WUWÖT 10

1Kïlenchï ECHOTYON Musa, “Wïyö wölo mi Parao, ompöwölo kyaghan mötïnyi kwaghïghit nko mötworichi, toporchan chane kiporutchï, 2atemwochinö moneku nko moneko moneku kïgh nyo kyaghan ompö Misri nko kiporut cho kyaghan tonkïtunö lö ochan ECHOTYON.”

3Kïwö Musa nko Aron wölo mi Parao akïlenchï, “Kölö ECHOTYON Tororöt pö Eprania, ‘Itöghenyi nko oyï su ate ipönyi kegh ngwïny ompö tawunyan? Pïstenö piköchan kïpa, atökïpöghisyeghwanïn. 4Ato itöghenyi kïpa piköchan, opunan asïyech talam korengu. 5Kulum ngwïny ntömökïsïwïyinye chi ngwïny akwomöy nyo köngötunö takarïs nko ket anka tïkwïl nyo mi par. 6Nyïghiti talamnya korikwa nko kori mötworikwa nko kori Misri löwïr ghöyitu nyu kïtïl cho kisïwa papotïnekwa anta kukötinekwa, kïngata otini le könyisyok.’ ” Atolapay kïnget Musa akïweghö tawu Parao.

7Kïlö mötwori Parao, “Konecha chichï su kömpölelyö nko oyï? Möpïstö pïchï kïpa, atökïpöghisyechï ECHOTYON Tororötïngwa. Tomönye kïpköchinyi lö kikunyara koro Misri?”

8Kïkur ngat Parao Musa nko Aron akïlenchï, “Ape opöghisyechinö ECHOTYON Tororötïngwo, wölo ompö ngo cho petöy?”

9Kïlö Musa, “Kïpetecha nko monecho nko poyicho. Kïpetecha nko monecho cho le wor nko tipïn nko kyakicho, ompöwölo rokenecha keghchinö ECHOTYON ichon.”

10Akïlenchï chane, “Owolwolan kegh ompö ECHOTYON lö melö opïstenokwa ape nko monekwo! Ompöwölo köpköchanïn ye nyu lö omökekwa opïne. 11Kïlenyona ape cho le mïrön opöghisyechinö ECHOTYON, ompöwölo nyoni nyo komökekwa.” Atolapay keyon chane ompö tawu Parao.

12Kïlenchï ECHOTYON Musa, “Ghïtenö ewungu ompö koro Misri atökïpka talam kwam ket löwïr ompö kor cho kituk takarïs.” 13Kughïtö Musa lïkïnyi ompö koro Misri, kïkutuna ECHOTYON yomöt kongasis asisoni kwimön. Otini kiyech kïchï kipï yomonay talam. 14#Ngo 9:2-3. Kïpka talam kulum koro Misri kïmïkul, kitomönye kïmito talamnya nyo teno nyoni amelö tökesïwïyi ngat. 15Ompöwölo kilum kore kïmïkul, kïtuwit lömïs akwam ket löwïr cho pö kor nko akwa ket cho kituk takarïs möminye kïgh nyo nyaril nyo kingötï, nyo le ket anta pagh ompö koro Misri.

16Kïkur Parao Musa nko Aron panini akïlenchï, “Koghchan ngokï ECHOTYON Tororötïnkwa nko akwa. 17Kïlenyona osomokwa lö, olöstewo ngokichu ye asagh ECHOTYON Tororötïnkwa kunategha nyarïlnï ompö ani.” 18Kïweghö wölo mi Parao akïsagh ECHOTYON. 19Kïkutuna ECHOTYON yomöt nyo wow okumpö ta nyo kinget talamchay akwip kutang Nanam nyo Pïrir. Möminye talamnya ompö akong nyo kingötyï koro Misri. 20Wölo kwigh ECHOTYON möt pö Parao kwaghïghit amöchömchïnye pipö Israel kïpa.

Tuwïn

21Kïlenchï ECHOTYON Musa, “Ghïtenö ewungu kutang yïm atökungwïn tuwïn koro Misri nyo kïnömöy kawagh sör.” 22#Tum 105:28; Ngo 16:10.Kughïtö Musa ewunyi kutang yïm, kïtuwit lömïs koro Misri ompö osis sömök. 23Kimasïwanye kegh pipö Misri anta ngeta otini kimi ompö osis sömök, wölo kitïng pipö Israel löpoyïn ompö korengwa.

24Kïkur Parao Musa akïlenchï, “Ape, opöghisyechinö ECHOTYON nko monekwo, wölo nya kïngötï kyakikwa.”

25Wölo kïlö Musa, “Mïchini ketïngetecha amörostin cho kïpelöy nko amörostin walaka atöketönö ECHOTYON Tororötïnyo. 26Petöy tukacha nko acha tïkwïl. Möminye ompö akong nyo ngötu, mïchinecha keranga kyakicho töketönö ECHOTYON Tororöt, ompöwölo melö kinkïtöcha ye lö ne nyo kitöni ECHOTYON ntökïtenö ketacha wölini.”

27Wölo kwigh ECHOTYON möt pö Parao kwaghïghit, amelö kitökïpïstö chane kïpa. 28Kïlenchï Parao Musa, “Weghenö tawunyan airip kegh. Memïlena ngat, ompöwölo asisini kemïlenyi imeghenyi.” 29Kïlö Musa, “Nya kïlenyoni kemwaghanyi mosïwïyanye tokochungu ngat.”

Kamwa Musa lö, meghot poretay

Currently Selected:

WUWÖT 10: PIPÏLIA

Highlight

Copy