MATAYO 11
11
Abarumwa okhurula khu Yohana Omubaputisi
(Lk. 7:18-35)
1Olwa Yesu yali namal'le okhwibaal'la abechibe likhumi nababili, yarulaho natsia okhwibaala nokhukamba mumataala kabwe.
2Olwa Yohana Omubaputisi yahulila nali mubuhambe akemilimo chia Kristo, yaruma abechi baabe khuye. 3Nibamureeba, “Niwe owitsanga nohomba khulindil'le oundi?” 4Yesu nabakalusia nababoolela, “Tsie mubool'le Yohana akamuhulilanga nende kamulolanga, 5mbu ababofu balolanga, abalema bachendanga, abachele basiiywanga, abekala amarwi bahulilanga, abafu basimukusibwanga ne ababisandu bakambilwanga Amang'ana Amalahi.#Isaya 35:5-6; 61:1 6Nabeikhabi yabo abarali nende honzoni.”
7Olwa abechi ba Yohana yabo bali mbatsitsanga, Yesu yachiaka okhureba emikanda amang'ana ka Yohana, “Olwa mwatsia khu Yohana musitsiimi mwenyanga okhulola sina? Litundu eliomuyeka kunuyanga? 8Ne mwatsia okhulola sina? Omundu owebiikhile tsingubo tsindorotoro? Abandu abebiikhanga tsingubo tsindorotoro babetsanga mutsinyumba tsiabaruchi! 9Nebutswa mwatsia okhulola sina? Okhulola omuroobi? Yako kali habwene, nebutswa mwalola omundu oyombele omuroobi. 10Okhuba Yohana niye owa Amahandiko kal'lomangakhwo, nikaboola mbu:
‘Lola, rumanga omurumwa wanje okhuuranjil'la
olikhulombela injila.’#Mal. 3:1
11Siahene mubool'langa, Yohana Omubaputisi ayomba omundu wosi owebulwa musibala mubukhongobwe. Nebutswa uyo oli omutututu mu Bwami bwomwikulu nomukhongo okhuyomba Yohana. 12Okhurulana olwa Yohana Omubaputisi yakamba okhwola leelo Obwami bwomwikulu bubukulwanga nende abetsingufu, ne abandu betsingufu babwetsumbanga. 13Okhwola khunyinga ya Yohana, abaroobi nende Amalako ka Musa kal'loma khuko Bwami,#Lk. 16:16 14ne nimuli abahuchil'langa okhukasubila, Yohana niye Elija owokhwitsa khukhwe khwali okhuroobwa.#Mal. 4:5; Mat. 17:10-13; Mk. 9:11-13 15Oli namarwi kokhuhulila, ahulile.
16“Ne nafwananie lisuba lino khulusina? Bafwananga singa abaana abekhaye musiiro. Omukanda mulala kulanjisianga abasiabwe, 17nikuboola mbu ‘Khumwembeye tsinyembo tsiebisel'lo ne simusin'ne tawe. Khumwembeye tsinyembo tsiesibeela ne simwekhul'le tawe!’ 18Olwa Yohana yetsa siyalachilanga obusuma khandi siyanywetsanga ewaini tawe, nebutswa abandu baboola ‘Ali nes'sieno.’ 19Olwa Omwana wo Mundu yetsa, nalachilanga nanywa, abandu nibaboola, ‘Lole, omundu omulangu, ma omunywi omulina wa basololi bobusuru nende abetsimbi!’ Obuchesi bwa Nyasaye bumanyibwanga okhuba obulunji nende yabo ababuhuchil'langa.”
Amataala akarasubila mu Yesu
(Lk. 10:13-15)
20Abandu abali mumataala omwa Yesu yali nakhol'le akamangalimwa amenji sibaali okhurula mutsimbi tsiabwe tawe, kho Yesu yabakondekhela. Ma naboola 21“Olitsiboolelwa, Korasini! Olitsiboolelwa Betsisaida! Sichila akamangalimwa akakholwa mwinywe, kalaba nikakhol'lwe mumataala ka Turo nende Sidoni, khane abandu baho bakhabeye nibebikhile amatasi nibepul'le likokhe okhumanyia mbu barul'le mutsimbi.#Isaya 23:1-18; Esek. 26:1—28:26; Yoeli 3:4-8; Amosi 1:9-10; Sak. 9:2-4 22Nebutswa mubool'langa, Nyasaye yakhabeele abandu ba Turo nende Sidoni tsimbabasi okhuyomba inywe khwitukhu liesiina. 23Nawe Kaperinaumu, wenya okhwechingula okhwola mwikulu? Wakhahangulusibwe hasi okhwola Emakombe! Akamangalimwa akakholwa mwibe kalaba nikakhakholwa mu Sodoma, khane liakhabeyeho okhwola leelo!#Isaya 14:13-15; Okhuch. 19:24-28 24Siahene Nyasaye yakhabeele abandu ba Sodoma tsimbabasi okhuyomba inywe mwitukhu liesiina.”#Mat. 10:15; Lk. 10:12
Mwitse khwise muhulukhe
(Lk. 10:21-22)
25Olwene yilwo Yesu yaboola, “Papa Omwami womwikulu nende esibala! Khukhupilanga embwo sichila wabisula amang'ana yaka khubasilu ne wakabisa khubachesi nende abalwenyukhu. 26Yee, Papa nimbwo wenya kekhole.
27“Papa wanje waimba ebindu biosi. Abulaho omanyile Omwana narali Papa, ne abulaho omanyile Papa narali Omwana nende uyo owomwana ayanza okhumubisul'la.#Yoh. 3:35; 1:18; 10:15
28“Mwitse khwise inywe mwesi abachonyele nabachinjile ebilinga ebisiro, nase ndakhamuhuluusia. 29Mwetukhe likokolo lianje, mweke khwise, sichila ise ndi omuhoma khandi omwechiehi mumwoyo; ne mulanyoola okhuhuluukha mumioyo chienywe.#Yer. 6:16 30Okhuba likokolo lianje nelitoro ne esilinga sianje nesiangu.”
Currently Selected:
MATAYO 11: EBAIBO
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
