana a nyala kwivulirwa uyu wemihiga mia? Ka kandi Sara a veye wemihiga makumi gatano na gane a nyala kwivula? 18Na Abrahamu ya volera Nyasaye, Nkano Ishmaeli a nyala kuhindira imbiri wowo 19Nyasaye ya vola, Auwa, navutswa Sara mukali wowo a la kwivulira mwana; na u la mu gulika lieta lilye Isaka, na nda singeridza lilagana lyange naye kuva lilagana lyemihiga nemihiga noku visukululwi vivye inyima wewe. 20Na ku Ishmaeli nku huliye: henza, mmu gasidzi, na nda mu kola kuva nolwaalo lunyingi, kandi nda mu meda ligali; a livula avami likumi na vaviri, na nda mu kola kuva ihiri inene. 21Navutswa nda singeridza lilagana lyange na Isaka, wa Sara a li kwivulira ku inyinga i lageywi ku muhiga gudzanga.

22Na ya leka kuvolerana naye, na Nyasaye yanegira igulu kutwula ku Abrahamu. 23Na Abrahamu ya vugula Ishmaeli mwana wewe, na vosi avivulwa mu inyumba yeye, na vosi ava gulwa na ifetha yeye, avasatsa avombandu va inyumba ya Abrahamu, na a va keva magodo gemibiri gyavo ku lidiku zana, kuli Nyasaye ya mu volera. 24Na Abrahamu ya li wemihiga makumi gatano na gane na gyitano na gyine, lwa ya kevwa ligodo lyombiri gwigwe. 25Na Ishmaeli mwana wewe ya li wemihiga likumi na gyivaka, lwa ya kevwa ligodo lyombiri gwigwe. 26Mu lidiku zana lilala, Abrahamu ya kevwa, na Ishmaeli mwana wewe. 27Kandi avasatsa vosi venyumba yeye, avivulwa mu inyumba yeye, na vagulwa nefetha ku mmenya, va kevwa halala naye.

Currently Selected:

Litanga 17: MBE

Highlight

Copy