Kutwula 15

1Kunangwa Musa na avana va Israeli vimbira Yahova lwimbu yilu, va moloma, ni va vola,

Ndimbira Yahova, kigira U guuti nobukumi:

Iparasi na uyu wa nina ku, ya va ta mu inyanza.

2Yahova a veye tsingulu tsyange nolwimbu lwange,

Kandi u gweye ubuhonnyi ku inze:

Uyu a veye Nyasaye wange, na nda mwidzominya;

A veye Nyasaye wa vaguga vange, nda mu kuminya.

3Yahova a veye mundu wobulwani

Lieta lilye ni Yahova.

4Magari ga Farao na lihe lilye, u va teye mu inyanza;

Na avanyampara avatovole veve viiniki mu Inyanza Inzakayu.

5Amadzi goluliva ga va kunika:

Viinika mu luhove kuli ligina.

6Mukono gugwo mulungi, O Yahova, gu veye nobukumi mu tsingulu,

Mukono gugwo mulungi, O Yahova, gu shonolannya avasigu.

7Kandi mu bunene bwobulahi bubwo wagululanga ava singira kuvukira ive:

U letanga ubutima bubwo, nabwo bu va sambanga kuli uluvuva.

8Amadzi ga digululwa igulu nelihuudza lya amolu gogo,

Viguvuli vya singira bulungi kuli vitumi;

Amadzi ga dinya mu mwoyo gwenyanza.

9Musigu ya vola,

Nda londerera, nda nyola, nda gavanya vilanye;

Lyenya lyange li la yanzidzwa kuvo;

Nda somola kivavi kyange, mukono gwange gu la va dividza.

10Ive wa huudza imbuudza yoyo, inyanza ya va kunika:

Viinika mmadzi manene kuli lisasi.

11Ibwaha u veye kuli ive, O Yahova, mu avanyasaye? Ibwaha u veye kuli ive, mu bukumi nomu butakatifu,

U tihidzanga mu lidzominya lilyo, u kolanga vyokugenya?

12Ive u nyira mukono gugwo mulungi,

Lirova lya va mira.

13Ive mu tsimbabasi tsitsyo wimiriye avandu ava wa honnya:

U vimiriye netsingulu tsitsyo, va duke mu bumenyo bubwo butakatifu.

14Avetsihiri va huliye, va degera:

Ava menya mu Filisita, lisaliridzwa li va nyonye.

15Hene yaho avami va Edom va genya;

Avetsingulu va Moabu, lidegera li va gumiye:

Avamenya mu Kanani va kamuluka.

16Litihidzwa nobutii bu va gumiye;

Ku bunene bwomukono gugwo, va kiring'ana kuli ligina;

Kuduka avandu vovo vambuka, O Yahova,

Kuduka avandu ava wa gula, vambuka.

17U la vingiridza, nokuvasimika mu kigulu kyemiyandu gyigyo,

Hango, O Yahova, ha welombera, u duke kumenya ho,

Hatakatifu, O Mwami, ha makono gogo ga singeridzi.

18Yahova a lameha mihiga nemihiga.

19Kigira tsiparasi tsya Farao halala na magari gege na avetsiparasi veve, vingira mu inyanza, na Yahova ya leta amadzi genyanza rirana kuvo; navutswa avana va Israeli va genda ku lirova liumu mu inyanza. 20Na Mariamu muprofeti mukali, mbotso wa Haruni, ya vugula kindu ku lugano lwesigudi mu mukono gwigwe; na avakali vosi va mu londa na vyolugano lwesigudi mu makono gavo, ni va kina. 21Na Mdriamu ya va tivulira,

Mwimbire Yahova, kigira u guuti nobukumi;

Iparasi na wanina ku u va teye mu inyanza.

22Na Musa yimirira Israeli ni va tsia imbiri kutwula mu Inyanza Inzakanyu, ni vingira mu kyangalangwi kya Shur; na va tsia ulugendo lwamadiku gavaka mu kyangalangwi, na si va nyola amadzi. 23Na lwa va duka ha langwa Mara, si va nyala kunwa amadzi ga Mara, kigira ga li malulu: kigira yaga ha langwa Mara. 24Na avandu va monya Musa, ni va vola, Ku la nwa ki? 25Naye yanira Yahova, na Yahova ya mmannya musala, na ya gu vika mu amadzi, na amadzi ga gwa makindu. Kunangwa ya va lombera ho lilaga na likalaga, na a va gerihidza ho; 26naye ya vola, nu u va nu u huliranga ligali mwoyo gwa Yahova Nyasaye wowo, nokukola aga veye malungi imbiri wewe, nokutegidza amatu gogo kuhulira malago gege, nokugumira miima gyigye, si nda vika ku ive ubulwaye kali bulala ku bwa nda vika ku Avaegepeti: kigira mbeye Yahova ku honnyanga.

27Navo va duka ha langwa Elim, ha li na visenukiru vya amadzi likumi na viviri, na makindu makumi gatano na gaviri: na va lomba ha zana lisosa lyavo himbi na amadzi.

Currently Selected:

Kutwula 15: MBE

Highlight

Copy