MATAYO 5

Likambo lia Yesu Khusikulu

1Yesu yalola emikanda ma naniina khusikulu. Ne olwa yali niyekhaye, abechi baabe beetsa khuye, 2ma nachiaka okhwibaala naboola:

Tsikhabi

(Lk. 6:20-23)

3“Bali neikhabi abehulilanga nabatakha khubindu biomwoyo

sichila Obwami bwomwikulu nobwabwe.

4“Bali neikhabi yabo abali musibeela

Nyasaye yakhabahotselesie.#Isaya 61:2

5“Bali neikhabi yabo abali abahoma

Nyasaye yakhabalaamile esibala.#Etsisa. 37:11

6“Bali neikhabi yabo abali neinzala nobuluho khulwobulunji

Nyasaye alibekusia.#Isaya 55:1-2

7“Bali neikhabi yabo ababeelanga abasiabwe tsimbabasi,

Nyasaye yakhababeele tsimbabasi.

8“Bali neikhabi yabo abali abasiiyikhu mumioyo

balilola Nyasaye#Etsisa. 24:3-4

9“Bali neikhabi abakholanga akomulembe

Nyasaye yakhabalange abaana baabe.

10“Bali neikhabi abakhupibwangwa esibi khulwobulunji

Obwami bwomwikulu nobwabwe.#1 Pet. 3:14

11“Muli neikhabi inywe nyinga abandu bamukondekhela nibamukhupia esibi nibamuchiikha amang'ana amabi kosi sichila muli abalondi banje.#1 Pet. 4:14 12Musangale nimulema emioyo muno sichila amatani kenywe namenji mwikulu. Nimbwo abaroobi abaliho imbeli wenywe bakhupibwa esibi.#2 Aketsi. 36:16; Ebikh. 7:52

Abalondi ba Yesu bali singa omunyu nende obulafu

(Mk. 9:50; Lk. 14:34-35)

13“Inywe mufwana omunyu khubandu bosi. Nebutswa omunyu nikuba nikubulamwo esinosi kwakhatola mbwena esinosi siakwo khandi? Kubula obukhonyi khubandu, kho kulafubwa esioba abandu nibakusena nende ebilenje biabwe.#Mk. 9:50; Lk. 14:34-35

14“Inywe mufwana obulafu bwesibala siosi. Litaala eliombokhwa khusikulu silinyala okhubiswa tawe.#Yoh. 8:12; 9:5 15Omundu wosi sahambianga etaya ma achifunikhila musipaala tawe habula achiretsanga khusihani siayo nebakhochisia bosi abali munyumba.#Mk. 4:21; Lk. 8:16; 11:33 16Lekhe obulafu bwenywe bulabinjie mbwo imbeli wabandu mbu balole emilimo chienywe emilahi ma bafumie Papa wenywe oli mwikulu.#1 Pet. 2:12

Okhwibaala Amalako ka Musa

17“Murakanakana mbu ndetsa okhwononia amalako ka Musa nohomba okhwibaala khwabaroobi tawe. Sindaitsa okhwononia tawe nebutswa okhuralisia obwibaali bwabwe. 18Okhuba mubool'langa siahene, likulu nende esibala nibisili okhubira, inyukuta ndala kata akharonyelesi khalala sikhalirula khwo khumalako tawe okhwola kosi kalekhole.#Lk. 16:17 19Khulwako omundu wosi oba niyononiakhwo lilako elala elili litututu muno khumatu yaka niyebaal'la abandi okhukhola mbwo, yakhabe omutututu mu Bwami bwo Mwikulu. Nebutswa omundu oba nahesia amalako niyebaal'la abandi okhukahesia niye oliba omukhongo mu Bwami bwo Mwikulu. 20Kho mubool'langa mbu munyala butswa okhwinjila mu Bwami bwomwikulu nikakhaba obusubilwa bwenywe buyomba obusubilwa bwa Bafarisayi nende obwa Bebaali ba Malako.

Obwibaali bwa Yesu khukelirima

(Lk. 12:57-59)

21“Mwahulila obwabandu bakhale babool'lwa, ‘Oreera tawe; omundu wosi naba niyeera akwan'ne okhukhalachilwa esiina.’#Okhur. 20:13; Okhuka. 5:17 22Nebutswa ise mubool'langa, siomundu wosi oba nabihil'lwa#5:22 nabihil'lwa Amahandiko kandi kaboolanga omundu wosi naba nabihil'lwa omwana wabwe sila esikha. omwana wabwe akwan'ne okhukhalachilwa esiina: ne omundu oba nanyeka omwana wabwe akwan'ne okhulerwa imbeli wesiina siabakhulundu, ne omundu oba nalanga omwana wabwe esihingwa, alaba mubutinyu bwokhutsia m'mul'lo kwe Kehena. 23Khulwe yako, noba nohananga esihanwa sisio khu Nyasaye khusitsu siemisango, niwitsul'la mbu owasio ali nesikha n'nawe, 24lekha esihanwa sisio yaho imbeli wesitsu otsie olombe obulamu no mwana wenywe mbelio, kho okalukhe ohaane esihanwa sisio khu Nyasaye.

