MATAYO 13

Olukano lwomumitsi

(Mk. 4:1-9; Lk. 8:4-8)

1Mwitukhu liene yilio Yesu yarula munyumba, natsia niyekhala khuluchinga lweinyanza nachiaka okhwibaala. 2Omukanda okwebunjikha khuye kwali omukhongo okhusila. Kho yamala naniina muliaro niyekhalamwo olwa omukanda kwosi kwasinjila khuluchinga lweinyanza.#Lk. 5:1-3 3Yabebaal'la ebindu ebinji mutsingano.

“Omumitsi yatsia okhumitsa imwo. 4Olwa yali namitsanga imwo mumukunda, ndala yakwa khunjila, ne amanyonyi niketsa nikachibootsa. 5Eyindi yakwa khulwanda, ha maloba karali amenji. Imwo tsana nemela bwangu sichila liloba silialiho elinji tawe. 6Nebutswa olwom'basu kwabala, neniala, ne sichila yabula aheyila emisi, yamala niyoma. 7Imwo yindi yakwa mubitsakha biamahwa; ne amahwa nikakhula nikachimiina. 8Nebutswa eyindi yakwa mumaloba amalahi, niyaama ebiamo; ndala emia, eyindi amakhumi kasasaba, ne eyindi amakhumi kataru.” 9Ma nababool'la “Oli namarwi akokhuhulila ahulile.”

Lichoomo lietsingano

(Mk. 4:10-12; Lk. 8:9-10)

10Abechi baabe betsa, nibamureeba, “Busina oboolanga mutsingano nabandu?” 11Nabakalusia nababool'la, “Inywe mwahebwa okhumanya amabiso kobwami bwomwikulu, nebutswa bo sibahebwa tawe. 12Okhuba omundu oli nesindu alahebwa, kho mbu alasilaana n'nabio; nebutswa orali nesindu alahiinibwa khwo kata esiali n'nasio.#Mat. 25:29; Mk. 4:25; Lk. 8:18; 19:26 13Esichilanga nirumikhila tsingano okhul'loma khubo sili mbu: bahenganga, ne sibalolanga tawe, bahuyianga ne sibahulilanga kata okhumanyilisia tawe. 14Kho kekhole obwa Isaya yarooba naboola: mbu

‘Siahene mulahenga, ne simulalola;

siahene mulahulila, ne simulamanyilisia.#Isaya 6:9-10

15Sichila amakani kabandu yaba kasitoha,

ne basiba amarwi kabwe

nibamwasia tsimoni tsiabwe.

Khase bakhalola netsimoni tsiabwe,

nibahulila namarwi kabwe,

nibamanyilisia namakani kabwe,

ma nibarula mutsimbi, mbu mbahonie.’

16“Nenywe, mako obwa muli abanakhabi, sichila tsimoni tsienywe tsilolanga; ne amarwi kenywe kahulilanga.#Lk. 10:23-24 17Siahene mubool'langa, abaroobi abenji nende abalunji abenji, bali okhwekomba balole akamulolanga ne sibalola tawe; nokhuhulila akamuhul'langa, ne sibakahulila tawe.

Yesu yenoosia olukano lwomumitsi

(Mk. 4:13-20; Lk. 8:11-15)

18“Kho hulile olukano lwomumitsi ma mumanyilisie akaluboolanga. 19Yabo abahulilanga amang'ana kobwami, nibarakamanyilisia tawe, bali singa imwo eyakwa khunjila. Omwibi yetsa nabukula ling'ana elimiitsilwe mumioyo chiabwe. 20Imwo eyakwa khulwanda, ni yabo abahulilanga amang'ana kobwami, nibakahuchil'la nobusangali bwangu. 21Nebutswa sibeyinikhile muko tawe; ne sibatsilil'la muko oluhono tawe; ne olwa om'booko nohomba okhukhupibwa esibi khubuukhanga khulwe ling'ana, ne bwangu nibalekha obusubili bwabwe. 22Ne nayo eyakwa mumahwa ni yabo abahulilanga amang'ana; ne okhuhendela khwobulamu bwesibala, nokhuyanza obuhinda bwesibala, biminanga ling'ana, ma sibaama ebiamo tawe. 23Imwo eyakwa mumaloba amalahi ni yabo abahulilanga ling'ana nibamanyilisia, baamanga ebiamo, abalala emia ne abandi amakhumi kasasaba ne abandi amakhumi kataru.”

Olukano lwe libanze hakari mubule

24Yesu yabakhupila olukano lundi: mbu, “Obwami bwomwikulu bufwanana nende omundu owamiitsa imwo indahi mumukunda kukwe. 25Ne nyinga abandu bosi bali nibakonanga omusuku uwe yetsa namiitsa libanze mubule ma natsia ouwe. 26Nebutswa nyinga yamela omuboka niyaama ebiamo, nilwo olwelibanze lialolekha. 27Ne abarumikhili bomundu tsana, betsa nibamubool'la, ‘Omwami, siwali okhumiitsa imwo indahi mumukunda kukwo? Kho libanze lino liarula hena?’ 28Naye nababool'la, ‘Omundu omusuku niye owakhola yaka.’ Ne nabo nibamureeba, ‘Wenya khutsie okhuliha?’ 29Naye nakaya ‘Tawe, khase olwa muba nimwihanga libanze mwakheha obule halala n'nalio. 30Lekhe bikhule biosi halala okhwola mwichesa. Ne munyinga yokhuchesa ndibool'la abokhuchesa, range okhubunjelesia libanze mbelio, mulibohe tsikhanya tsisambwe, ma murele obule musiachi sianje.’ ”

Olukano lwolukutsa lwelisatsi

(Mk. 4:30-32; Lk. 13:18-19)

31Yesu nabakhupila olukano lundi, naboola, “Obwami bwomwikulu bufwanana nolukutsa lwelisatsi olwomundu yabukula, naraaka mumukunda kukwe. 32Nalwo nolutititi okhuyomba tsimbila tsindi tsiosi etsiobukutsa, nebutswa nyinga lubetsanga nilukhul'le, nolukali okhuyomba emimela chiosi, kukwitsanga omusaala, kata amanyonyi kokhwikulu ketsa mutsisaka tsiakwo nikalombamwo ebitsu biako.”

