TOWUNÖT 24

1Kikiyosit osiswechoni Apraam kitïng könyis cho chang akökikusoyön ECHOTYON Apraam ompö tïkwïn tïkwïl. 2Kïlenchï Apraam mötworintenyi, nyo ki wow ompö konyi, akipöytoy tïkuchi tïkwïl cho kitïngetö, “Kaykay tönö ewungu kïpesyenyan, 3atomunyi muma ompö kaynata ECHOTYON, Tororöt nyo pö yïm nko ngwïny lö, mepchinenyinye werïnyan työ nyo pö pipö Kanan chï omönyan kwenungwa. 4Wölo iwetenyi ntet korencha, wölo mi tïlyayicha, atepchinö korka werïnyan Isak.”

5Kïlenchï mötworintenyi, “Entötöp ntö macham cheponi kïrïpkanïn ntökwitï koronete köny, mïchini ayodan werïngu kïmïla wölini kingwïnenyi?”

6Kïlenchï Apraam, “Irip kegh tömemït werïnyan wöloni. 7Kyomwanïn muma ECHOTYON, Tororöt nyo pö yïm, nyo kimïtwanïn ongetunö koto paponyu wölini kikïyichanïn, akïngalan nko ani akïmwa lö otöni piko yiyenyan koronete, yonu nyinte malaykayantenyi kuntöghoghunyi, atepchinönyi werïnyan korka ompö wöloni. 8Wölo ato tagh cheponi kïrïpinyi, kï ketyakenyi ompö mumenyan nyete, wölo metöp ompö or anka tïkwïl lö omïtöy werïnyan wölini.” 9Kïlenyona, kutö mötworintonay ewunyi kïpesyo echotyontenyi Apraam akwomchï muma ngölyontononi.

10Atolapay kïcheng mötworintonay pö Apraam tamasayiko echotyontenyi cho le taman akïwechï kegh. Kimi kwipöy tïkwïn tïkwïl cho pïchighöch cho kiroptoy cho kichenga kato echotyontenyi, akïwö kutang kanasyan nyo kimöngöy Naor, nyo kimi koro Mesopotamia. 11Otini kitïta, kwigh tamasayichay kïkïtïngö sanypa kanasyan wölo kilekïtö kö pö pögh ato kikwimön atay petöy korï kïrömöy pögh. 12Kïsagh lö, “ECHOTYON, Tororöt pö echotyontenyan Apraam, osoghinyi lö iperurante asisete aighchï nyo karam echotyontenyan Apraam. 13Anyï ye omitan kö pö pögh kamas ataye pkonöy tipïn cho pö pipö kanasyantanete kïrömöy pögh. 14Kïlenyona chomwante työ nyo olenchinan, ‘Kaykay töne törengu ngwïny aikonante pögh aghegh,’ akïlenchanïn, ‘Achï pöghe, nya orömchan tamasayiku tïkwïl,’ ikany kïlïkwï cheponi nyini kikïlchinyi mötworintengu Isak, tonkïtwan nyu lö kesyonchinyi echotyontenyan.”

15Akwotini kitomönye kuwany kïngalan, kwitï Repeka, nyo le chepö Petuel, wero Milka, korko Naor werto ompö Apraam, kikösönuno kösïmenyi patagh. 16Ki työ nyo pïchigh nyoman, nyo kile chepkïltït. Kïröytö kö pö pögh, kunyïghit kösïmenyi akïpusï. 17Kurïp mötworintonay kïwö kïtaroch akïlenchï, “Kaykay kono pöghe tïkwïte chï mi kösïmengu aghegh.”

18Kïlenchï chepay, “Ghegha echotyontenyu,” kurekunö kösïmonay pugh lawel akutö kïgha. 19Akwotini kikutö pöghechay kïgha, kïlenchï, “Kanya owan orömchï pögh tamasayiku tïkwïl kïgha ntökïpïghyö.” 20Kïmïlchï otupö pöghechay kömi kösïmenyi akurïp kïram pöghe walaka ompö kö pö pögh kïrömchï tamasayichay löwïr. 21Kuros chichay lasiny nyinte akïsï, tökunkïtï lö ekikuperur ECHOTYON pantanyi anta tomönye kuperur.

22Kïkany otini kigha pögh tamasayichay kumuchö, kïcheng chichay kaymorïs nyo pö koltin akutö sörunyi akutö morichi apököytin odeny cho pö koltin 23akïtep lö, “Ichinyi chepö ngo nya? Kaykay mwowante. Ekïmi wölo kimuköy keruyot ompö katankwa nya?”

