MARKUS 1

Kotbah Yohanes Popondus

(Mat. 3:1-12; Luk. 3:1-18; Yoh. 1:19-28)

1Tuhrih Kabar Hinut tohou Yesus Kristus, Anak Pohotala. 2#Mal. 3:1 Kabar Hinut rih pahtukoh kolou ijo tonyurat bain Nabi Yesaya, koloutuh,

“ ‘Tuhrih ijo sonuhu-Ku,’ hion Pohotala;

‘Ahku nyuhu io, labihhoun tahkanumba-Mu

mangat Io nawas jalan ahkan-Mu.’

3 # Yes. 40:3 Anai ulun ijo na'ah ang padang balambah,

‘Nahtapohrih jalan ahkan Tuhan;

morahta jalan-jalan ijo ahkan tononguha-Oh.’ ’’

4Kolou ijo tonyurat orih, kolouorih rih ka'a lombut Yohanes ang padang balambah. Io mopondus ulun tutang momborihta borihta tahkan Pohotala. “Ihkam harus hubah tahkan dusa-dusan'kam tutang harus ponopondus, mangat Pohotala ngapun ihkam,’’ kolourih hion Yohanes. 5Paring ulun tahkan tanah Yudea tutang lowu Yerusalem tulak ngonih Yohanes. Iro ngahku dusa-dusan'ndo, tutang Yohanes mopondus iro ang Sungoi Yordan.

6 # 2Lahc. 1:8 Yohanes nokehpan hatiu tahkan bulun unta. Pohtong kahangoh tahkan uhpak, tutang ukuioh mokalop tutang oling lawung. 7Io narung borihta tuh, ‘‘Noin ulimba ahku, ahkan lombut ulun ijo labih hajo tahkanumba ahku. Ahkan nyundop nguwat talin soruhpah-Oh ka, ahku eam anaigunaioh. 8Ahku mopondus ihkam umba danum, tahpi Io mopondus ihkam umba Roh Pohotala.’’

Yohanes mopondus Yesus

(Mat. 3:13-17; Luk. 3:21-22)

9Ang ohkot orih Yesus lombut tahkan Nasaret ang tana Galilea, tutang Yohanes mopondus Io ang Sungoi Yordan. 10Kodorih Yesus kuat tahkan sungoi rih Io nohto langit bokuap tutang Roh Pohotala mosuluh kolou bulung dala nokuh ngosan Yesus. 11#Gen. 22:2; Msm. 2:7; Yes. 42:1; Mat. 3:17, 12:18; Mrk. 9:7; Luk. 3:22 Pongohuli konahan auh Pohotala nuhtui, ‘‘Ihkorih Anak-Ku ijo Ahku ngasih-Oh. Ihko ngojorih ahtoi-Ku.’’

Yesus tonihkos bain Sehtan

(Mat. 4:1-11; Luk. 4:1-13)

12Toturus ulimba rih Roh Pohotala ngomin Yesus tulak nokuh padang balambah. 13Ohpat pulu ondou Io anai ang anan, Io tonihkos bain Sehtan. Ohcin-ohcin boliar anai ka'a sama-sama umba Io ang anan, tutang molehkat-molehkat mahalu Io.

Yesus na'ah ohpat behti ulun pongohcin

(Mat. 4:12-22; Luk. 4:14-15, 5:1-11)

14Uliorih Yohanes ponosolong ang sipir, Yesus tulak nokuh Galilea, tutang nyiar Kabar Hinut tahkan Pohotala ang anan. 15#Mat. 3:2 Hioi-Oh, ‘‘Pohotala ahkan jeleng moretah. Hubah ihkam tahkan dusa-dusan'kam, tutang porocayarih umba auh Kabar Hinut ijo tahkan Pohotala!’’

16Kotihka Yesus nyalan ang saran Danou Galilea, Io nohto duo behti pongohcin, iorih Simon tutang arioh Andreas. Iro rahat nawan ohcin ang danou rih umba jala. 17Yesus nuhtui umba iro, ‘‘Ngahasurih Ahku, Ahku ahkan majar ihkam monjala ulun.’’ 18Hunrih iro nohtah jala'ndo turus ngohasu Yesus.

19Yesus nyalan turus, turus nohto hino duo behti hokonduang ijo bohkon, yorih Yakobus tutang Yohanes anak-anak Sebedeus. Iro anai ang luwang alut ngorong jala'ndo. 20Yesus turus na'ah iro. Tutang iro nohtah amai'ndo ang luwang alut hihcoumba ulun-ulun upahan'ndo. Turus iro tulak ngahasu Yesus.

Ulun ijo tonyalung roh ja'at

(Luk. 4:31-37)

21Yesus tutang murid-murid-Oh johcok ang lowu Kapernaum. Ang ondou Sabat pongooh, Yesus nyolong nokuh lohpou sombayang tutang nopara majar. 22#Mat. 7:28-29 Ulun-ulun ijo ngonih-Oh helan umba cara-Oh Io mongajar. Tului, Io mongajar hapan pongaroh eam kolou guru-guru agama.

