WUWÖT 12
12
1 #
Law 23:5; Kiy 9:1-5; 28:16; Krt 16:1-2. Kïmwochï ECHOTYON Musa nko Aron ompö koro Misri lö, 2“Lïku arawanï ompö akwa nyo pö tagh ompö köny. 3Mwochinö söpïch pö Israel lö, ompö asisto taman nyo pö arawanï kïmïchini kïcheng chi anka tïkwïl wawa kech kïrïp kegh nko koriko papotïnekwa. 4Ato melö pöro kachi nyo muköy ntökwam kech opïn, kutuyö kegh nko pöröryenyi. Onkïtukwa nyu kiyitötengwa kïrïp kegh nko pich cho kam wawanay pö kech. 5Ochengekwa wawa nyo lïpop nyo tïng köny akonga nyo le makal anta kwagha. 6Arorekwa ntökwit nangatu asis nyo pö taman nko angwan nyo pö arawanete, otini pöröy pipö Israel warechay. 7Atolapay kïcheng kisönkö akïnyïra pölöwo kukat nko chïrchïru kuka köyoni komisyeghö chane, 8omöy chane pentö aghononi nyo kakïpel nko makatin cho puryö mumar nko onkïy cho ngwonöch. 9Mam peny kïnyaril anta nyo kakigha, wölo nyo kakïpel kïmïkul nko mötït nko kelye nko tïkuko mu. 10Amakany kïngötï ompö nyo mïnïng ntökwit tökwoghö, ato mi nyo köngötï apel. 11Anyï wölo omtonekwa: okörmönekwa sïrokökwa, atö kwegh kelyön, anama lïkïp egh. Omisïyekwa lawel. Nyoni kï Pasaka nyo pö ECHOTYON.
12“Ompöwölo oweran koro Misri oghononi apöran poretay löwïr ompö koro Misri nyo pö chi nko cho pö kyak arwokyinan tororötin löwïr cho pö Misri. Ochan ECHOTYON. 13Lïku kisön machey ompö akwa, ompö korïn cho omitekwa. Akï otini kasïwan kisönchoni, atïlakwa akï möminye sömewö nyo nyorokwa otini onyörilan kong pipö koro Misri. 14#Wuw 23:15; 34:18; Law 23:6-8; Kiy 28:17-25; Krt 16:3-8. Lïku asisï asispa kinanat ompö akwa arip le ichon nyo pö ECHOTYON, ompö pïnwöyikwa löwïr. Oripekwa le kirurut nyo pö kokay.”
Ichon pö Makatin cho puryö mumar
15Kïlö ECHOTYON, “Omekwa makatin cho puryö mumar ompö osis mut nko odeny, onoteghokwa asisto tagh mumar ompö korikwa, ompöwölo ato am chi makatyan nyo kakitö mumar kïngata asisto tagh ntökwit nyo pö mut nko odeny, kepesyot chichoni ompö pipö Israel. 16Oghekwa tuyot nyo pö saghat ompö asispa tagh nko asispa mut nko odeny. Möminye ighisyö nyo kighöy osiswechoni, wölo oghekwa omisyö nyo omekwa. 17Orip ichononi ompöwölo kyamïtunenekwa koro Misri asisoni. Kïlenyona orip asisoni ompö pïnwöy löwïr, le kirurut nyo pö kokay. 18Omekwa makatin cho puryö mumar nangatu asispa taman nko angwan ntökwit nangatu asispa 21 nyo pö arawa nyo pö tagh. 19Mömicha mumar cho kïnyorchini korikwa ompö osis mut nko odeny, ompöwölo ato am chi makatin cho kakitö mumar, kepesyot ompö pipö Israel, ato kö ton anta chito kore. 20Momekwanye makatin cho mi mumar. Omekwa makatin cho puryö mumar ompö wölini omöngekwa.”
