YOANA 20
20
1Ompö asispa Chumapili kiwasan, otini kitökïtuw, kïwö Marya Makdalena kutang pïrïmponay akïsïwa lö kikengeta koghay kukanay pö pïrïm. 2Kurïp wölo mi Simon Petro nko kinetane nyanya anka kichomöy Yeso akïlenchï, “Kikechenga Echotyon pïrïm amökinkïtöchanye wölo kipa chane kutö.”
3Kïnget nyu Petro nko kinetane nyanya anka kïpa kutang pïrïmpononi. 4Kiryagh chane kwodeny, wölo kurïp tya kinetananay anka akïtïl Petro, kïnya kwitïta pïrïmpononi tagh. 5Kungïrukö akïsïwa anankischay pö katani, wölo kimölïtnye ori. 6Kimi Simon Petro lötunyi kungwïnöy, kungwïn akïlït pïrïmpononi. Kïsïwa anankïschay pö katani kikighïtochï atoni 7nko ananka nyo kikïnonoghchï mötïnyi. Kimelö kikighïtö nko anankischay pö katani wölo kikïnanagh nyinte onkït. 8Atolapay kïlït ori kinetananay anka kinya pïrïm tïkwïl, kïsïwa akughan. 9(Kitomöcha kïpköchï ngala cho mi Kikirut cho mwoghöy lö, tutu nyinte nyo mötïny.) 10Atolapay kimïlonchö kinetanchay katangwa.
Kechumchï Yeso Marya Makdalena
(Mat 28:9-10; Mrk 16:9-11)
11Kimi Marya kughyongöy akïloko pïrïmpononi sany. Akwotini kitökïloköy, kungïrukö akuros pïrïmpononi, 12kïsöchï wöloni malayken odeny cho kiloköy sïro cho relach, kimi kumpuröy atanye kimi por pö Yeso, kimi anka möt kïmi nyo pö kelyön. 13Kïtep malaykenichoni nyinte lö, “Ilochonyi ne nya we yo?” Kuyokyï lö, “Kösït pich Echotyontenyan, amonkïtönye wölini ketö chane!”
14Nyini kiwany nyinte kïmwa ngalechoni, kïwaghaka akïsïwa Yeso mi kughyongo atoni, wölo kimenkïtnye lö ki Yeso nyinte. 15Kïtep Yeso lö, “Ilokonyi ne? Ngo nyini imörenyi?” Kunonchï kegh Marya lö töptoy ki ripinto paranoni, kïlenchï, “Ato nyi nyo kesït nyinte, we echotyon, iporwante wölini ketönönyi nyinte, towan osït.”
16Kïlenchï Yeso, “Marya!” Kïwaghaka Marya akïlenchï ompö Eprania, “Rapi!” (Ato kïwaghach kelentöy, “Konetin.”)
17Kïlenchï Yeso, “Menömanïn, ompöwölo tomönye owan wölo mi Paponyu.” Wölo wïyö wölo mi werköcha aimwochï chane lö, “Owetan yïm wölo mi Paponyu akï Paponkwa, Tororötïnyan akï Tororötïnkwa.”
18Kïwö nyu Marya Makdalena akïmwochï kinetankachi lö kakïsïwa nyinte Echotyon akï nyinte nyo kömwochï nyinte ngalechoni.
Kechumchï Yeso kinetankachi
(Mat 28:16-20; Mrk 16:14-18; Luk 24:36-49)
19Kïkany kwimön asisoni pö Chumapili akimi kinetanchoni korïn ori cho kikelökön kukot, ompöwölo kiwagh chane kintöghoghi pipö Yaudi, kungwïn Yeso akughyongö kwenungwa akïlö, “Pöghisyö akwa.”
20Otini kiwany kïmwa lenyoni, kuporchï chane ewunechi nko karastanyi. Kïngörekyö kinetanchay pö Yeso nyoman otini kisïwa chane Echotyon. 21Atolapay kïlenchï Yeso chane ngat, “Nya kïtöpö kalya nko akwa. Kïle wölini kiyonwanïn Paponyan, oyontonokwa lenyoni.” 22Kikany kïmwa lenyoni, kumunchï chane akïlö, “Atacha Mïkulögh nyo Tïlil. 23#Mat 16:19; 18:18. Ato olöstoghchikwa pich ngokikwa, kelöstoghchini. Kwato molöstoghchikwanye chane, kïmelö kïlöstoghchini.”
Yeso nko Tomas
24Kimöminye Tomas (nyo kïkuro Sölowö), nyo kile akonga ompö kinetankachi chay le taman nko odeny nko chane atoni kingwïn Yeso. 25Kïmwochï nyu kinetanka walaka lö, “Kakïsïwecha Echotyon!” Kilenchï Tomas chane, “Ato masïwanye perutöyi mïsumaris ompö morichi, atatapan morïchu perutöyichoni, atatap perut nyo mi karasunyi, kïmoghönanye.”
26Kïkany kuwonyö wiki akong, otini kimi kinetanpa Yeso korïn ori ngat akimi nyu Tomas nko chane. Ki lökönote kukotï, wölo kungwïn Yeso akughyongö kwenungwa akïlö, “Nya kïtöpo kalya nko akwa.” 27Atolapay kïlenchï Tomas, “Tönö morïku yi airos morichan aighïtö ewungu aitatap karasunyan. Pïstenö tomtomönöt, aighan!”
28Kuyokyï Tomas nyinte lö, “Echotyontenyu aichï Tororötïnyu!”
29Kïlenchï Yeso, “Keghananyi, so ompöwölo kesïwaninyi? Soyönote pich cho ghönöy akïtomöcha kïsïwa chane!”
Keröto kitapunï
30Kigh Yeso kiporutkö walaka cho chang ompö tawuto kinetankachi cho melö kikikir kitapunï. 31Wölo kakikir ngalechete atamukakwa aghana lö, Yeso kï Kristo* Wero Tororöt, akwoto aghanakwa, osïkekwa söpon ompö kaynenyi.
Kechumchï Yeso kinetankachi cho le mut nko odeny
Currently Selected:
YOANA 20: PIPÏLIA
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
