Kutwula 36

1Na Bezaleli na Oholiabu va kyinzira, na avobugeeri vosi ava Yahova u viki ubugeeri na limanya lyokuyinzira miyinzi gyosi gyobutumiki bwa hatakatifu, kuli yaga gosi ga Yahova a lagi.

2Kunangwa Musa ya langa Bezaleli na Oholiabu na vosi avomwoyo gwobugeeri, ava li va Yahova ya vika mu myoyo gyavo ubugeeri, kali vosi avomwoyo gwavo gu mu vukidza va tsie kukola miyinzi zana; 3navo va vugula mmakono ga Musa vyahaanwa kyosi, kya avana va Israeli va leta ku miyinzi gyobutumiki bwa hatakatifu, va ha lombe navyo. Kandi migamba gyosi va mu letera vihaanwa nomwoyo gwobulaliri. 4Na vosi avobugeeri ava kola miyinzi gyosi gya hatakatifu, vadza sa mulala kutwula ku miyinzi gyigye gya va kolanga; 5na va volera Musa, nokuvola, Avandu va leta vindu vinyingi ligali kuvita yivyo vi dukanga ubutumiki bwemiyinzi, gya Yahova ya laga ku kole. 6Na Musa ya laga, na va landidza mu hokusosa hosi, ni va vola, Musatsa kinga mukali a ta kola miyinzi gyindi gyevihaanwa vya hatakatifu. Kunangwa avandu va gaywa va ta leta vindu. 7Kigira vindu vya va li navyo vya duka kukola miyinzi gyosi, kandi vya vita.

8Na avandu avemyoyo gyobugeeri vosi muvo ava kolanga miyinzi va lomba lihema, li veye netsingubo tsyokukinga likumi; tsya lombwa nekatani indahi ya sitwa, na iblue, na kiforosadi, na inzakanyu, halala na vakerubi, miyinzi gyomusidza weligaii. 9Ubutambi bwengubo yokukinga sa indala, bwa li hgera lyamakono makumi gaviri na gatano na gavaka, nobugalamu bwengubo sa indala bwa li ligera lyamakono gane; tsingubo tsyosi tsya li nekigero kilala. 10Naye ya hambanya tsingubo tsitano tsyokukinga halala, na tsindi tsitano halala. 11Naye ya lomba vyulu vyeblue kundulu kwengubo indala ku lukigiti lwelihambannya lyayo: kandi ndiyo kundulu kwengubo yindi ku lihambannya lya kaviri. 12Ya lomba vyulu makumi gatano ku ingubo indala, na makumi gatano kundulu kwengubo ya lomba mu lihambanya lya kaviri: na vyulu zana vya henzana indala na yindi. 13Naye ya lomba vibohero makumi gatano vyethahabu, na a hambanya tsingubo indala ku yindi nevibohero: na ndiyo lihema lya gwa kindu kilala.

14Kandi ya lombera lihema tsingubo tsyokukunika tsyobwoya bwetsimbuli: tsingubo likumi na indala ya tsi lomba. 15Butambi bwengubo indala bwa li ligera lya makono makumi gavaka, na ubugalamu bwa li ligera lya makono gane: tsingubo likumi na indala tsya li neligera lilala. 16Naye ya hambannya tsingubo tsitano halala, na tsingubo tsitano na indala halala. 17Na ya lomba vyulu makumi gatano kundulu kwengubo impereridzi yelihambanywa lilala, na vyulu makumi gatano kundulu kwengubo yelihambanywa lya kaviri. 18Na ya lomba vibohero makumi gatano vyomugasa kuhambannya lihema halala, li ve lihema lilala. 19Kandi ya lomba kikuniko kyelihema yetsingubo tsya magondi makole tsyabuulwa irangi inzakanyu, na kikuniko kyamasero gelitsivi.

20Kandi ya lombera lihema tsimbao tsyomusala gwe kikuma, tsi singiranga. 21Lubao lulala lwa li neligera lyamakono likumi, na ubugalamu bwolubao sa lulala ligera lyomukono na inusu. 22Lubao sa lulala lwa li nobwongiru buviri bu hambannywa halala: na ndiyo ya lomba tsimbao tsyosi tsyelihema. 23Naye ya lombera lihema tsimbao: tsimbao makumi gaviri ku luvega lwa kusini; 24na ya lomba viduku vyefetha makumi gane isi wetsimbao makumi gaviri; viduku viviri isi wolubao lulala vyobwongiru buviri bwalwo, na viduku viviri isi wolubao lundi vyobwongiru buviri bwalwo. 25Kandi ku luvega lundi lwelihema, ku luvega lwa kasikasini, ya lomba tsimbao makumi gaviri, 26na viduku vyatsyo vyefetha makumi ganeviduku viviri isi wolubao lulala, na viduku viviri isi wolubao lundi. 27Na ku luvega lwomugongo lwelihema imadioli ya lomba tsimbao tsitano na lulala. 28Na ya lomba tsimbao tsiviri tsyetsikoma tsyelihema ku luvega lwomugongo. 29Tsya li tsya hambana isi; na ndiyo tsya hambana halala kuduka mutwe kuduka ku imingiri indala: na ndiyo ya lomba tsyombi mu tsikoma tsyombi. 30Kandi tsya li ho tsimbao tsitano na tsivaka, na viduku vyatsyo vyefetha, viduku likumi na vitano na kilala; viduku viviri isi wolubao sa lulala. 31Naye ya lomba tsimbohero tsitano tsyomusala gwe kikuma; tsyetsimbao tsyoluvega lulala lwelihema, 32na tsimbohero tsitano tsyetsimbao tsyoluvega lundi lwelihema, na tsimbohero tsitano tsyetsimbao tsyelihema tsyoluvega lwomugongo imadioli. 33Na ya lomba lubohero mba hagati kuvita hagati hetsimbao kutwula luvega yilu kuduka ku luvega yilwo. 34Na ya handidza ku tsimbao zana ithahabu, na ya lomba tsimingiri tsyatsyo tsyethahabu, tsi ve hokuvitidza mu tsimbohero, kandi ya handidza ku tsimbohero ithahabu. 35Kandi ya lomba ingubo yokukinga yeblue, na yekiforosadi, na yenzakanyu, na yekatani indahi ya sitwa: kandi ya vika vakerubi, miyinzi gyomusidza, na ndiyo ya gi lomba. 36Na ya gi lombera tsitiru tsine tsyomusala tsye kikuma, na a handidza ku ithahabu: na visunga vyatsyo vya li vyethahabu; na ya lomba viduku vine vyefetha. 37Naye ya lombera kiliango kya Lihema ingubo yokukinga yeblue, na yekiforosadi, na yenzakanyu, na yekatani indahi ya sitwa, miyinzi gya u lombanga ubusalago; 38na tsitiru tsyayo tsitano halala nevisunga vyatsyo: na ya handidza ku tsisonga tsyatsyo, noku vyulu vyatsyo, ithahabu; na viduku vyatsyo vitano vya li vyomugasa.

Currently Selected:

Kutwula 36: MBE

Highlight

Copy