LUKA 2
2
1Kichikyï osiswechoni Kaisari Aukusto lö, kïmököy kekiröy kaynötut pö pich ompö kor kïmïkul atökeyit. 2Kipö kiyitötononi tagh kekir atoni kipöytoy Kurenio koro Sirya. 3Kïpa pich tïkwïl atökekir chi anka tïkwïl ompö kanasyantenyi.
4Kïngeta Yosep kanasyanta Nasaret nyo mi Kalilaya akïwö kutang Yudea ntökwit kanasyan nyo kikuro Petleem, wölo kikïyichï pöytoghin Daudi. Kiwö Yosep wöloni ompöwölo kipö nyinte ara Daudi. 5Kiwö wöloni atökukir kegh nko Marya, nyo kökikulotokïn akimirsïyi. 6Akwotini kitökïmi Petleem, kwitïta osiswechi cho pö lusyogh. 7Kïyï poretyenyi nyo le weri, kuyenö sïra monïng akumïkonchï atekerya kyak, ompöwölo kimöminye pöroyïn kö pö to nyo kitempuröy chane.
Mösöw nko malayken
8Kimito mösöwö osiswechoni korononi cho kiripöy kyakikwa oghö. 9Kuchumchï chane malaykayanta Echotyon kulïwchï ororyo Echotyon kuwit chane, kuwöghisyö nyoman, 10wölo kïlenchï malaykayantanay, “Mowöghisyö! Ompöwölo opkokwa Lökoy cho Karamach cho ipchini pich lapay ngörekyö nyo wow. 11Kikeyï asisete ompö kanasyanta Daudi Ghetin ompö akwa nyo le Kristo* akï Echotyon. 12Akwanyï kiporunöte ompö akwa, onyorunekwa mnyarkil nyo kikiyenö sïro pö monïng akemïkonchï atekerya kyak.”
13Kïnyini lawel kuchumï söpïch nyo wow nyo pö malaykeni yïm, akuryam nko malaykayantanay akïtum tumwöy cho sölo Tororöt lö,
14“Nya kwororit Tororöt nyo mi wölo töror tya,
akïsïch ngwïnya kalya nyo pö pich cho le
chamankachi.”
15Otini kipechï kegh malaykenichay kïmïlonchö yïm, kïmwochï mösöwechay lö, “Kepe Petleem atökesïwena kïyï kegha kömwowecha Echotyon.”
16Kïlenyona kïryagh akïnyorï Marya nko Yosep akïsïwa mnyarkil nyo rïwöy ateker. 17Akwotini kisïwa mösöwechay monïngay, kïmwochï chane ngal cho kömwochï chane malayken ompö monïngoni. 18Kïtangany pich nyoman cho kilïm ngalechoni kimwoghöy mösöwö. 19Wölo kïkomönchï Marya mïkulöwunyi ngalechoni löwïr akunan lasiny. 20Kïmïlonchö mösöwechay, akï tumöy sölut pö Tororöt ompö ngal löwïr cho kilïm akïsïwa, ompöwölo kighisyö nyo mötïny le wölini kimwochï malayken chane.
Kakïmïnchï Yeso kaynat
21 #
Law 12:3; Luk 1:31. Otini kit osis mut nko sömök, kwit ato kïmutöy montö, kekurö nyinte Yeso, kaynat nyo kitö malaykayan nyinte otini kitomönye kesïch.
Kakitötö Yeso ompö Kö pö Tororöt*
22 #
Law 12:6-8. Kitïta ato kimïchini Yosep nko Marya kutïlil kegh kïrïp kegh nko Kirurut pö Musa. Kwip monïngay ntökwit Yerusalem atökutö Echotyon, 23#Wuw 13:2,12. ompöwölo kikikir ompö Kirurut pö Echotyon lö, “Kitöni poret anka tïkwïl Echotyon nyo le weri.” 24Kipetöy chane tïkwïl Yerusalem atökutö tïsin amöros kïrïp kegh nko Kirurut pö Echotyon nyo lentöy, “Kïkonu chepïrïmpen odeny anta wara cheptuken odeny.”
