LUKA 1
1
1Takwes apoy Teopilo:
Inkïtönyi lö chang pich cho kikumukyï kukir ngalechay kighisyeghö kwenunyo. 2Kikir chane ngalechoni le otini kimwowecha pich cho kisïwa tïkuchoni kïngeta otini kighisyö akwamtata ngalechoni. 3Kïlenyona, we apoy Teopilo, kokïtön ante tïkwïl ngalechoni kïngeta otini le towunöt, olan mïchini akirunyi ngalechï lasiny. 4Akakiran lenyoni temukanyi nkïtunö man ompö ngal löwïr cho kikenetïnyi.
Kakïmwowï yiyo Yoana Kipatisanin
5 #
2Ot 24:10. Kimi tïsin nyo kikïkuro Sakaria nyo pö ara Apiya, pich cho kile tïsï, ato ki pöytoghin Erode ompö koro Yudea. Kikïkuro korkenyi Elisapet aki pö nyinte tïkwïl ara tïsï. 6Kitïpïyot chane kwodeny otöp pö tïlilïn ompö tawu Tororöt, kiteröy akïrïpöy Kirurut pö Echotyon löwïr. 7Wölo kimötïngcha monïng, ompöwölo ki sonö Elisapet akiyositu nyoman chane kwodeny.
8Kiwö asistanka tïsin Sakaria Kö pö Tororöt* kïpöghisyö atokile pösyenyi. 9Kïrïp kegh nko tötut pö tïsï, ki Sakaria nyo kikïkïl kïwö asisoni Kö pö Tororöt kïpel tïkwïn cho ngutoy cho onyïn. 10Otini kipelöy Sakaria tïkuchoni, kimi pich sany kïsoghöy. 11Kungwïnchï nyinte malaykayanta Echotyon akughyongö okumpö tagh ompö ato kïpelo tïkwïn cho ngutoy cho onyïn. 12Kïkany kïsïwa Sakaria nyinte, kwotyö akïmïgh. 13Wölo kïlenchï malaykayantanay, “Mewöghisyö Sakaria! Kikïlïm Tororöt saghatengu, yiyunyi korkengu Elisapet worö aikuronyi kaynenyi Yoana. 14Ingörökenyi nyoman akïsïköy pich cho chang ngörekyö otini kakïyï nyinte. 15#Kiy 6:3. Ororitu nyinte nyoman ompö tawu Echotyon amögheghönye dipay* anta kumïn. Kinyïghitöy nyinte Mïkulögh nyo Tïlil kïngeta kïmi mu. 16Yoku pipö Israel cho chang kïpkonchï Echotyon Tororötïngwa. 17#Mal 4:5-6. Nyoghöy kïwetöy tawu Echotyon ompö mïkulögh nko owesyo werkoyon Eliya. Linyot papotïn nko monïng. Wöghököy pich cho le tighï kïrïp kinetut pö pipö man akwigh pipö Echotyon kïtïpï kïpsach kïtak nyinte.”
18Kïlenchï Sakaria malaykayantanay, “Akumukisot ngalechï lö ne? Akwanyï kyayositwan akiyosit kokönyontenyan tïkwïl.” 19#Dan 8:16; 9:21. Kïlö malaykayantanay, “Ochan Kapriel nyo opöghisyechini Tororöt. Köyonwanïn nyinte angalan nko nyi tomwowunyi ngalechï karamach. 20Wölo tere nyu, nöminyi kïgh kut nyo memukenyinye ngölone ntökïtenö kwighisyö ngalechï löwïr, ompöwölo melö keghananyi ngalechan cho tökïpïntoy.”
21Otini kighisyot ngalechï kïtöngönchï pich cho kiköngöy Sakaria lö, ekï kïgh ne nyo körötyï nyinte Kö pö Tororöt? 22Nyini kilïtï sany kungwïn chi nyo kinam kïgh kut. Kïlenyona kïpköchï pïchay lö, kisïwa nyinte sïwïyagh ompö Kö pö Tororöt. Kïngalana morïn kwïle akïtöpö lenyoni mangalan.