25“Omundu naba nakhwinjil'la hango ma nakhuhila musiina, huchilisania n'naye olwobweyangu busiliho muroola musiina. Olwa muba nimwol'le musiina omusukuwo alakhuhana khumukhalachi, naye omukhalachi alakhuhana mumakhono komusikari nawe olafubwa mububohe. 26Olamenyamwo okhwola olwoliba norunjile lisendi liokhumal'likha.

Obwibaali bwa Yesu khukobuheyi

27“Mwahulila mbu kaboolwa, ‘Oraheya tawe.’#Okhur. 20:14; Okhuka. 5:18 28Nase mubool'langa mbu, omundu wosi ohenganga omukhasi namwekomba umal'le okhuheya n'naye mumwoyokwe. 29Kho imoni yiyo yomukhono musaatsa neba nekhwemel'la okhukhola tsimbi ochitsomole ma ochifuube ehale. Nobulahi okhusila ibe okhukosia khwo esitonye siomubili kukwo okhuyomba omubili kukwo kwosi okhufubwa mu Kehena.#Mat. 18:9; Mk. 9:47 30Ne omukhono kukwo omusaatsa nikuba nikukhwemel'la okhukhola tsimbi okuremache ma okufuube ehale. Nobulahi okhusila okhukosia esitonye sisio silala, okhuyomba omubili kukwo kwosi kufubwe mu Kehena.#Mat. 18:8; Mk. 9:43

Aka Yesu yebaala khukomusaatsa nomukhasi okhulekhana

(Mat. 19:9; Mk. 10:11-12; Lk. 16:18)

31“Khandi kaboolwa, ‘Omundu oba nakhunga omukhasi uwe, amuhe ebarwa yokhwabukhana.’#Okhuka. 24:1-4; Mat. 19:7; Mk. 10:4 32Nebutswa nase mubool'langa: omundu naba nakhunga omukhasiwe khusifune esirali esiobuheyi ali nesikha siokhumukhola omuheyi naba naleerwa nomusaatsa undi; ne omundu oba namuleera aheyanga n'naye.#Mat. 19:9; Mk. 10:11-12; Lk. 16:18; 1 Kor. 7:10-11

Aka Yesu yebaala khukesiesuho

33“Khandi mwahulila abandu bakhale babool'lwa, ‘Orabula okhuhesia akokhwesuhakhwo tawe, nebutswa ohesie akawesuha khu Mwami okhukakhola.’#Abal. 19:12; Obub. 30:2; Okhuka. 23:21 34Nase mubool'langa, Muresuha kata na hati, kata khwikulu, sichila nilio oluruba lwa Nyasaye;#Yako. 5:12; Isaya 66:1; Mat. 23:22 35nohomba khusibala, sichila nisio indebe eyalambisianga khwo ebilenje bibie, kata oresuha khu Yerusalemu sichila nelitookho lio Mwami omukhongo.#Isaya 66:1; Etsisa. 48:2 36Kata oresuha khumurwekwo, sichila sionyala okhukalukhania liswi lilio kata elala okhulikhola lilafu nohomba limwamu tawe. 37Nebutswa amang'ana kenywe kabetsenje, ‘Yee, Yee!’ ‘Tawe, tawe;’ sichila akandi kosi akayomba yaka karulanga khumubi.

Aka Yesu yebaala khukesisialia

(Lk. 6:29-30)

38“Mwahulila mbu kaboolwa, ‘Imoni khumoni, ne elino khulino.’#Okhur. 21:24; Abal. 24:20; Okhuka. 19:21 39Nebutswa nase mubool'langa; orarunga es'sialia khumundu okhukholeye obubi tawe. Omundu naba nakhwala oluhi khuluseya lwomukhono musaatsa omusukhanichisie oluseya olwelubeka lundi. 40Ne omundu nakhuhila mukhuyalwa niyenyanga abukule lisati lilio, mulekhele abukule kata ne likoti. 41Ne omundu okhuhachia omuchinjile ebisiro bibie okhuhila ekilomita ndala, muhil'le etsikilomita tsibili. 42Omundu naba nakhusaba esindu muhelesie; ne omundu oba niyenya okhuhamba esibere, muhambie.

Yesu yebaala akokhuyanza abasuku

(Lk. 6:27-28,32-36)

43“Mwahulila mbu kaboolwa, ‘Oyanze omulinawo ne osule omusukuwo.’#Abal. 19:18 44Nebutswa ise mubool'langa: Muyanze abasuku benywe mubasaayile abamukhupianga esibi, 45Khe mube abaana ba Papa wenywe oli mwikulu. Okhuba yakhianga eliuba lilie khubandu ababi nende abalahi, khandi akwisianga ifula khubalunji nende abasiamu. 46Nisina esiakhachila Nyasaye wamuha amatani nikakhaba muyanzanga butswa yabo abamuyanzanga bonyene? Kata abasololi bobusuru bakholanga mbwo. 47Ne nimuba nimusiesia abaana benywe bonyene, mukholanga sina esia mubayombeye? Kata abetsimbia bakholanga mbwo. 48Kho mube abalunji singa Papa wenywe oli mwikulu ali omulunji.#Abal. 19:2; Okhuka. 18:13

Currently Selected:

MATAYO 5: EBAIBO

Highlight

Copy