23Ang ohkot orih ihcobehti ijo tonyalung roh ja'at nyolong luwang lohpou sombayang, tutang ngoriak, 24‘‘O, Yesus ulun Nasaret, Ihko nguan inon umba ihkai? Ihko lombut ahkan morusak ihkai? Ahku kota'an iai Ihko: Ihko suruhan ijo borasih tahkan Pohotala!’’

25‘‘Tonih!’’ korahang Yesus umba roh ja'at orih, ‘‘soluka ihko tahkan ulun tuh!’’

26Mahka roh ja'at orih ngunde-nguhap ulun orih paham-tu'u, pongohuli bolua tahkan ulun rih sambir ngociak. 27Paring ulun helan samasino, nyiring iro hoponuhtui sama aropoh, ‘‘Bah, inon tuh? Ihco ajaran ijo bohua! Umba pongaroh tutang kowasa, Io moretah roh-roh ja'at soluka, tutang iro te'et umba-Oh!’’

28Mahka kabar tohou Yesus turus tosiar honong jeleng johcok hokodiling tana Galilea.

Yesus ngopios aro ulun

(Mat. 8:14-17; Luk. 4:38-41)

29Yesus tutang murid-murid-Oh nohtah lohpou sombayang rih, tutang tulak nokuh lohpou Simon tutang Andreas. Yakobus tutang Yohanes tulak ka'a homboh iro. 30Ohpu Simon rahat ngarot poros darom ang unukoh tiruh. Jadi uhun Yesus tutang murid-murid-Oh nyolong nokuh lohpou rih, Yesus tonarung tohou hal rih. 31Mahka Yesus tulak nokuh ohpu Simon, tutang nambit longoioh turus dohop io kuat. Pondam orih nihou, tutang io ka nopara nyorungan'ndo.

32Sohit ondouoh, ulimba mahtanondou bolop, ulun-ulun ngomin ahkan Yesus paring ulun ijo poros tutang ijo tonyalung roh ja'at. 33Paring ulun-ulun lowu rih, ngorumbung ang boun lohpou rih. 34Turus Yesus ngopios aro ulun ijo ngarot aro mahcam koporos rih tutang muhko ka'a aro roh ja'at. Io eam nyuhu roh-roh ja'at rih nuhtui, tului iro rih ta'ai, iai Io.

Yesus kotbah ang Galilea

(Luk. 4:42-44)

35Ngohkosoh hondouoh, ohkot magun bota-botat, Yesus monyun turus nohtah lohpou rih. Io tulak nokuh unuk ijo tonih ang lihkut lowu, tutang bodo'a ang anan. 36Tahpi Simon tutang injah-injahoh tulak ngurah Io. 37Tutang ulimba iro nyombang Io, iro nuhtui, ‘‘Paring ulun rahat tuh ngurah Amai.’’

38Tahpi Yesus mutah, ‘‘Ayu ihto noturus ponyalan ihto nokuh lowu-lowu bohkon ang kodiling ohtoi. Ahku harus bokotbah ang anan ka'a, kotului orih konohuangoh Ahku kanohtoi.’’

39 # Mat. 4:23, 9:35 Tului orih Yesus tulak koumo-umoh ang hopus Galilea, tutang bokotbah ang lohpou-lohpou sombayang hawui muhko roh-roh ja'at.

Yesus ngopios ihcobehti ijo hoponyahkit belang

(Mat. 8:1-4; Luk. 5:12-16)

40Ihcobehti ijo boponyahkit belang ijo mopihkoh lombut nokuh Yesus. Ulun orih suhkuntu'ut, tutang nuhtui, ‘‘Amat Amai kani, Amai duon ngopios ahku.’’

41Yesus ngasi umba ulun orih. Jadi, Io ninjok ulun rih hawui nuhtui, ‘‘Ahku kani, pios iou!’’ 42Wayah orih ka'a ponyahkitoh nihou tutang io pios. 43Turus Yesus nyuhu io tulak tutang pohtoh tuh, 44#Lew. 14:1-32 ‘‘Bua-buah, ara ihko mander umba iai beweu, tahpi tulak nokuh imam, tutang nyawot io ahkan momasti, ijo ihko jari pios. Turus ahkan kopios'kam rih, nyarah porahpah numbun ijo ponohto Museh, monjadi kahta ahkan ulun-ulun ijo ihko tu'u-tu'u ius pios.’’

45Tahpi ulun rih tulak, tutang hototurus monyiar ijo monjadi orih, koumo-umoh nyiring Yesus eam duon nyolong lowu honong tarang-tarangan. Io tihkas mohcon ang ruar lowu ang unuk-unuk benyem. Olukakolourih ulun hototurus iou lombut nokuh Io tahkan umo-umoh ka'a.

Currently Selected:

MARKUS 1: OTD

Highlight

Copy