MATAYO 12
12
Lireebo khukelitukhu lie Sabato
(Mk. 2:23-28; Lk. 6:1-5)
1Olweinyumakhwo Yesu yali nabiranga mumikunda chiobule mwitukhu lie Sabato. Abechi baabe bali neinzala, kho bachiaka okhunoka ebiangala biobule nibalia.#Okhuka. 23:25 2Olwa Bafarisayi balola yaka, baboola, “Lola, nakomusilo khubechi baabo okhukhola yaka mwitukhu lie Sabato!”
3Yesu nabakalusia “Musili okhusomakhwo aka Daudi yakhola, olwa yali neinzala, omwene halala nende abandu baabe?#1 Sam. 21:1-6 4Yenjila munyumba ya Nyasaye, ye halala nabandube nibaliakhwo emikati echiahaanwa khu Nyasaye, echiali omusilo khubo okhuliakhwo, nibarali abesaalisi bonyene.#Abal. 24:9 5Ne khandi simwasomakhwo mumalako ka Musa mbu mwitukhu lie Sabato abesaalisi bafunaka amalako ke Sabato mu Hekalu, ne nibarabba nesikha tawe?#Obub. 28:9-10 6Nase mubool'langa, khuli ho nomukhongo oyombele Hekalu. 7Amahandiko kaboolanga, ‘Nyenyanga tsimbabasi, tawe emisango chietsinyama.’ Mulaba nimumanyile esifune sie yaka, khane simwakhabakhalachila esiina abandu abarali nesikha tawe;#Mat. 9:13; Hosea 6:6 8okhuba Omwana wo Mundu niye Omwami we Sabato.”
Yesu yahonia Omundu owomukhono kwanyela
(Mk. 3:1-6; Lk. 6:6-11)
9Yesu yarula mumbeka yimwo natsia niyenjila musinakoki yabwe. 10Ne lola, yaliho omundu womukhono kukwe kwosi kwali nikwanyela. Abandu bandi nibamureeba mbu: “Nomusilo okhuhonia mwitukhu lie Sabato noho?” Benyanga okhunyoola injila yokhumwinjil'la. 11Yesu nabareeba, “Ali hena omundu khwinywe owakhaba nelikondi elala, ma nilikwa mubuko khwitukhu lie Sabato wabula okhulihinia?#Lk. 14:5 12Omundu ali nobukhala okhuyomba likondi! Kho niko akachila nobulahi okhukhol'la omundu obulahi khwitukhu lie Sabato.” 13Kho yamala abool'le omundu uyo, “Nyiila omukhono kukwo.” Ma nanyiila, nikuhona ma nikuba omuchima singa okundi. 14Nebutswa Abafarisayi barula, nibalomba omuse obwa nabere Yesu.
Omurumikhili wa Nyasaye Owelwa
15Olwa Yesu yakamanya yarulayo; ne abandu abenji bamulonda. Yahonia bosi abali abatekhele. 16Nabakaya mbu baramuribula khubandu bandi tawe. 17Yakhola mbwo kho aka Nyasaye yali niyaboola okhubir'ra mu Isaya omuroobi kahesibwe:
18“Uno niye omurumikhili wanje owandeela;
owandayanza, owasangal'langa muno.
Ndabiikha khuye Omwoyo wanje,
Naye alalandia khubetsimbia akobukhalachi bwanje obwe esiina.#Isaya 42:1-4
19Salihingana, nohomba salikhupa liyoka;
khandi omundu salihulila omwoyo kukwe mumihanda tawe.
20Yakhabe omuhoma khu yabo abarali abetsingufu,
khandi yakhabe netsimbabasi khu yabo abarali nobuhuluukhi.
Yakhahambachil'le okhwola olwa alileera obwatooto khukhuleka.
21Khuliira lilie Abetsimbia balasubilakhwo.”
Yesu nende Belisebuli
(Mk. 3:20-30; Lk. 11:14-23)
22Nilwo olwa abandu bandi baleera khu Yesu omundu omubofu ma owakwa limuma; sichila yali nes'sieno. Yesu yamuhonia, kho omundu tsana nachiaka okhul'loma, nokhuhenga. 23Abandu bosi bachenya khuka Yesu yali nakhol'le ma nibaboola, “Uyu akhali niye Omwana wa Daudi noho?”
24Olwa Abafarisayi bahulilakhwo, mbaboola: “Omundu uyu ahinianga ebisieno butswa khulwo bunyali bwa Belisebuli omukhongo webisieno.”#Mat. 9:34; 10:25
25Yesu yamanya aka bali nibapalanga, kho yababool'la, “Siobwami obwabukhana mumikanda nibulwanana obwene khubwene sibwakhatsitsachil'la tawe. Ne sielitaala nohomba sieinyumba eyabukhananga khubwayo siyakhanyala okhusinjila tawe. 26Setani naba nahinianga Setani wayabukhana khububwe; kho obwami bubwe bwakhasinjila mbwena? 27Nimba nimbininjia ebisieno khulwo bunyali bwa Belisebuli, kho abaana benywe babihinianga khulwo bunyali bwa wina? Khulwe yako yabo nibo abakhamukhalachile inywe esiina. 28Ise mbinianga ebisieno khulwa Omwoyo wa Nyasaye akamanyinjia mbu Obwami bwa Nyasaye bwitsile khwinywe.
