WUWÖT 5
5
1Kïwö Musa nko Aron wölo mi Parao akïlenchï, “Kölö ECHOTYON, Tororöt pö Israel, ‘Nya kïpa piköchan, kwighwanïn ichon ompö surkwen.’ ”
2Kïlö Parao, “Ngo nyo le ECHOTYON, nyo omukan ater kutinyi apïstö pipö Israel kïpa? Monkïtönye ECHOTYON, amopïstonanye pipö Israel kïpa.”
3Kïlö chane, “Keporwecha kegh Tororöt pö Eprania, kïsomechanyi pïstecha kepe rutogh nyo pö osis sömök wölnö le surkwen, atöketönöcha ECHOTYON Tororötïncha amöros, atömöparenecha sömew anta chok.”
4Kïlenchï pöytoghinto Misri Musa nko Aron, “Ompö ne tomökekwa kïpïstö pïchï ighisyengwa? Nya kwigh pich ighisyengwa. 5Ompöwölo kichangit pïchï ompö koronï omökekwa kumuny lö ne ompö ighisyewutkökwa?”
6Kïlenchï asisoni Parao yetïntino pich nko kighyongteghikwa, 7“Motönö ngat pich mopö cho igho mataparen, nya kïpa chane kïmar. 8Tönö chane kwigh mataparen cho tenö chay keghöy osis, machïchuk kïgh ompö choni, ompöwölo kilïkwï soson pïchï. Nka nyete lochot lö opïstecha kepe ketönö amöros Tororötïnyo. 9Otönö pïchï kwigh ighisyö nyo wow, atökïpïstö kïter ngala putintön.”
10Kïpa sany yetïntinechay nko kighyongteghï akïlenchï pipö Israel, “Kölö Parao, ‘Mökekonokwanye mopö. 11Ape akwane amara wölo onyorchini. Amökichïchukönye ighisyenkwa.’ ” 12Kïtoyechï pïchay koronay kïmïkul pö Misri, kïyar mopö. 13Kïköromöchitu kighyongteghichay akïlö, “Awanga ighisyengwo, nyo tenö nyay koghekwa ngat, atay kömito mopö.” 14Kemuny, kighyongteghichay pö pipö Israel cho kikïl kighyongteghi Parao aketep lö, “Ompö ne tömawangakwa ighisyenkwa asete nyo pö mataparen le ato koghekwa osis.” 15Kïpa kighyongteghi pipö Israel kïlokyï Parao akïlenchï, “Ompö ne teghchinönyi mötworiku le nyï? 16Mömicha mopö cho kïkonecha akïlenchinecha, ‘Agha mataparen!’ Kakïmungecha wölo pö lelutye piköku.”
17Wölo kïlö nyinte, “Ochikwa soson nyoman, nka nyï olentekwa pïswecha kepe ketönö amöros ECHOTYON. 18Ape nyu, agha ighisyö akï mömicha mopö cho kïkonokwa, wölo oghekwa mataparen cho tenö chay pö osis.” 19Kïsïwa kighyongteghi pipö Israel lö kitïng chane kömpölelyö, otini kikïmwochï lö, “Mochïchukekwanye mataparenikwa ompö chinö koghekwa osis.”
20Kuryam kighyongteghichay nko Musa nko Aron cho kiköngöy chane otini kipkono wölo mi Parao. 21Akïlenchï chane, “Nya kïsïwa ECHOTYON akurwokwekwa, ompöwölo kaghechakwa keghachituna ompö tawu Parao nko mötworichi aghakwa nyinte kïnyorï kïgh nyo pörenecha.”
Köngwïrngwïronchï Musa ECHOTYON
22Kïlenchï Musa ECHOTYON, “Echotyon, ompö ne teghchinönyi pïchï nyo gha? Akwompö ne teyoktaninyi? 23Ompöwölo kïngata otini kyangwïnan wölo mi Parao angalanan ompö kaynengu, kwighchï nyo gha pïchï, akïtomönye sörunönyi piköku nyonikïny.”
Currently Selected:
WUWÖT 5: PIPÏLIA
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