24Kïlenchï, “Ochan chepö Petuel, wero Milka korko Naor. 25Mi katancha mopö nko omisyewut cho chang cho kikeror cho kïpögho tamasay akïmi pöroyïn wölo ruyot to.”

26Kungïrukö chichay ompö konyït akïsal ECHOTYON, 27akïlö, “Nya kïsïch perur ECHOTYON, Tororöt pö echotyontenyan Apraam, nyo tomönye kïwutyeghö chomnyenyi nyo wow nko mantanyi nyo pö kokay, ompö echotyontenyan. Omwoghan nyo le ani lö, kemïtwanïn ECHOTYON lasiny ntökïtenö atwan koto piko ompö echotyontenyan!”

28Kurïp chepay akïwö kïmwochï pich cho pö koto kame ngalechoni löwïr. 29Kitïng Repeka werïngwa nyo kikuro Lapan. Kurïp Lapan wölini kimi chichoni ompö wölini le kö pö pögh. 30Kisïwa nyinte kaymorïsyanay nko apököytinechay, akïlïm ngalechini kimwochï chichoni Repeka. Kïwö wölini mi mötworintononi pö Apraam, kitökïmi nyinte kughyongo otini ki lekïto tamasayichi, ompö kö pö pögh. 31Kïlenchï Lapan chichay, “Nyonö, nyo kakuperurïn ECHOTYON: kölö ne teghyongonenyi sany nya? Kyaghan kö wölo irïwenyi nko wölo rusot tamasayiku.”

32Kïlenyona, kïlït chichay köyay, kutyak Lapan tamasayichay akutö chane kwam mopö nko sus cho kikïror. Atolapay kwipchï pögh mötworinto Apraam cho wuno kelyechi nko cho pö pich cho kimi nko nyinte. 33Atolapay kepchï omisyö nyinte, wölo kïlö, “Momisïyanye ntökïtenö omwowokwa ngölyon nyo kepkanïn.” Kïlenchï Lapan, “Leta tagh mwowunö.”

34Kïlenchï pïchay, “Ochan mötworinto Apraam. 35Kikuperur ECHOTYON nyoman echotyontenyan akwigh nyinte kïlïkwï monkoryon akïghetï. Ketö nyinte okwot pö kechir nko cho pö tïch nko ropïyen nko koltin nko mötwor cho le mïrön nko cho le tipïn nko tamasay nko sïkïröy. 36Kïsïkyï Sara echotyontenyan monïng nyo le weri otini kökikïyosit. Kutö echotyontenyan monïngoni tïkwïn löwïr cho kötïng. 37Kighanïn echotyontenyan am muma lö, ‘Mepïsyï werïnyan kwip työ anka tïkwïl nyo pö Kanan, pïchï omöngan tïkwïl. 38Wölo wïyönyi ntet korenyan, wölo mi tïlyayicha, atemörchinö werïnyan Isak korka.’ 39Olenchan echotyontenyan, ‘Entötöp ntökïtagh cheponi kungwïn nko ani köny?’ 40Kïlenchanïn, ‘Yokunyi ECHOTYON nyo okonyïtan malaykayantenyi atape tïkwïl tökuperur pantangu: atewenyi ipchinö werïnyan korka nyo pö tïlyayichan, nyo ngwïno koto paponyan. 41Kïkany ato itïtenyi wölini mi tïlyayichan, akïmulinyi chane cheponi, ityakenyi nyu kegh mumenyi.’