25Kimito osiswechoni chi nyo kimönyöy Yerusalem nyo kikïkuro Simion. Kitenate nyinte akuwöghöy Tororöt, kiköngöy chichoni sörunöto Israel. Kimito Mïkulögh nyo Tïlil nko nyinte 26akikïngongchï Mïkulögh nyo Tïlil nyinte lö, mönyoghönye kïröpösöy kïtomö kïsïwa Kristo nyo kiyomis Echotyon. 27Kuntöghoghchï Mïkulögh nyo Tïlil Simion kïlït Kö pö Tororöt. Akwotini kipï yïyiko monïngoni le Yeso Kö pö Tororöt atökeghchï kïrïp kegh nko machat nyo kipö kirurut. 28Kïnama Simion monïngay ewunechi akïsal Tororöt lö,
29“Pïstenönyinyu ye mötworintengu, Echotyon,
kïwö ompö kalya kïrïp kegh nko ngölyontengu,
30Kasïweghan konyichu sörunötengu,
31nyo kitötinyi tawu pich löwïr.
32 #
Isa 42:6; 49:6; 52:10. Löpoyïn nyo ngongchini pipö punton machatengu
akwipchini ororyö piköku Israel.”
33Kïtöngönchï kwanta nko kame ngalechoni, kingalana Simion nyinte. 34Kusoyön Simion chane akïlenchï Marya, yoto monïng, “Rose, kikïl Tororöt mönïngï kïlïkwï macheypa kipotöt nko sörunöto pich cho chang ompö Israel. Lïku nyinte kiporunöt nyo ngwïno wölo mi Tororöt nyo mölomölo kegh pich cho chang, 35atökingongwï kinonutkökwa cho wïngote. Ailïmtonyi nyarïl ompö mïkulöwungu kegh le chok nyo ngatip.”
36Kimi werkoyontö nyo kïle korka nyo kikïkuro Ana akekuro kwanta, Panuel nyo kipö ara Asyer. Kikikïyosit nyinte, kitöpö nko santenyi könyis mut nko odeny kïngeta otini kile mïrar, 37akwato mi löt kïlïkwï mïsïk ntökwit könyis 84. Wölo kimöpïstönye Kö pö Tororöt, kisagh nyinte Tororöt pöghet nko nangat, ato kikïruröy nyinte. 38Kwitï kamanoni sayanoni akuyokyï Tororöt sörö akïngölonchï pich lapay ngala monïngay, cho kikönöy kityakata Yerusalem.
Kömïlisyö Nasaret
39 #
Mat 2:23. Kikany kuwany chane ngal tïkwïl cho kiyomisöy Kirurut pö Echotyon, kïmïlonchö Kalilaya ntökwitï kanasyantengwa kegh nyo pö Nasaret. 40Kïyetï monïngay akïnar, kingöghom nyoman akimi kisoyönöto Tororöt parakunyi.
Mi weray le Yeso Kö pö Tororöt
41 #
Wuw 12:1-27; Krt 16:1-8. Kipetöy yïyiko Yeso könyis lapay Yerusalem, atökwam omisyo Pasaka.* 42Otini kitïta Yeso könyis taman nko odeny, kïpa Pasaka le kïnomnyö. 43Kikany kuwonyö osiswo omisyö, kïmïlonchö kutöngwï katangwa, wölo kudong Yeso Yerusalem, akimenkïtcha yïyichi. 44Kinonöy lö, kimi nyinte kwenu söpïchnoni, kïlenyona kïrutö kwimön, atolapay kutor kïmaramar monïngay wölo kimi pikökwa nko kongotikwa. 45Akimökïnyorïcha, kïmïlonchö ngat Yerusalem kïmarata nyinte, 46ato mi asisto sömök, kïnyorchï nyinte Kö pö Tororöt, mpuröy nko konetï, teröy chane akïtepöy teput. 47Kitangany pich tïkwïl, cho kiteröy ompö pköchintanyi nko wölini kiyodoy nyinte teputchay kïlïkwï. 48Kïtangany yïyichi otini kisïwa nyinte, kïlenchï kame, “Kölö ne teghwecha nyi le nyï nya monïngï? Rose lö, kamarinyi nko papongu ompö nyarïl.” 49Kuyokyï chane lö, “Komörchinanïkwa ne? Kömonkïtökwanye so lö kömökyinanïn omitö koto Paponyu?” 50Wölo kimöpköchïnye ngölyontononi kimwochini Yeso chane. 51Atolapay kïwö Yeso nko chane kutang Nasaret, kïtech nyinte chane akïterchï. Kïwïnchï kame ngalechoni löwïr mïkulöwunyi. 52#1Sam 2:26; Ngt 3:4. Kïtasa Yeso kïngöghomit akïghetï, kïcham Tororöt akïcham pich tïkwïl.
Amtaghpa Yoana Kipatisanin
(Mat 3:1-12; Mrk 1:1-8; Yna 1:19-28)
Currently Selected:
LUKA 2: PIPÏLIA
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
