TOWUNÖT 26

1Kitï kömöyu anka korononi nyo kisis nko nyakinya kipö tagh, nyo kimi ompö osiswo Apraam. Kïwö Isak kutang Kerar wölo kimi Apimelek pöytoghinto pipö Pilisti. 2Kungwïnchï ECHOTYON Isak akïlenchï, “Mewö ngat iröytö Misri, wölo töpenönyi korononi opörunyi. 3Ilïkunenyi ton ompö korononi, totöpan nko nyi asoyöninyi. Ompöwölo okoninyi tönön piko yiyengu koroswechete löwïr, achïchiman mumenyu nyo kyomwochan papongu Apraam. 4Otösan piko yiyengu kïkarkegh nko kokelya yïm tönön chane koroswechete löwïr akeperuröy pipö punton tïkwïl ompö piko yiyengu, 5ompöwölo kitechanïn Apraam akïrïp kiyomisutköchan nko kirurutköchan.”

6Kïlenyona kïmang Isak wölnö le Kerar. 7Nyini kitep piko wöloni ngaleko korkenyi, kïsöwintönchï nyinte lö ki cheptöngwa, ompöwölo kiwagh lö ato amwagh lö, ki korkenyi kitöptoy kipöröy pich nyinte tökwip Repeka, ompöwölo ki pïchigh Repeka. 8Kikany kïtöpö wölini osis cho chang, kïtopönteghö tïrisya Apimelek nyo kile pöytoghinto pipö Pilisti, kïsïwa lö pirönöy Isak nko korkenyi Repeka. 9Kïlenyona, kïkur Apimelek Isak akïlenchï, “Kichö korkengu nyete, kwompö ne temwaghanyi lö cheptönkwa?” Kuyokyï Isak lö, “Ompöwölo kyawaghan lö kïpöranïn ompö nyinte.”

10Kïtep Apimelek lö, “Ne ngölyonte nyï keghwechanyi? Kemuköy chi akong ompö piköchan ntökïrï nko korkengu tökwipkecha ngokï.” 11Kïlenyona, kïrirchï Apimelek pich lapay lö, “Kïpöröy chi anka tïkwïl kïma nyo swongöy chichï anta korkenyi.”

12Kïkatkat Isak kösïgh korononi könyinoni, kwil kïnyïl pokol, ompöwölo kiperur ECHOTYON nyinte, 13kïlïkwï chichay sïkön akïtas kïsïch tïku walaka nko walaka ntökïtenö kïlïkwï nyinte sïkön nyoman. 14Kitïng okwotin cho pö kechir nko cho pö tïch nko cho le mötwor tïkwïl cho chang cho pö konyi: kïlenyona, kwipö kong pïchay pö Pilisti nyinte. 15Kïtïpö nyïngwïny pïchay pö Pilisti koriko pögh löwïr cho kökikïpal mötworiko paponyi Apraam otini kitökïsöpöy nyinte.

16Kïlenyona, kïlenchï Apimelek Isak, “Ngetena korencha ompöwölo ichinyi awes tya kïsirecha.” 17Kïlenyona kïweghö Isak koronay akïpörtochï emenyi mpöghoghyo Kerar akïmang wöloni. 18Kïpal ngat Isak korichay pö pögh chanya kikïpal atakinya kitökïsöpöy kwanta Apraam, kïtïp pipö Pilisti otini kirapas Apraam akïkurö kaynötutchay kökikutö paponyi.

19Wölo otini kipal mötwori Isak mpöghoghyonay akïnyorchï kö pö pögh nyo kosu. 20Kïporyö mösöwo Kerar nko cho pö Isak, kimi kïlentöy, “Chicha pöghechï.” Kïlenyona kïkurö Isak köyoni pö pögh Esek,#26:20 Esek: Ompö Eprania kelentöy, “Nyo kïporyegho.” ompöwölo kiporyö chane nko nyinte.

21Kïpal koto pögh anka kïporyeghö nyoni tïkwïl, kïkurö Isak Sitna.#26:21 Sitna: Ompö Eprania kelentöy, “Pö punyontön.” 22Atolapay kïwuwö Isak wöloni akïwö kïpal koto pögh anka amelö kiporyeghö chi köyoni. Kïkurö Isak Reopot#26:22 Reopot: Ompö Eprania kelentöy, “Pöroyïn nyo tapes.” akïlö, “Ompöwölo keghwecha ye ECHOTYON pöroyïn, tökeyichinö koronete.”

23Kïweghö Isak wöloni ntökwit Persyepa 24Kungwïnchï ECHOTYON oghononi akïlenchï, “Ochan Tororöt pö papongu Apraam. Mewöghisyö ompöwölo omitan nko nyi, operurinyi, tösunyi piko yiyengu kïchangit ompö paraku mötworintenyan Apraam.” 25Kïlenyona, kïtek Isak wöloni ato kïpelo amöros akïsagh ECHOTYON ompö atoni. Akïtek emenyi, akïpal mötworichi kö pö pögh atoni.

Kam Isak muma nko Apimelek

26Kïweghö Apimelek Kerar kutang wölo mi Isak kïmi nko kongenyi Ausat nko Pikol nyo kile yetïn pö lïkenyi. 27Kïtep Isak chane lö, “Kopkonchanïkwa ompö ne akwanyï omikwa owöchanïn ayonenanïn atanya korengwo?”

28Kuyokyï pïchay lö, “Kakïsïwecha nyoman lö mi ECHOTYON nko nyi, kelecha karam kyamacha muma nko nyi, tökeyomisö kegh nko nyi, 29lö tömeghwecha kïgh nyo gha, kïle wölini melö kikidecha nyi kïgh, wölo kikïpïstecha kegh nko nyi ompö kalya. Akakesïwecha ye lö kakuperurinyi ECHOTYON.” 30Kïlenyona, kwighchï Isak chane omisyö nyo wow, kwomisyö pïchay akïgheghsyö. 31Ato mi ato le asïyech, kïnget nyini le kiwasan akwomchï kegh muma. Atolapay kïpïstö Isak chane kïpa ompö kalya.

32Ato mi asisoni, kïpka mötwori Isak akïmwochï nyinte ngala köyay pö pögh kimi chane kïpölöy lö, “Kakïnyorucha pögh!” 33Kïlenyona kïkurö Isak köyay pö pögh Sipa.#26:33 Sipa: Ompö Eprania kelentöy, “Muma.” Kïlenyona kekurö kanasyantanay Persyepa#26:33 Persyepa: Ompö Eprania kelentöy, “Kö pö pögho muma.” nko ompö nyete le ye.

Kip Esau kor cho pö sany

34Kip Esau kor odeny ato kitïngetö könyis 40 cho kipö pipö Ititi. Kip Yudit chepö Peeri nko Pasemat chepö Elon. 35Kigh koruchoni otöp nyo pö Isak nko Repeka kïngwanit.

Kesoyön Isak Yakopo

Currently Selected:

TOWUNÖT 26: PIPÏLIA

Highlight

Copy