42“Nyini katwan kö pö pögh asisete, asaghan ECHOTYON Tororöt pö echotyontenyan Apraam alenchï, ‘Nyi ECHOTYON Kimuktoghin, kaykay perurwante pantanyu. 43Anyï ye omitan oghyongo köyï pö pögh nya kungwïn työ nyo ngwïnöy kïrömöy pögh, nyo ato omwochan lö, “Kaykay konante pögh tïkwïte aghegh cho mi kösïmengu,” 44akuyokï lö, “Achï pöghe, nya orömchan tamasayiku tïkwïl,” ikany kïlïkwï nyoni nyini kikïlchï ECHOTYON werto echotyontenyan kïlïkwï korkenyi.’ 45Akwotini kitomönye awanyan asagh, kwitï Repeka akipu kösïmenyi nyo kikösöno patawunyi akïröytö köyay pö pögh akïram pögh. Olenchan, ‘Kaykay konante pöghe aghegh.’ 46Panini lawel kutö törenyi ngwïny akïlö, ‘Achï pöghe ghegha, nya orömchan tamasayiku tïkwïl.’ Kïlenyona agheghan, atowonyö kïrömchï tamasayichan. 47Atolapay atepan lö, ‘Ichinyi chepö ngo?’ Kïlenchanïn, ‘Ochan chepö Petuel, wero Naor nyo kisïkyï Milka nyinte.’ Otönön kaymorïs sörunyi, tönön karïn ewunechi. 48Atolapay ongïrukan ompö konyït asaghan ECHOTYON. Asalan ECHOTYON Tororöt pö echotyontenyan Apraam, nyo kentöghoghwanïn ompö or nyo tenate atomïtyï werïnyi korka nyo pö tïlyeto werïngwa. 49Kïlenyona ye nyu, ato achamakwa oghchinö echotyontenyan nyo karam akï pö man, omwowanïn, atasïwan kïgh nyo oghöy.”

50Kuyokyï Lapan nko Petuel otini kiwany kïlïm ngalechoni lö, “Ngwïno ngölyontononi ECHOTYON, kïlenyona mökimukechanye kemwoghe kïgh. 51Anyï Repeka mi tawungu, ape nko nyinte tökïlïkwï korketo werto echotyontengu kïle nyini kimwa ECHOTYON.” 52Nyini kilïm mötworinto Apraam ngaleko pïchoni, kungïrukö ntökwit ngwïny ompö konyït ompö tawu ECHOTYON. 53Atolapay kutö mötworintonay Repeka kari silpa nko koltin nko sïro akutö ngat werto ompö Repeka nko kame tïkwïn cho pö olyot nyo wow.

54Atolapay kwomisyö akïgheghsyö mötworintonay pö Apraam nko pich cho kimi nko nyinte akïruyö. Otini kinget ato le asïyech, kïlö, “Ochömwante owö wölo mi echotyontenyan.” 55Kïlenchï werïngwa nko kame, “Nya kïtöpö nko acha chepï osis cho ngörï, cho ngata osis taman tökïwö nyu.”

56Wölo kïlö chichay, “Morötanïn ngat ompöwölo kikusoyönwanïn ECHOTYON pantanyu, ochömwanïn owö wölo mi echotyontenyu.”

57Kïlö pïchay, “Nya kekuröcha cheponi töketepacha nyinte.” 58Kïkur Repeka akïtep lö, “Ichömenyi wete nko chichï nya?” Kuyokyï lö, “Owöy owetan.”

59Kïchömchï werïngwa Repeka nko chepto montanyi, kïwö nko mötworinto Apraam nko pikachi. 60Kusoyön nyu chane Repeka kïlenchï,

“Cheptönyo, lïkwï kama söpïchis cho makïrar,

ikany kïrïnta moneku punkökwa!”

61Atolapay kïnget Repeka nko tipichi kïpegha tamasay akïrïp chichay. Kumït mötworintonay Repeka kïpechï kegh.

62Kitökungwïno Isak atoni wölnö le Peer Laay Roy#24:62 Peer Laay Roy: Poru lö kö pö pögh nyo pö Nyinte nyini Söpöy nyini Sïwïyanïn. kïmang okumpö wölnö le tagh nyo pö koro Nekep.* 63Kimi Isak atoni wölo le wuw kïsoghöy otini kituwit, atolapay kïlö otopön yona, kïsïwa tamasay cho kipkonöy. 64Otini kisïwa Repeka Isak, kïrökunö tamasunyi 65akïtep mötworintonay pö Apraam lö, “Ngo chichinö ngwïno wölnö le wuw kïtörokecha?” Kïlenchï mötworintonay, “Echotyontenyan nyinte.” Kïlenyona, kïcheng Repeka anankenyi akuyenö konyichi.

66Atolapay kïmwochï mötworintonay Isak ngal löwïr cho kigh nyinte. 67Kumït Isak Repeka kïwö orito emeto kame Sara, atolapay kwip Repeka kïlïkwï korkenyi. Kicham Isak Repeka, kïnyorï Isak saghsaghat ompöwölo kökima kame.

Monïngo Apraam walaka

(1Ot 1:32-33)

Currently Selected:

TOWUNÖT 24: PIPÏLIA

Highlight

Copy