MATEUS 16
16
Ulun-ulun Parisi nyawot Yesus nguan tandahelan
(Mrk. 8:11-13; Luk. 12:54-56)
1 #
Mat. 12:38; Luk. 11:16 Anai pira-pira ulun Parisi tutang ulun Saduki lombut nokuh Yesus kani nyokohtung Io. Iro nyawot Io nguan tandahelan ahkan ngorinah ijo Io lombut tahkan Pohotala. 2Yesus mutah, [“Amat mahtanondou uhun bolop, ihkam nuhtui, ‘Cuaca pios, tului langit bohandang.’ 3Tutang ang ngohkos ondou, ihkam nuhtui, ‘Ondou tuh kani uhjan, tului bohandang hawoi kundum.’ Nah, ihkam duon moramal cuaca, umba nohto koada'an langit, padahar tanda-tanda jaman, eam tou ihkam ramaloh!”] 4#Mat. 12:39; Luk. 11:29 “Eaminonrih koja'atoh tutang dorhakaoh ulun-ulun jaman tuh. Ihkam nyawot Ahku nguan tandahelan ka kocoali tandahelan Nabi Yona.”
Uli io nuhtui kodorih Yesus nohtah iro turus tulak.
Ragi ulun-ulun Parisi tutang Saduki
(Mrk. 8:14-21)
5Kotihka murid-murid Yesus johcok ang pohoi danou, punan kota'an bain iro, ijo iro tolingou ngomin luhte. 6#Luk. 12:1 Yesus nuhtui umba iro, “Bua-buah toharep ragin ulun-ulun Parisi tutang Saduki.”
7Ngonih auhtuhtui Yesus rih, murid-murid-Oh nopara hopander ihco sama ijobohkon, “Io nuhtui kodorih tului ihto eam ngomin luhte.”
8Yesus kota'an inon ijo iro manderoh. Jari, Io nuhtui, “Ombai ihkam hotokian tohou eam aro luhte? Ihkam kurang porocaya! 9#Mat. 14:17-21 Magun jaha solembang ihkam? Inon ihkam eam ingat limo luhte rih ijo Ahku molah-molahoh ahkan limo kuhjan behti? Pira tahkin kolowin luhte ijo ihkam nipuioh? 10#Mat. 15:34-38 Tutang koloukuwoh hino umba pihtu luhte ahkan ohpat kuhjan behti rih? Pira tahkinkolowin ukun, ijo ihkam nipui? 11Ombai nyiring ihkam eam solembang ijo Ahku eam nuhtui umba ihkam tohou luhte? Bua-buah toharep ragi ulun-ulun Parisi tutang Saduki!”
12Kojoriaioh murid-murid Yesus rih solembang ijo Yesus nyuhu iro bua-buah, eamoh toharep ragi ijo hapan ahkan napa luhte, tahpi toharep ajaran-ajaran ulun-ulun Parisi tutang Saduki.
Pongakuan Petrus tohou Yesus
(Mrk. 8:27-30; Luk. 9:18-21)
13Yesus tulak nokuh tanah doni lowu Kaisarea Pilipi. Ang anan Io ngisok murid-murid-Oh, “Numbun hion ulun, Anak Ulun orih iai?”
14 #
Mat. 14:1-2; Mrk. 6:14-15; Luk. 9:7-8 Murid-murid-Oh mutah, “Anai ijo nuhtui Yohanes Popondus. Anai ka'a ijo ngohawot Elia. Ijo bohkon ngohawot Yeremia, ata'ai anai ihcobehti nabi.”
15“Tahpi numbun ihkam bongom, Ahku tuh iai?” kisok Yesus umba iro.
16 #
Yoh. 6:68-69
Simon Petrus mutah, “Amai anai Lahca Ponyolamat, Anak Pohotala Ijo Bolum.”
17“Utung sino ihko, Simon anak Yona!” hion Yesus. “Tului eamoh kolunon ijo nyarihta hal rih ahkan'kam, molekan Amai-Ku ijo ang soruga. 18Tului orih kota'an'kam, ihko anai rih Petrus, bahtu ijo tehen. Tutang ang ngosan galang bahtu tuh, Ahku ahkan mangun Gereja-Ku, ijo eam dahpot tomokalah; olu bain popahtoi! 19#Mat. 18:18; Yoh. 20:23 Ahku ahkan nonga ahkan'mu kuhci tahkan Kolunon Bohua Ain Pohotala. Inon ijo ihkam baca ang ngosan tana, ka'a tonobaca ang soruga. Tutang inon ijo ihko ngomorong rih ang ngosan tana, ka'a ahkan tonomorong ang soruga.”
20Uliorih rih Yesus mopingat murid-murid-Oh, mangat iro eam nyiaroh ahkan iai ka ijo Iorih Lahca Ponyolamat.
Yesus ngesah tohou kokarot tutang popahtoi-Oh
(Mrk. 8:31–9:1; Luk. 9:22-27)
21Nopara tahkan ohkot orih, Yesus nuhtui turus tarang ahkan murid-murid-Oh, ijo Io harus tulak nokuh Yerusalem tutang nyuru aro ngarot tahkan okon-okon, imam-imam kopala, tutang guru-guru agama. Io ahkan buah punu, tahpi ang ondou kotolu Io ahkan bolum hoduli.
22Turus Petrus nguhut longon Yesus kosaro tutang ningak Io, hioi, “Mudah-mudahan Pohotala ngomahcu hal orih, Tuhan! Ara nyiring hal orih nyolung ang Tuhan!”
23Yesus ngulos turus nuhtui umba Petrus, “Hahtun tahkan ohtoi Ponihkos! Ihko mohala-halang Ahku. Tiruk'mu rih tiruk kolunon, bohkon tiruk Pohotala!”
24 #
Mat. 10:38; Luk. 14:27 Pongohuli Yesus nuhtui umba murid-murid-Oh, “Ulun ijo kani nutut Ahku, harus nolingou kogunan aropoh bongoi, ngohtun sopolahkioh, tutang turus nutut Ahku. 25#Mat. 10:39; Luk. 17:33; Yoh. 12:25 Tului ulun ijo kani nahan pombolumoh, io ahkan nihou pombolumoh. Tahpi ulun ijo nyorah pombolumoh ahkak-Ku, ahkan ngondahpotoh. 26Inon utungoh bagi ihcobehti, amat paring kolunon tuh monjadi aiuoh, tahpi io nihou pombolumoh? Duon pombolum orih tonokiri umba angihco?
27 #
Mat. 25:31; Msm. 62:13; Rum. 2:6 Eam tahi hino Anak Ulun ahkan homboh umba molehkat-molehkat-Oh, ahkan lombut hapan kowasan Amai-Oh. Ang ohkotrih Io ahkan malos nyino-nyinong ulun sorurui umba gawiuoh. 28Kota'anrih! Tahkan louk ihkam ang ohtoi anai ijo eam mahtoi, hounumba nohto Anak Ulun lombut kolou Lahca.”
Currently Selected:
MATEUS 16: OTD
Highlight
Share
Copy
Want to have your highlights saved across all your devices? Sign up or sign in
@ LAI 1997 Indonesian Bible Society (Lembaga Alkitab Indonesia)