Olukano lwamamela

(Lk. 13:20-21)

33Yesu yabakhupila olukano lundi, “Obwami bwomwikulu bufwanana namamela akomukhasi yabukula, nakatsokania mubusie obuhela etsiliita amakhumi kane, bwosi mbuluha mbusuchila amamela.”

Singa obwa Yesu yekhonyela tsingano

(Mk. 4:33-34)

34Yesu yarumikhila tsingano okhubool'la emikanda amang'ana yaka kosi. Siyababool'la ling'ana liosi nararumikhiye olukano tawe. 35Yakhola yaka mbu akomuroobi yaboola kahesikhe:

“Ndakharumikhile tsingano olwa ndil'loma khubo

Ndiribula akebisa okhurula olwesibala

sialiombwa.”#Etsisa. 78:2

Yesu yenoosia olukano lwelibanze mubule

36Olwa Yesu yali niyabukhan'ne nemikanda, ma niyenjiye munyumba, abechi baabe betsa khuye, nibaboola, “Khubool'le esifune siolukano lwelibanze liomumukunda.” 37Naye nabakalusia nababool'la, “Omiitsanga imwo no Mwana wo Mundu. 38Omukunda nesibala; ne imwo indahi nabaana bobwami, ne libanze nabaana bomubi; 39ne omusuku owaraaka libanze ni Setani. Lichesa nesihesi siesibala; ne yabo abokhuchesa nabamalaika. 40Kho singa obwelibanze libunjelesibwanga nilisambwa mumulilo, nimbwo kakhabe musihesi siesibala. 41Omwana wo Mundu yakharume abamalaika baabe okhubunjelesia nokhuhinia mu Bwami bubwe biosi ebichilanga abandu nibakhola tsimbi nende bosi abakholanga obubi, 42ne bakhafubwe mubuhi bwomulilo; aha bakhalakaye nibakhwayula ameno. 43Nilwo olwa abalunji bakhaakhe singa eliuba mu Bwami bwa Papa wabwe. Nimuba nimuli namarwi kho muhulile yaka!

Olukano lwelibiikhilo eliabiswa

44“Obwami bwomwikulu bufwanana nelibere eliomundu yanyoola niliabiswa mumukunda. Ma nalifunikhila; Mukhusangala khukhwe yatsia nahoonia ebia yali n'nabio, ma nakula omukunda tsana.

Olukano lweinyuma yobukusi obwinji

45“Khandi Obwami bwomwikulu bufwanana nende omundu omukholi wobukhala orunanga tsinyuma tsindahi; 46ne nyinga anyoola ndala eyobukusi obutinyu, ne natsia nahoonia ebia yali n'nabio biosi, nachikula.

Olukano lwelikoko

47“Khandi Obwami bwomwikulu bufwanana nende likoko, eliabalubi bafuuba munyanza, ndibunjelesia tsimbila tsiosi tsietsisutse. 48Olwe likoko lietsula, bali okhulikhwesa okhulilera khuluchinga; nibekhala nibabunjelesia tsindahi mubimwelo biabwe, nebutswa tsimbi nibafuuba. 49Nimbwo kakhabe musihesi siesibala: abamalaika bakhetse, bakhaule abandu ababi okhurula mubalunji, 50balibafuuba mubuhi bwomulilo; aha bakhalakaye nibakhwayula ameno.

Amabiikhilo kebindu ebiyia nebikhulu

51“Mumanyilisisie amang'ana yaka kosi?” Yesu yabareba. Nabo nibamukalusia nibaboola “Yee.” 52Kho naye nakalusia, “Yaka niko akachila siomwibaali wa Malako owechesibwa amang'ana ko Bwami bwomwikulu, afwanana nende omwenenyumba ohinianga mumabiikhilo kaake ebindu ebiyia nende ebikhulu.”

Yesu yasulwa Nasareti

(Mk. 6:1-6; Lk. 4:16-30)

53Olwa Yesu yali namal'le tsingano yitsi, yarula habwene yaho, 54nakalukha musibala siabwe. Yebaala musinakoki yabwe, ne yabo abamuhulila bachenya. Ma nibaboola, “Uyu yanyoola hena amachesi kano, nende akamangalimwa yaka? 55Uyu siali omwana womubaatsi? Nyinamwana sialangwanga Mariamu? Abasiani babwe sibalangwanga Yakobo, Yosefu, Simoni, nende Yuda? 56Ne ababotsonyene sibali halala n'nefwe bosi? Kho yatola hena yaka kosi?” 57Nibesiraala khuye. Yesu nababool'la, “Omuroobi siabulanga oluyali tawe, habula musibala siabwe siene, nende munyumba yiye yene.”#Yoh. 4:44 58Ne siyakhola emilimo chiobunyali eminji habwene yaho tawe sichila bali okhubula obusubili.

Currently Selected:

MATAYO 13: EBAIBO

Highlight

Copy