Pasaka nyo pö tagh
21Kïkur Musa poyi Israel lapay akïlenchï, “Akïl wara kechir kïrïp kegh nko korikwa ayeng wawa nyo pö Pasaka. 22Acheng rötutyo ket cho kïkuro isop* anönokö kisön cho mi otupö anyïra chïrchïru kukat nko pölöwo kukat. Amöminye chi nyo lïtöy sany ntökwit tökwoghö. 23#Epr 11:28. Ompöwölo ngwïnöy ECHOTYON kïpöröy koro Misri akï otini kasïwa kisön cho mi chïrchïru kukat nko cho mi pölöwo kukat kuweröy ECHOTYON kuke amöpïsininye malaykayan nyo le kinyorin kïlït korikwa atökïparakwa. 24Orip nyu ngölyontonï le kirurut ompö akwa nko monekwa kokay. 25Akï ato atakwa kor nyo konokwa ECHOTYON, lenyini kiyomis, orip ichonï. 26Akï ato lenchokwa monekwa, ‘Poru ne ichonï?’ 27Olenchikwa, ‘Amöros pö Pasaka ECHOTYON ompöwölo kitïl ECHOTYON kori pipö Israel ompö koro Misri, otini kipar chane kïpïstö koricha.’ ” 28Atolapay kïpa pipö Israel kwigh lenyini kimwochï ECHOTYON Musa nko Aron.
Megha poretay
29Kïpar ECHOTYON oghökwen poretay löwïr cho pö pipö Misri, kutorö poretye nyo pö Parao nyo mïlöy ngacharu paytagh ntökwit poretye nyo pö chi nyo mi chela nko poretay lapay cho pö kyak. 30Kïnget Parao oghö nko mötworichi nko pipö Misri löwïr. Kimito nyu rirata nyo wow koro Misri, ompöwölo kimöminye kö nyo kingötï mamegha chi. 31Kïkur Parao Musa nko Aron oghö akïlenchï, “Ngeta aiweghö wölo mi piköchan, akwa nko pipö Israel. Ape opöghisyechinö ECHOTYON lenyini kamwaghakwa. 32Aranga nekökwo nko tukökwo, lenyini kamwaghakwa apechï kegh. Asoghwanïn tïkwïl osïch kisoyönöt.”
33Kisoryö pipö Misri kïyon pïchay lawel ompö korengwa, ompöwölo kilö, “Kïmeghocha ato mapacha pïchï.” 34Kïcheng pich makatinekwa kïtomö ketö mumar nko karikwa cho kyomisyegho kïrötote akukach löyoswekwa. 35Kwigh pipö Israel le ato kimwochï Musa. Kïsom pipö Misri kari ropïyen nko koltin nko sïro. 36Kutö ECHOTYON chamat pipö Israel ompö tawu pipö Misri, ato kïchömchï kini kösom chane. Kïlenyona kïchenga pipö Israel pipö Misri tïkukwa löwïr.
Köwuwö pipö Israel Misri
37Kïpegha pipö Israel Rameses ntökwit Sukot. Ki ngata chane mïrön 600,000 cho kipegho kelyön, melö kiyitote korï nko monïng. 38Kipa pikö walaka cho chang tïkwïl cho sis nko tïch cho chang nko kechir nko ngaror. 39Kwigh makatin cho puryö mumar ompö pïsyechay kikïtïp cho kipunö koro Misri, ompöwölo kikïyonunö chane Misri möpöghöncha akimeghchïcha kegh omisyö nyo pö rutogh.
40Kimang pipö Israel Misri könyis 430. 41Ompö asis nyo pö sörömu könyiswechay le 430, kïpegha söpïch pö ECHOTYON löwïr koro Misri. 42Ki oghö nyo kinono ECHOTYON, ompöwölo kimïtuna pipö Israel koro Misri. Kïlenyona nyï kï oghö nyo pö ECHOTYON nyo nonöy pipö Israel ompö pïnwöyikwa löwïr.
Kirurut pö Pasaka
43Kïlenchï ECHOTYON Musa nko Aron, “Nyï kï kirurut nyo pö Pasaka. Möminye pïnotyon nyo omöy omisyononi. 44Muköy sekeyonta anka tïkwïl kwam nyo kakyala ropïyen ato kamutakwa. 45Möminye ton anta mötworin nyo omöy omisyononi. 46Kyomo kö akonga, möminye peny nyo kipöy sany amökïtïgh koye. 47Nya kïrip pipö Israel löwïr. 48Ato möngöy pïnotyonta nko akwa akïrip Pasaka nyo pö ECHOTYON, akany kemut nyinte nko werkachi löwïr, atökïrikwï nyinte akïrip. Lïku nyinte le nyo kakïyichï korononi. Möminye somchon nyo omöy omisyononi. 49Karkegh kirurut nyo pö chito kore nko nyo pö ton nyo möngöy nko akwa.” 50Kigh pipö Israel löwïr lenyini kimwochï ECHOTYON Musa nko Aron. 51Kimïtuna ECHOTYON asisoni pipö Israel koro Misri.
Kitïlilöt nyo pö poretay
Currently Selected:
WUWÖT 12: PIPÏLIA
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
