MATEUS 7

Tohou mosara ulun

(Luk. 6:37-38, 41-42)

1“A'ai mosara ulun bohkon, mangat ihkam bongom ka'a, ara tomosara bain Pohotala. 2#Mrk. 4:24 Kotului koloukuwoh ihkam mosara ulun bohkon, kodorih ka'a Pohotala ahkan mosara ihkam. Tutang tihpong ijo ihkam hapa bagi ulun bohkon, ahkan tonohapan ka'a bain Pohotala bagi ihkam. 3Ombai ihkam nohto poruhukkahju ang mahtan konduang'kam, hunanai tohtokkahju luwang mahtan'kam bongom, eam ihkam nohtoanioh? 4Koloukuwoh ihkam dahpot nuhtui umba konduang'kam, ‘'Kan'toi ahku polua poruhukkahju rih tahkan mahtan'mu,’ hunanai ang mahtan'kam bongom anai tohtokkahju? 5Oi ulun pura-pura! Dian houn tohtokkahju tahkan mahtan'kam bongon, punan ihko nohto honong botarang, tutang dahpot dian poruhukkahju tahkan mahtan konduang'kam.

6Ara nonga ramu ijo borasih ahkan asu, mangat asu rih ara ngulos turus nosahap ihkam. Tutang ara nonga hitan ahkan urak, mangat urak rih ngihcak-ngihik hitan orih.”

Nyawot, ngurah, tutang negah

(Luk. 11:9-13)

7“Nyawot, mahka ihkam ahkan norima. Ngurah, mahka ihkam ahkan nyombang. Negah bauntukang, mahka bauntukang konuap bagi ihkam. 8Tului ulun ijo nyawot ahkan norima; ulun ijo ngurah ahkan nyombang; tutang ulun ijo negah, ahkan konuap bauntukang. 9Ang louk ihkam, kuwoh anai amai ijo nonga bahtu ahkan anakoh amat io nyawot luhte? 10Ata'ai nonga lohi amat io nyawot ohcin? 11Oluka ihkam ja'at, ihkam tou ka'a nonga ijo hinut ahkan anak-anak'kam. Mahi hino Amai'kam ang soruga! Io molowi hino ahkan nonga ijo hinut ahkan ulun ijo nyawot umba Io.

12 # Luk. 6:31 Nguan ulun bohkon, kolou ihkam jolik tononguan bain iro. Orihrih usin hukum Museh tutang ajar nabi-nabi.”

Bauntukang ijo sihki

(Luk. 13:24)

13“Nyolong nguha bauntukang ijo sihki, tului bauntukang tutang jalan ijo nitu nokuh norahka hajo tutang lumbah, tutang aro ulun ijo nitoioh. 14Tahpi sihki tutang bohali bauntukang tutang jalan ijo ngomin ulun nitu pombolum. Tutang baya honjiot rih ulun ijo nyombang orih.”

Bahtang tutang buaoh

(Luk. 6:43-44)

15“Rondo-rondong toharep nabi-nabi polasu. Iro lombut nokuh ihkam hobukus bulu tobiri, tahpi iro kotu'ui kolou horomaung ijo bosiak. 16Ihkam ahkan ngosono iro tahkan bua gawinoh. Ruwut duhi eam ahkan polua bua anggur tutang bahtang duhi eam momua bua sikun. 17Tahkan bahtang ijo subur anaimua bua ijo pios, tutang tahkan bahtang ijo eam pios anaimua bua ijo ja'at. 18Bahtang ijo subur eam dahpot mua bua ijo maram, tutang bahtang ijo ja'at eam duon mua bua ijo pios. 19#Mat. 3:10; Luk. 3:9 Nyinong bahtang ijo eam mua bua ijo pios, tonowong tutang tonyaha. 20#Mat. 12:33 Kodorih hino umba nabi-nabi pobula. Ihkam ahkan ngosono iro tahkan bua gawiuoh.”

Bohkon Gawiu, bohkon pander

(Luk. 13:25-27)

21“Eam paring ulun ijo na'ah Ahku, ‘Tuhan, Tuhan’, ahkan nyolung anak uhkup Pohotala, tahpi baya ulun-ulun ijo numbun kohondak Amai-Ku ijo ang soruga. 22Ang Ondou Kiamat aro ulun ahkan nuhtui umba Ahku, ‘Tuhan, Tuhan, eam umba aran-Mu ihkai jari mborihta pohtoh Pohotala? Tutang eamrih umba aran Tuhan ka'a ihkai jari muhko roh-roh ja'at hawui nguan aro tandahelan?’ 23#Msm. 6:9 Tahpi Ahku ahkan muhtah, ‘Ahku eam pu'u ngosono ihkam! Hahtun tahkan ohtoi, ihkam ijo nguan koja'at!’ ”

Pomangun lohpou ijo pitar tutang pomangun lohpou ijo baleh

(Luk. 6:47-49)

24“Nah, ulun ijo ngonih auh-Ku tuh, tutang numbun orih, sama kolou ulun horati ijo nombok lohpouoh ang ngosan bahtu. 25Ang ohkot uhjan borohos, tutang danum suhu lombut, hawui bahiu karas nihtu lohpou rih, lohpou rih eam bolukang tului jari tonombok ang ngosan bahtu.

26Tutang ulun ijo ngonih auh-Ku tuh, tahpi eam numbunoh io sama kolou ulun baleh ijo nombok lohpouoh ang ngosan baras. 27Ang ohkot uhjan borohos tutang danum suhu lombut hawui bohiu hajo nihtu lohpou rih, lohpou rih bolukang. Tutang korusakoh karas samasino!”

Kowasan Yesus

28 # Mrk. 1:22; Luk. 4:32 Kolaiuoh Yesus tondo majar, tutang ulun-ulun ijo anai ang anan, helan samasino ngonih ajar-Oh. 29Tului Io majar umba pongaroh eam kolou guru-guru agama ain iro.

Currently Selected:

MATEUS 7: OTD

Highlight

Copy