WUWÖT 2

1Kiwö chi akong nyo pö ara Lawi kwip chepö pipö Lawi. 2#Ist 7:20; Epr 11:23. Kïmir kokonay akïyï weri. Otini kisïwa lö monïng nyo karam, kïwïny ompö aro sömök. 3Akï otini kimökumukönye kïwïny ngat kïnöpchï tirïpka nyo mïnïng nyo pö awawat. Akïmala tömönchö akutö monïngay ori akïwïnchï kwenu sus cho mi kamasu lalwa. 4Kughyongö cheptöngwa ato low kite, ompöwölo kimököy kunkïtu lö ne nyo igho ompö nyinte.

5Kungwïn chepö Parao atökuwun kegh ompö lalwa. Kimi mötworichi kïpestoy ompö sörömu lalwa. Kïsïwa nyinte tirïpkanay mi kwenu sus kïyonta mötworintenyi kïwö kïchengwï. 6Otini kiyat kïsïwa monïngay kimi kïloköy, kusyonchï akïlö, “Nyï kï akonga nyo pö monïngo Eprania.” 7Kïlenchï chepto ompö monïngay chepö Parao, “Owan okurunyi akonga ompö koru Eprania kïnömunyi montö?”

8Kïlenchï chepay pö Parao nyinte, “Wïyö ye.” Kïwö chepay kïkurï kameto monïngay. 9Kïlenchï chepö Parao kokonay, “Sïtö monïngï ainömwanïn okoninyi ropïyen cho pö ighisyengu.” Kwip kokonay monïngay akïwö kïnam. 10#Ist 7:21.Otini kïyetï monïngay, kïsïtyï kokonay chepö Parao kïlïkwï montanyi. Kïkurö nyinte Musa#2:10 Musa: Ompö Eprania kï, nyo kakïngwïsuna pögh ori. akïlö, “Ompöwölo kyangwïsunan nyinte pögh ori.”

Keperta Musa kïwö Midyan

11 # Epr 11:24. # Ist 7:23-28. Otini kiyetï Musa, kïwö wölo mi pikökwa. Kïsïwa wölo kikichoptoy kong chane. Kïsïwa chi pö Misri kulïwöy chi pö Eprania nyo le nyingwa. 12Kura wölnö nko wölnö otini kisïwa lö kimöminye chi. Kïpar chichay pö Misri akïtïpchï ngoyomwö. 13Nyini kiwö Musa asisto odeny, kïsïwa pipö Eprania odeny cho kïporyot. Kïlenchï Musa nyinö kalel, “Ompö ne telïwenyi werïngwo?”

14Kuyokyï lö, “Ngo nyo keghinyi lïkuna yetïntöncha nko kirwokintencha? Imökenyi paranïn so le atay keparanyi chi pö Misri?” Kïmïgh Musa akïlö, “Nyoman kikenkïtï kïyay kaghan.” 15#Ist 7:29; Epr 11:27. Otini kinkïtï Parao kïmach kïpar Musa.

Wölo kuperta Musa akïwö kitöpö koro Midyan. Akumpur kö pö pögh kamas. 16Kimi tïsinto Midyan nyo kitïng tipichi mut nko odeny. Kïpka chane kïrömchï kyakikwa pögh. Otini kitökïrömchini pögh, 17kïpka mösöwö walaka kïyon chane. Wölo kïnget Musa akungarak tipichay kïrömchï pögh kyakikwa. 18Nyini kit kaw kïtep papongwa Reuel lö, “Ompö ne tapkanakwa asete lawel?”

19Kïlö chane, “Kengarakecha chi pö Misri ompö mösöwechay akïrömwecha pögh akughegh kyaki.”

20Kïlenchï Yetro tipichi, “Akïmi onö chichoni? Ompö ne topïstenökwa nyinte? Okurunö kwomisyö nko acha.”

21Kïcham Musa kïmang wöloni, kuyilchï Yetro Musa cheptanyi Sipora. 22Kïyï kokonay worö, kïkurö Musa kaynenyi Kersyom,#2:22 Kersyom: Ompö Eprania kï, karkegh nko pïnotyon. ompöwölo kilö, “Kalïkwan pïnotyon ompö koro pich walaka.”

23Nyini kiwer osiswö cho chang kïma pöytoghintonay pö Misri. Kïsïch ngwonïn pipö Israel ompö mötwornönengwa akïlokyö kïmach kingörokut, kïlïm Tororöt lokekwa 24#Tow 15:13-14. akunan mumenyi nyo kyam nko Apraam nko Isak nko Yakopo. 25Kuros Tororöt pipö Israel akïsïwa kömpölelyengwa.

Kökur Tororöt Musa

Currently Selected:

WUWÖT 2: PIPÏLIA

Highlight

Copy