23Kïkany kuwonyö pösyenyi nyo kipöghisïyi ompö Kö pö Tororöt, kïwechï kegh Sakaria katanyi. 24Nyo matyanye kïsïkisyö korkenyi Elisapet akimökïlïtnye sany ompö aro mut akïlö, 25“Kesyonchanïn ye Echotyon ompö wölini kalatan akïmalteghenanïn arasï ompö tawu pich.”
Kakïmwowï yiyo Yeso
26Kïkany otini kikïnïkisit Elisapet ompö aro mut nko akonga, kuyoktö Tororöt malaykayan Kapriel kïwö kanasyanta Nasaret nyo mi Kalilaya. 27#Luk 2:5; Mat 1:18. Kiwetöy wölo mi mïrar nyo le chepkïltït nyo kikikulotokïn chi nyo kïkuro Yosep nyo pö ara pöytoghin Daudi. Akikïkuro mïraranoni Marya. 28Kungwïnchï malaykayan akïlenchï, “Pöghisyö Marya, nyi nyï keporun Echotyon pöropchö. Mi Echotyon nko nyi.” 29Nyini kilïm Marya ngala malaykayan, kusus kegh nyoman akunonchï kegh lö, ekïpö ne takwesnï! 30Kïlenchï malaykayantanay, “Mewöghisyö Marya, ompöwölo kinyorunyi pöropcho Tororöt. 31#Mat 1:21. Isïkisïyenyi ayiyönyi worö nyo ikuronyi Yeso.
32 #
2Sam 7:12-16; Isa 9:7. Ororitu nyinte akekuro wero Tororöt nyo Töror Tya.
Töni Echotyon Tororöt nyinte ngacharu paytaghpa kukötanyi Daudi
33akïlïkwï nyinte pöytoghinto pipö ara Yakopo kokay
akïmewonyotnye paytaghtanyi.”
34Kïlenchï Marya malaykayantanay, “Ekumukisyot ngalechï lö ne akwanyï melö kyochömisyan?” 35Kuyokyï malaykayantanay lö,
“Ngwïnchininyi Mïkulögh nyo Tïlil
akuwuro owesyo Tororöt nyo Töror Tya parakungu,
kïlenyona monïngoni iyiyenyi kekuro nyo tïlil,
Wero Tororöt.
36Rose tupchengu Elisapet, nyay kilentöy pich mökïsïkönye monïng, wölo miröy ye nyinte monïng nyo pö aro mut nko akonga, kïrkegh kiyosit nyoman. 37#Tow 18:14. Ompöwölo möminye kïgh nyo pölöy Tororöt kwighöy.” 38Kïlö Marya, “Ochan mötworinto Echotyon, nya kwigha lenyoni kemwaghanyi.” Atolapay kïwechï kegh malaykayantanay.
Körutochï Marya Elisapet
39Nyo matyanye kïnap kegh Marya akukuskus kïpus kamas koro Yudea. 40Kïwö ntökïlït kö pö Sakaria akutakwes Elisapet. 41Kïkany kïlïm Elisapet takwespa Marya, kïpirön mönïng ompö muyenyi. Kungwïnchï Elisapet Mïkulögh nyo Tïlil, 42kïngalan tya lö, “Ichinyi soyönot kïtïl kor löwïr akusoyönote monïngoni iyiyenyi! 43Akï töngönchin nyo tya nyï körutowanïn yoto Echotyontenyan? 44Ompöwölo otini kalïman takwestangu, kïpirön monïng ompö muyenyan ompö ngörekyö. 45Ichinyi soyönote nyo keghan lö, pïntoy ngölyonto Echotyon nyo kimwowunyi.”
Tum pö Marya nyo pö salat
46 #
1Sam 2:1-10. Atolapay kïlö nyu Marya,
“Sölöy mïkulöwunyan Echotyon.
47Ngörökyini söpontönyan Tororöt, Ghetintenyan,
48 #
1Sam 1:11. nyo kikunananïn nyinte,
ani mötworintenyi nyo mochï kïgh.
Kïngeta ye kutang tagh,
kurenanïn pïnwöy löwïrï nyo soyönote,
49ompöwölo keghwanïn Tororöt Kimuktoghin
tïkwïn cho echön
akï tïlil kaynenyi.