29“Omundu sianyala okhwinjil'la inyumba yomundu omukufu wayaaka emiandu chichie, nararangile okhuboha omukufu uyo kho wanyala okhuyaaka inyumba yiye tawe.
30“Omundu orali n'nase halala yafukulanga; ne omundu orabunjelesianga n'nase, asalanianga.#Mk. 9:40 31Ne mubool'langa mbu, abandu banyala okhulekhelwa tsimbi tsiosi nende amanyeko kosi akabakhaboole khu Nyasaye; nebutswa omundu wosi naba nanyeka Omwoyo Omutsienukhu sialilekhelwa tawe. 32Ne omundu awakhanyeka Omwana wo Mundu yakhalekhelwe; nebutswa uyo onyekanga Omwoyo Omutsienukhu siyakhalekhelwe luno kata inziayo tawe.#Lk. 12:10
Omusaala nende ebiamo biakwo
(Lk. 6:43-45)
33“Okhuba nebiamo ebilahi, okhwola mube nomusaala omulahi; nimuba nomusaala omubi nimunyoola ebiamo ebibi. Omusaala kumanyikhanga khubiamo biakwo.#Mat. 7:20; Lk. 6:44 34Inywe abali singa tsinzokha, mwakhanyala mbwena okhul'loma akali amalahi olwa muli ababi? Okhuba omunwa kuboolanga akomwoyo kwetsula n'nako.#Mat. 3:7; 23:33; 15:18; Lk. 3:7; 6:45 35Omundu omulahi mwibiikhilo lilie lilahi ahiniangamwo ebindu ebilahi, ne omundu omubi mwibiikhilo lilie libi ahiniangamwo ebindu ebibi. 36Mubool'langa siahene, Mwitukhu liokhukhalachilwa esiina siomundu yakhakhalachilwe khulwe ling'ana liosi eliabutswa eliaboolanga. 37Amang'ana kako kakharumikhilwe okhukhalachilwa okhuba omulunji, nohomba okhuba nesikha.”
Abakhongo ba Bayahudi benya esilolelo
(Mk. 8:11-12; Lk. 11:29-32)
38Kho abandi khubebaali ba Malako nende Abafarisayi bakalusia nibamubool'la, “Omwibaali, khwenya khulole nokholanga akamangalimwa!”#Mat. 16:1; Mk. 8:11; Lk. 11:16 39Naye nabakalusia nababool'la, “Lisuba libi elirasubilanga Nyasaye! Mwenyanga ebilolelo? Ebilolelo ebia mulahebwa nakomuroobi Yona konyene.#Mat. 16:4; Mk. 8:12 40Singa obwa Yona yamenya munda mweisutse ingali amatukhu kataru, nende obutukhu butaru; nimbwo Omwana wo Mundu alaba mulutungu lweliloba amatukhu kataru nobutukhu butaru.#Yona 1:17 41Mwitukhu liesiina, abandu ba Nineve bakhakhalachile abandu belisuba yili; sichila bali okhurula mutsimbi tsiabwe olwa Yona yabakambila; ne lola, omukhongo oyombele Yona ali hano!#Yona 3:5 42Omuruchi omukhasi owelubeka lwenandete yakhasinjile musiina halala nende abelisuba yili ne yakhabaleche nesiina; sichila yarula khundulo wesibala niyetsa okhuhul'la obwibaali bwobuchesi bwa Solomoni. Ne mubool'langa omukhongo oyombele Solomoni ali hano.#1 Abar. 10:1-10; 2 Aketsi. 9:1-12
Okhukalukha khwomwoyo kwesifwabwi
(Lk. 11:24-26)
43“Olwo Omwoyo kwesifwabwi kurulanga mumundu, kubotokhananga khusibala esiomu, nikuruna ha kuhulukhila. Nikubula okhunyoola habundu, 44ne kuboola ‘Ndakalukha munyumba yanje eyandarulamwo.’ Olwa kukalukhanga ne kunyoola inyumba neli butswa, yeyelwe, ma ikasiibwe bulahi. 45Ma kutsia okhulanga emioyo chindi chine nachitaru echili emibi okhukuyomba ma chiosi nichinjila mumundu uyo njimenya muye. Kho liiba liomundu uyo libetsanga libi okhuyomba olwokhuranga. Yaka niko akaliekhola khwisuba libi yili.”
Nyina Yesu nende abaana babwe
(Mk. 3:31-35; Lk. 8:19-21)
46Yesu yali nasil'loma khubandu, olwa nyinawe nende abaana babwe boola. Basinjila esioba, nibenya okhul'loma n'naye. 47Omundu mulala namubool'la, “Mama uwo nende abaana benywe basinjiye esioba, benyanga bal'lome n'nawe.#12:47 Amahandiko kandi sikali nende esiasia sia 47 tawe.” 48Yesu namukalusia, “Mama wanje niwina? Ne abaana befwe, nibena?” 49Ma khe nasonia omukhono kukwe khubechi baabe naboola, “Yaba nibo mama wanje nende abaana befwe! 50Omundu oba nakholanga obulalilo bwa Papa wanje oli mwikulu, uyo niye omwana wefwe, nende mbotswa nende mama wanje.”
Currently Selected:
MATAYO 12: EBAIBO
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
