MATAYO 3

Obukambi bwa Yohana Omubaputisi

(Mk. 1:1-8; Lk. 3:1-18; Yoh. 1:19-28)

1Mumatukhu yako Yohana Omubaputisi yetsa nakambanga musitsiimi sie Buyahudi, naboola: 2“Murule mutsimbi tsienywe okhuba Obwami bwo Mwikulu buli ahembi!”#Mat. 4:17; Mk. 1:15 3Yohana niye owomuroobi Isaya yal'lomakhwo olwa yaboola,

“Omundu nalebe olanjisianga musitsiimi,

‘Mulombele OMWAMI injila yiye

mulunjisie emihanda chichie.’ ”#Isaya 40:3

4Tsingubo tsia Yohana tsana tsialiombwa khubwoya bweingamia, niyebohele olukhoba lweliseelo mus'sienje sisie, ne esiokhulia sisie siali tsisiche nende obukhi bwomusitsiimi.#2 Abar. 1:8 5Abandu betsa khuye okhurula Yerusalemu nende Ebuyahudi yosi, nende mutsimbeka tsindi etsilondokhana nende omuchela kwa Yorodani tsiosi. 6Beyama tsimbi tsiabwe, naye nababaputisa mumuchela kwa Yorodani.

7Olwa Yohana yalola Abafarisayi abenji nende Abasadukayi nibetsanga okhubaputiswa, yababool'la, “Inywe abali singa tsinzokha! Niwina owamubool'la mbu munyala okhwilukha esinyasio sia Nyasaye ali ahembi okhuruma?#Mat. 12:34; 23:33 8Mukhole ebindu ebiakhamanyia mbu murul'le mutsimbi tsienywe. 9Ne murakanakana mbu munyala okhwilukha esinyasio sia Nyasaye mukhuboola mbu, ‘Aburahamu ni kuka wefwe.’ Mubool'langa mbu Nyasaye anyala okhubukula amachina yaka ma alombelemwo Aburahamu ebisoni.#Yoh. 8:33 10Imbatso yerechekhele okhurema ebisina biemisaala; siomusaala okuraama ebiamo ebilahi tawe, kularemakwa nikufubwa mumul'lo.#Mat. 7:19 11Ise mubaputisanga mumatsi okhumanyia mbu murul'le mutsimbi tsienywe, nebutswa uyo owitsanga inyuma wanje nowobunyali okhuyomba ise, ne singwan'ne okhuchinga ebilaro bibie tawe. Yakhamubaputise inywe mu Mwoyo Omutsienukhu nende mumul'lo. 12Ali nende olutelu lulwe mumukhono, alelula obuswache bwosi pe. Alabunjelesia ingano ye naara musiachi sisie, nebutswa alasamba omukhuutsi nende omul'lo okurasimanga tawe.”

Okhubaputiswa khwa Yesu

(Mk. 1:9-11; Lk. 3:21-22)

13Inyinga yene yiyo Yesu yarula Galilaya niyetsa Yorodani aha Yohana yali nali mbu Yohana amubaputise. 14Nebutswa Yohana yatema okhumukaya naboola, “Kahel'le ise mbaputiswe nende ibe nawe witsile khwise?”

15Nebutswa Yesu yamukalusia naboola, “Umbuchil'le luno; sichila nimbwo kahel'le okhuhesia obulunji bwosi.” Kho Yohana yamuhuchil'la.

16Ne olwa Yesu yali nabaputisilwe, yatikulukha okhurula mumatsi. Yaho likulu ndikukha naye nalola Omwoyo wa Nyasaye niyekhanga hasi singa likhulwi, nayela khuye. 17Ma Omwoyo okhurula mwikulu, nikuboola, “Uyu niye Omwana wanje owandayanza, owasangal'langa okhusila.”#Okhuch. 22:2; Etsisa. 2:7; Isaya 42:1; Mat. 12:18; 17:5; Mk. 1:11; Lk. 9:35

Currently Selected:

MATAYO 3: EBAIBO

Highlight

Copy