Litanga 15

1Inyima wevindu yivi likuva lya Yahova lya duka ku Abram mu malola, kuvola, U ta tia, Abram: Inze mbeye inkingiru yoyo, na madanyi gogo manene ligali. 2Na Abram ya vola, O Mwami Yahova, u la mba ikindu ki, kigira ngendanga vutswa bugira mwana, na uyu u li lia miyandu gyenyumba yange ni Eliezeru wa Damasko? 3Kandi Abram ya vola Henza, u vuli kumba lwivulu: na henza, mulala wivulwa mu inyumba yange a veye wemiyandu gyange. 4Na, henza, likuva lya Yahova lya duka kuye, na a vola, Mundu uyu si a la va wemiyandu gyigyo mba; navutswa u li twula munda mumwo mwene a la va wemiyandu gyigyo. 5Na ya mu hila kyova, na a mbolera Henza kalunu migulu, u validze tsing'ereng'ani, nu u va nu nyala kutsivalidza: na ya mbolera, Lwivulu lulwo lu la va ndi. 6Naye ya suuvira Yahova; naye ya ga vola kuye kuva ubulungi. 7Na ya mu volera, Inze mbeye Yahova wa ku twulidza mu Uru lya Vakalidei, kukuha kivala yiki kuva miyandu gyigyo. 8Naye ya vola, O Mwami Yahova, Nda manya ndi nda ki nyola kuva miyandu? 9Naye ya mu volera, U mbugulire iroli yemihiga gyivaka, na isuveni yemihiga gyivaka, na ligondi likole lye mihiga gyivaka, na kiduga, ne likuulu lisoleli. 10Naye ya mu vugulira yivi vyosi, na ya vyatannya hagati, na a vika vidieli vilala ku luvega lulala, na vindi ku luvega lundi: navutswa manyonyi si ya gatannya mba. 11Na tsisoti tsiika ku vikudzu zana, na Abram ya tsi kunga.

12Na liuva lwa ya yera, tsindolo tsinene tsya gumira Abram; kandi, henza, litihidza lyekisundi kinene lya duka kuye. 13Na ya volera Abram, U manye ligali visukurulwi vivyo vi la va avamenya mu kivala ki ta li kyavo, na va la va tumekira; navo va la va dambidza mihiga tsimia tsine; 14na ihiri zana, ya va li tumekira nda va kalagira: kandi lwenyima va la twula nobutugi bunyingi. 15Navutswa ive u la tsia ku vadada vovo nemirembe; na ive u la tebwa mu buhindiri bulahi. 16Na mu kisukululwi kya kane va lirana hano kandi: kigira ubudamano bwa Vaamori bu kikiri kwizula. 17Kunangwa, liuva lwa ya yera, na ha li ne kisundi, henza, kisambiru kyo mwoki, nolumuli lwetsimemo lwa vita hagati hevidieli vyetsinyama. 18Mu lidiku yilyo Yahova ya kola lilagana na Abram, na a vola, Mmali kuha visukululwi vivyo kivala yiki, kutwula ku mu gera gwa Egepeti kuduka ku mugera munene gwa Farati: 19Vakeni, na Vakenizi, na Vakadimoni, 20na Vahiti, na Vaperizi, na Varafaim, 21na Vaamori, na Vakanani, na Vagirigashi, na Vajebusi.

Currently Selected:

Litanga 15: MBE

Highlight

Copy