50Akïtöpo kisyonötenyi nko pich
cho konyïtöy nyinte ompö pïnwöy löwïr.
51Kiporï owesyenyi nyo mamïnïng
akutoytoyö menot
52 #
Ayu 5:11; 12:19. akutyartegha pöytoghï cho owesöch ngöcherwekwa
akutokunö pich cho melö kïgh.
53Kikïpagh pich cho amate kömöy kïpïghyö
akutul monkor kïpa kïtuw.
54Kikupuntö kiyomisötenyi nyo kimwochï papotïnecha
akungwïn ompö kisyonötenyi,
kungarak mötworintenyi Israel,
55 #
Tow 17:7. lenyini kiporchï kisyonötenyi Apraam
nko monechi kokay!”
56Kïtöpö Marya nko Elisapet aro cho ngata sömök, atolapay kïmïla katangwa.
Yiyo Yoana Kipatisanin
57Kwitïta nyu osiswo Elisapet cho pö lusyogh, kïyï weri. 58Kïlïm pöröriskachi nko piko arengwa lö, kisyonchï Echotyon nyinte tya, kïturonchö chane nko nyinte.
59 #
Law 12:3. Otini kitïta monïngay osis mut nko sömök, kïpka chane kïmut montö, kimököy chane kïmïnchini kayneto kwanta Sakaria, 60wölo kïlö kame, “Ewo! Kïkuro kaynenyi Yoana.” 61Kïlenchï pïchay, “Nkï möminye arenkwa kaynatanoni.” 62Atolapay kïngölonchï paponyi ompö morïn, atökuporï lö, mököy nyinte kekuro ne werïnyi. 63Kïsom Sakaria kïgh nyo kikiröy, kukir lö, “Kïkuro kaynenyi Yoana.” Kïtöngönchï pïchay lapay. 64Otini lawel, kumï Sakaria kïngalan ngat akïsal Tororöt. 65Kuwöghisyö pöröriskökwa nyoman, kwamta pich ngalechay kïyasta komoswechay pö koro Yudea. 66Kunan chi anka tïkwïl nyo kilïm ngalechoni akïtep kegh lö, “Wetöy su monïngï kïlïkwï ne? Ompöwölo kirumï lö, kimi owesyo Echotyon nko nyinte.”
Ngorata Sakaria
67Kikinyïghit Sakaria papoto Yoana Mïkulögh nyo Tïlil, kïngorsyö lö,
68“Nya kesala Echotyon Tororöt pö Israel! Kengwïn nyinte kungarak pikachi akutyak chane.
69Akïkonecha Ghetin nyo le nyakan tya nyo pö areto mötworintenyi Daudi.
70Kimwa nyinte könyisyok ompö werkoykachi cho tïlilöch,
71lö, sörunenecha pungköcho nko owesyo pich löwïr cho reyecha,
72atökupuntö kisyonötenyi nyo kiyomisï papotïnecha akunan mumenyi nyo tïlil.
73Muma* nyo kyam nko paponyo Apraam
74nyo kiyomis lö, osörunenecha pungköcho,
atökepöghisyechinöcha nyinte kïpuryö kiwaghat,
75ompö tïlilyö nko man ompö tawunyi, ompö osiswecha löwïr.
76 #
Mal 3:1. Kïkurinyi we montanyu lö, werkoyonto Tororöt nyo Töror Tya. Intöghoghchinenyi Echotyon ateghchinö nyinte arenyi,
77atemwochinö pikachi lö, kïsöru chane, ompöwölo kïlöstoghchini chane ngokikwa,
78tïng Tororötïncha kisyonöt nko tölosyö,
ighöy kenyorunöcha löpoyïn nyo ngwïno yïm,
79 #
Isa 9:2. atökulïwchï chane cho mi tuwïn
akïmöngöy rurwo meghat
akwigh kelyecha kïtïkata ara pöghisyö.”
80Kïyetï monïngay akïchïrerit. Akïmang surkwen ntökwit asis ato kiporchï kegh nyinte, pipö Israel.
Yiyo Yeso
(Mat 1:18-25)
Currently Selected:
LUKA 1: PIPÏLIA
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
