Litanga 12

1Kunangwa Yahova ya volera Abram, Twula mu kivala kikyo, na mu bwiko bwavo, nomu inyumba ya dada wowo; u tsie mu kivala kya nda ku mannya: 2na nda kola Ive u ve ihiri inene, na nda ku gasidza, na nda kola lieta lilyo li ve linenena ive u ve ubugasu: 3kandi nda gasidza yavo ava gasidza ive, na nda laama yavo ava laama ive: na aviko vosi velirova va la gasidzirwa mu ive. 4Kunangwa Abram ya tsia, kuli Yahova ya mu volera; na Loti ya tsia halala naye: na Abram ya li nemihiga makumi gatano na gaviri na gyitano lwa ya twula Harani. 5Na Abram ya vugula Sarai mukali wewe, na Loti mwana wamwavo wewe, na vindu vyosi vya venyolera, na vandu ava va nyola mu Harani; na va twula kutsia mu kivala kya Kanani; na va duka mu kivala kya Kanani. 6Na Abram ya vita hagati he kivala na a duka ha Shekem, hango ha More. Kandi Mukanani ya li mu kivala inyinga yeyo. 7Kandi Yahova ya loleka ku Abram, na a mu volera, Inze nda ha kisukululwi kikyo kivala yiki: naye yombakira ho Yahova ubwali, wa loleka kuye. 8Na ya twula ho na a tsia mu kigulu kya ivugwe wa Betheli, na yombaka lihema lilye, Betheli li veye madioli ml Ai li veye ivugwe: na yombakira ho Yahova ubwali na yanira lieta lya Yahova. 9Kandi Abram ya samula, na a tsia luvega lwa Kusini.

10Na ha li nenzala mu kivala zana: na Abram ya sulunguta na a duka Egepeti a menye yo; kigira inzala ya li inene mu kivala. 11Kunangwa lwa ya li himbi kuduka Egepeti, ya volera Sarai mukali wewe, Henza Mmanya ive u veye mukali mulahi ku liloleka lilyo: 12kunangwa ga la va lwa Vaegepeti va la ku lola, va la vola, Uyu nomukali wewe: navo va la nziita, navutswa va la ku vererera u ve mwoyo. 13Mwadza, u vole, u veye mbotso wange; nyole ubulahi kigira ive, na nda va mwoyo kigira ive. 14Kunangwa lwa Abram ya duka Egepeti, Avaegepeti va lola mukali a veye mulahi ligali. 15Avandu vanene va Farao va mu lola na va mwidzominya imbiri wa Farao: kunangwa mukali zana ya vugulwa na a vikwa mu inyumba ya Farao. 16Naye ya kolera Abram bulahi kigira uyu: ya li namagondi, na tsing'mbe, na tsisukiri tsisatsa, na vatumiki avasatsa, na vakana, na tsisukiri tsinkali, na tsing'amia. 17Na Yahova ya duya Farao na inyumba yeye na maduywa manene kigira Sarai, mukali wa Abram. 18Na Farao ya langa Abram, na a mu volera, U nkoleye kindu ki? Kigira ki wa vula kumbolera uyu a veye mukali wowo? 19Kigira ki ive wa v ola, a veye mbotso wange kuduka inze nda mu hila a ve mukali wange? Kalunu, henza mukali wowo, u mbugule, u tsie. 20Farao ya laga avandu veve kuye: na va mu hereka ku inzira yeye, na mukali wewe, na vyosi vya li navyo.

Currently Selected:

Litanga 12: MBE

Highlight

Copy